आम्थङकि मेदाङ

दिङि गल्बुत्पला । ङेसि नाम्साइ म्हि थपथेपले ह्राङ ह्राङकि दिमन्हाङ । खिम्चेखोर्चेला दिमन्हाङ मे लुम्बला मुबा । ङाइ दिमङ्हङ म्हुन्दुङ, दिमरि म्हि खलाइनो आरे । दिमला गोदोप सुन दुप्परि बुरि यार्बला । ङा नाका च्युप्प, रा, म्हे चुङ्बरि चेक योनो खबला । बुचे सुन दुप्पि तङर आबुदन दिमरि खबला ।
म्हुन चिप्बोर्टिबला । ङा गिगिनो ङारजोरि पोक्चोकले मोर आम्थङ ब्ले च्यारिपला । होले च्यरिमा चेन्स ब्लेरि मेदाङ गि लुम्ब म्राङ्चि । ङाइ सेमरि म्हेन्जि, ‘खला हिन्जि ? पाखाग्यम्चे देउलि खाइ पङ्प तला ।’ होजु मेदाङ तिछङ रिकिनो स्यटिचि । ‘ता हिन्जि ?’ पङ्जिम ङा होजु मेदाङ तकिनो च्यजिम टिरिजि ।
नाम्सारि चाम थेन यम्बुरि ह्राङले बिजुलि आरे । मुरि के सार चिलिलि सर्टिब म्राङपा । नाम्सारि फिच्योर बत्ति म्रपि चलेन आरे । आम्थङ ब्लेरि सर्बि मेदाङ ङा दोलेपचे च्यरिपला । च्याना च्याना मेदाङमि सर्बोर्चि । लो बिसाम होजु ब्ले लुप ह्याल तजि । ङादाम लोङ्पाइनो छोर्जि । ‘ता कि म्हेदाङ हिन्जि ?’ पङजिम सेमरि म्हेन्टिजि ।
पिइले डोङ्पि मेदाङ सर्जिम पखा लुप तजि । च्यना च्याना सुप म्हाजि । ‘तिकि आउदि ।’ ङाइ सेमरि म्हेन्जि ‘अए मार्तेल बेबासो वा ।’ होथेक्योरनो तिख्यपरि मेदाङ सोम डोङ्जि, ब्लि तजि, ङ्हा तजि । लु मेदाङमि तोर्चे मोर्चे केत ल्होम खनबिबिनोका ठाम्जि । लाउ ङाइ गोमि बरह्राङप तजि । नक्चि दोजिम दिमरि च्यजि । दबदोन खलाइनो बुचे खबला आरे । ङा लोङ्जिम लोङ्जिम होजु आम्थङ ब्लेकि मेदाङ च्यजिम टिरिजि ।
रुइ रुइ ङ्याटिबि बुलुङ छपछिपले कुटिसि टिबुत्चि । खनाइनो ताइनो ङ्यापा आथे । क्योम्जङ आम्थङ ब्लेरि मेदाङ स्यटिपा । मे खेमम म्हब खेमम सर्ब तटिपा । मेदाङ दरेम फेल्जिम फेल्जिम रिप पाखा दोजि दिरङ मङखुङ खोन्दोरोङदोन दोखजि ।
आम्थङ ब्लेकि मेदाङ दरेम रिपरिक्योर यर्जि । ङाइ सेमरि म्हेन्टिजि ‘चुले मेदाङ स्यामामि खले दिम अक्रोबा हिन्जि आम्थन्ङरि ओसिम रिपरि ।’ सेमरि लोङलाइनो हु मेदाङ फ्यङ्जिम दोलेपदोन खलाइनो ज्यदङ्चे च्यासेला म्हेन्टिपा । मेदाङ मफुदोन खजि ओसिम दोजिम यर्चि । ‘नम्स्यो घट्टरि ङिम्यङसम सपचेतरि जुबि घट्टकि ब्रङ च्यतोला । मेदाङचे क्रोजि आक्रो । आहिन्सम साउराग्रेन कि आलेमाद ङोत्तोला नम्स्यो दिङिरि ताइस ।’ सेमन्हाङरिन ङाइ पङजि ।
ङार जोरि टिरिपला ङा घरिपोच्चोक्योर कलङकुलुङ ताम थेमम नक्चि दोजिम थेक्योर च्यापित्जि । बुचे सुन दुत्जिम नङ्बमादिङ नाना आमा नेमा खरिबटिम । ङाला मेदाङचे ब्ल बोर्बित्पला । होले कलङकुलुङ म्हि ताम पङ्प थेपचेम, ङाला ब्ल दोजिम खजि ङदिङ ।
