याम्बु । सर्लाहीला गिक्खे समाजसेबि युबासे बौद्धिक अपाङ्ग थेन क्यान्सर पीडितदा ह्रो लासि केवारे तेन्बा मुला ।
बेनेला ६ नाबिङरे बागमति नगरपालिका १२ रि चिबा समाजसेबि युबा जयबहादुर गोलेसे केवारेला दुइसाङ्रि बौद्धिक अपाङ्गजुगुदा क्वान थेन क्यान्सर पीडितदा न्होर ह्रो लामुबा ।
प्राङ्बो बौद्धिक अपाङ्ताजुगुदा च्याङ्नान तासाइ राहत दोना लाबा उद्देस्यसे ज्याबा सोल्बास्हे थेन क्वान पिन्बा बिसि थेसे पाङ्बा मुला । थे वडाला ३२ जना बौद्धिक अपाङ्गता ताबा म्हिजुगुदा काल्साङ छ्योइखोर्लिङ गुम्बाला ख्राङ्गारि गिक्खे गेताङला गुङ्रि ज्याबा चाबास्हे ख्वाबा मुबा । थेनिकादेदा गोले गेप्पाखुयुसे क्वान सुताइ पिन्मुबा । थेनोन गेताङ्रि गोलेसे बागमति नगरपालिका १२ चिबा ७ दिङ्ला क्यान्सर पीडित बुमो ईशा जिम्बादा मान लाबाला लागि न्होर ह्रो लामुबा ।
गोलेला पहलरि ल्होलो ह्रो लाबा म्हिजुगुग्याम क्यान्सर पीडित बुमोला मान लाबाला लागि आर्थिक पोप्मुबा । ३८ तोङ्जा ९ ग्यर्जा ५० रुपैयाँ थेन गोलेसे ब्यक्तिगत १२ तोङ्जा ५० रुपैयाँ लासि ५१ तोङ्जा न्होर ह्रो लामुबा । थे न्होर पीडित बुमोला म्हेमे पुर्णबहादुर जिम्बादा पिन्मुबा । पीडित दिमथेमेसे आर्थिक अभावरि बुमोला ब्लड क्यान्सरला मान लाबारि समस्या खाबा बिसि ह्रो ह्रिमुबा । पीडित बुमोला दाते भक्तपुरला क्यान्सर अस्पतालरि मान लाचिबा दिमथेमेसे पाङ्मुला ।
