सिन्धुपाल्चोक । लिसंखु पाखर गाउँपालिका स्तरीय ङ्हाछा राष्ट्रपति रनिङशिल्ड प्रतियोगिता २०८० ला उपाधि सम्पदा माध्यमिक विद्यालय सिलढुङ्गासे डाबा मुला । पुसला १९ गते कुनु थुम्बा प्रतियोगितारि म्होकोन बिमा ल्हाना गोर च्युक्सोम (१३) स्वर्ण, गोर निस (७) रजत थेन गोर ब्लि (४) कास्य पदक लासि न्हिच्युइब्लि (२४) पदक डाबान सम्पदासे उपाधि डाबा हिन्ना । थेराङनोनलासि बुद्वोदय मावि लिसंखु न्हिछा थेन धर्मोदय मावि ठुलो धादिङ सोम्छा ताबा मुला ।
पालिकाला सिक्रे नयाँ बस्तीरि मुबा शिखर खेल मैदानरि ताबा प्रतियोगिताला डाबाकादेदा सिन्धुपाल्चोक १ ला सांसद् माधव सापकोटा ‘सुवोध’से शिल्ड, मेडल थेन प्रमाणपत्र दोन्बा मुबा। ग्रेनडोन्बो सापकोटासे खेलकुद प्रतियोगिताला बिजेताला छ्यामरि बोकिन्बादा बधाई दोन्बान उत्साह दोन्बा मुबा बिसाम पालिकाला चोहो राजु लामासे प्रमुख अतिथि सापकोटादा सडक कालोपत्रे लाबा थेन टेलिफोन टावर सुधारलगायतला विषय समेटब लाबारि ध्यानाकर्षण पत्र दोन्बा मुला ।
प्रतियोगितारि पालिका न्हाङला गोर च्युइगिक (११) माविला ग्यार्जा ब्लि बिमा ल्हाना लोप्पोनजुगुसे तेक्वान्दो, भलिबल, कबड्डी थेन एथलेटिक्स लासि गोर ब्लि विधाला ४० खेल क्लाङपिन्बा पालिकाला शिक्षा शाखा प्रमुख बिनोद कार्कीसे तामसोर दोन्बा मुला ।
गेताङरि पालिका न्हाङला राष्ट्रिय तथा अन्तर्राष्ट्रिय खेलरि बो किन्बा खेलाडीकादे तेह्रौं साफला तेक्वान्दोला स्वर्ण पदक डाबा काजल श्रेष्ठ, शुस्मा श्रेष्ठलगायतदा डेन लाबा मुला।
गेताङरि बागमती प्रदेशसभाला मुल्मि माइली तामाङ, ह्रोचोहो मिठुदेवी लामा, प्रमुख प्रशासकीय अधिकृत दिलकृष्ण श्रेष्ठ, कार्यपालिका मुल्मिकादे, पालिका न्हाङला लोप्खेन, लोप्पोन, अविभावकलगायतसे बो किन्बा मुबा । प्रतियोगिता पुस १७ गते बागमती प्रदेशसभाला मल्मि सरल सहयात्री पौडेलसे ठोङस्हेङ लास्ह्युबा मुबा ।
