सरकार
बिला कि
ङानिह्राङबा ह्युल्बाला सेबक खालाइ आरे ।
थेसे चु लालाकि
मुतेबा चाबास्हे छुम्ला
ओम
फोइदानसे ग्रस्त ह्युल्बादा
यौबनासे मस्त अर्धनग्न ब्योन, छामेजुगु पुइगासि
बिला–
‘लौ ङाला प्यारो ह्युल्बा हिन्ना
अभाबदा म्लेसि रसलिलारि मस्त ताउ
केवा बिबान सुख भोग हिन्ना ।’
थाहा मुला थेदा
फोइदानसे ग्रस्त ह्युल्बा
रसलिला आहिन, मुठिनाङ अन्न तोला ।
सरकार
बिला कि
ङानि ह्राङबा ह्युल्बाला सेबक खालाइ आरे ।
थेसे चु लाला कि
मुतेबा मानजुगु छुम्ला
ओम
रोगतेन छेबारि आखाम्ना कोमारि दोबा ह्युल्बादा
चौरासि ब्यन्जन खुमरि थान्सि
बिला–
‘ङाला प्यारो नागरिक
रोग ब्याधिदा म्लेसि चाबा थुङबा लासि स्याउ
केबा बिबान चाबा थेन रमझमला लागिन हिन्ना ।
थाहा मुला थेदा
रोगसे नाबा ह्युल्बा
चौरासि ब्यन्जन आहिन, गोलि गि म्हाइला ।
सरकार
बिला कि
ङानिह्राङबा ह्युल्बाला सेबक खालाइ आरे ।
थेसे
चु लाला कि
ह्युनाङला क्वान कारखाना डुङला
ओम
हिमाल, पहाडरि ग्लिङसे साङबा ह्युल्बादा
तराइरि सितलहरसे कक्र्याप ताबाजुगुदा
बहुरास्ट्रिय कम्पनिला बिग्यापन उन्ना
‘सिम्बा बिबान कोकाकोला हिन्ना ।’
बिला–
मस्ति थुङगो ओम ज्यान स्होउ
ग्लिङ थेन सितलहरसे कक्र्याप ताबाजुगु
सिम्बा कोकाकोला आहिन, सरोगि क्वान म्हाइला ।
सरकार
बिला कि
ङानिह्राङबा ह्युल्बाला सेबक खालाइ आरे ।
थेसे चु लालाकि
मुतेबा स्कुलजुग
अस्पताल, कलकारखाना थेन यातायातजुगु
कालोबजारिदा पिन्ना
ओम
कालोबजारि ताआखाम्बा ह्राङला नागरिकजुगुदा
सरकारला समृद्धिला म्हहाङरि ह्रो आलाबा आरोपरि
देसद्रोहला मुद्दा ल्हागाब लासि जेलरि पुइला
चु कि
मान, खाद्यन्न, क्वान, यातायात, छ्योइ आहिन
राहातला मिनरि जेक्खे
थेसे प्याकेटला प्याकेट कन्डोम जुला ।
सरकारमि
मौसमि बाजा तातोमुबा
जाम्बुलिङलान मुतेबाबिमा ज्याबा जात्रा तातोमुबा
सरकारमि तापिन्जि
बेमौसमि बाजा
जाम्बुलिङलान खानाङए आरेबा हाडिगाउला जात्रा ।
ह्याङसे
खाराङ लासि ङ्यान्सि चिबारि खाम्मुला
चु बेमौसमि बाजाला छेर्बा अलाप ?
खाराङ लासि दाङचिबारि खाम्बा मुला
खानाङए आरेबा लिसो जात्राला सफर ?
कठिनबिमा कठिन युग पोबा
क्रुरबिमा क्रुर सासक ब्याङबा ह्याङ
तिल्दा ताचिमुला चु दुइरि
दोङरापलान नाजुक ?
