याम्बु । छ्योर्तेन टासी तामाङ गुम्बाला कुछा साधारणसभा थुम्बा मुला । पुस २७ गते गुम्बालान हल बौद्ध नयाँबस्तीरि थुम्बा सभादा ग्रेनडोन्बो गोकर्णेश्वर नगरपालिका वडा नं. ६ ला चोहो नवराज लामा, संविधानसभा मुल्मि हर्षजित लामा थेन गुम्बाला चोहो हरी लामासे छ्यामरि छ्योइमे म्रासि ठोङस्हेङ्बा मुबा ।
साधारणसभारि ग्रेनगाउराइ हिराबहादुर लामासे वार्षिक प्रगति थेन न्होरचोहो सरस्वती लामासे आर्थिक प्रतिवेदन प्रस्तुत लाबा मुबा बिसाम चोहो हरी लामासे वार्षिक कार्ययोजना प्रस्तुत लाबा मुबा ।
लामाग्याम टासी मोन्लम, ताम्बाग्याम साङसेरगेम थेन गुम्बाला वरिष्ठ ह्रोचोहो सिद्धिबज्र लामासे छिकग्याम डेन लास्ह्युबा थे गेताङरि गुम्बा स्हेङ्बारि योगदान पिन्बा व्यक्तिकादे मेघबहादुर गोले, छिरिङ छोइजुम लामा, छ्योइसाङ लामा, सन्तबहादुर लामा, गणेश घिसिङ, मिम सकल लामाकादेदा डेन लाबा मुबा । थेराङनोन लासि देछेन छ्योइलिङ गुम्बा काभ्रे, साम्तेन टासी छ्योइलिङ गुम्बा सिन्धुली, साङतेन थर्पेलिङ गुम्बा सिन्धुली थेन ज्याङछ्युव धार्केलिङ गुम्बा काभ्रेदा नोन संस्थागत डेन फुल्बा मुबा ।
गेताङरि ग्रेन डोन्बो गोकर्णेश्वर नगरपालिका वडा नं. ६ ला चोहो नवराज लामा, गुम्बाला ग्रेन ग्रोइपा मानबहादुर योन्जन, तामाङ घेदुङला ग्रोइपा परशुराम तामाङ, ह्युल्ठिमजोम्नाला मुल्मि हर्षजित लामा, ओखलढुङ्गा काठमाडौँ सेवा समाजला चोहो दिर्गा तामाङलगायतसे ज्याबाम्हान्बा ल्हेङ्मो थान्स्ह्युबा मुबा ।