ङा ङारचे फप्जिम म्राप ठोङ्परि खजि । सुन नाबि नङ्बमा तङरले तलाजोरि सुन तेबरि चाम क्रेत्जिम यार्जि । अपि मुरिनङ सुन नाजिम लङमर बुङेन्से खले खब हिन्जि । चोङरेचेमि मुरि बिमइनो ह्यक्को नाबल टिम । चामनो ग्रेक पङ्पला । ङा चाम क्युत्ला बि लोङ्जि ।
ङेसिरि सुन नाबि नङ्बमा सुन तलाजोरि चिम्जिम कान चबरि गोरले टिजि । दिमन्हङ गुङेइ फु मुब, कोरोरो गुन्दरि तित्जिम तिबल मुब । आमाचे मुप थम्छे देरमारि कन खु युजिम राङ्जि । ङा कोर्तोङ जोरि केल्दुम छ्यजिम टिरिपला । ह्राङकि कान बो देरमा किन्जिम ङा कुटिसिले चजिम या ख्रुबरि रेजि । सेमन्हाङ होजु मेदाङ किनो लुम्टिबा ।
आम्थङ ब्लेरि मेदाङ स्याबि ताम ङाचे खल्दाइनोन अस्येत । खल्जेनो ङोतोइनो आङ्योत । म्हुनरि ङा लोङ्जि, न्हुर आखा, सेमनाङ होजु मेदाङ किनो स्याटिजि । फिच्योर होजु मेदाङ च्यबारि डोङ्बइनो आखम । म्हुनगुङदोननो ङाला मि प्लोक्ले टिरिजि ।
‘लो आले म्हेमेदिङ रा, म्हे छबरि यरो । ङि तङररि यर्जि ।’ आमाकि केत थेमका ङा फसक्क छिङ्जि । म्हुन गतेवेलो म्हेर्जी छोरनो आछोर ।
स्यो डेत तबक्योर प्रो नाजिम ङा म्हेमेदिङ प्रे रा, म्हे छबरि यर्जि तोर थुम्बथान क्योर । होले नम्स्योरङ दिङिगुङ तमाइनो ङाइ सेमरि दोलोम्हुन म्रङ्पि मेदाङकिनो ह्वाल खटिबा । दबदोन मेदाङकि ताम ङाचे खल्दाइनो स्येत्पला आरे ।
ङाला म्हेमे चक्पि लम्बु हिम्ब । नाम्साला नेदासिब्दा क्योङपरि, बोम्बोला लासोल, लामाला म्हेदो ता तलेइनो ङाला म्हेमे आरेपरि आता । म्हेमे चेकिनो नाम्साब ख्युम्बा खम्बा । ‘लु होइ तिङि जोथोककि लामाइ म्हेदो, तिङि पिरिगो जम्मनो म्हेदोरि दोखाउ ।’ ङाइ नाम्सारि दिमरि खेमखेम नबिङ उब ओसिम म्हेमे घरिपोच्चोरि क्रिङटिब थेबा ।
ङाचे म्हेमेदा दोलो म्हुन म्राङ्पि आम्थङ ब्लेकि मेदाङकि ताम स्यत्जि । म्हेमे फात्लोङ्बाह्राङ ताजि ओसिम सुङजि, ‘आहिन चुजे मसान म्राङ्प सो वा ?’
‘आहिन चु मसान पङप ता हिन्जि ?’ ङाइ सेमरि म्हेन्टिजि । ङाचे म्राङ्पि मेदाङ मसान पङ्पि ताम थेजिम ङादा लोङपा छोर्जि । ङाला या काङनो लोङजिम सिम्जि ।
‘चु मसान पाङ्ब ता म्हेमे ?’ ङाचे म्हेमेदा ङोत्जि ।
‘चु..चु म्हुन हुपथुप म्हुन्दुङरि म्हाङ स्यबि ब्राचे डोङब । मेदाङ ह्राङले लुङजिम डोग्प । खनबिबिनो फेल्ब म्हब फेरि फेल्ब । चुले मसान स्यब म्हुन चिप्पदिङ ।’ म्हेमेसे सुङसिनो बोर्चि, ‘चु मसान मेदाङ स्यबि ग्लारि विर खब, सिङो सन्डे खब । होल्लजिम होदेबि मेदाङ स्यब च्याबा आताबा ।’
‘म्हेमे होजु मेदाङ स्यबि ग्लारि ङिसाम ता तबा सिम ?’ म्हेमेदा ङाचे ङोत्जि ।
म्हेमेचे सुङजि ‘होजु ग्लारि ङिसाम सिङो बापा सिङो स्यप्पा । ओसिम थे दिमरि खबदिङ दिमरि कोलामादा बापा, नबछब तबा ।’
सिङो सन्डे पङ्पलम थेपला । चु मेदाङ स्यबि ग्लारि सिङो सन्डे विरमसान खबटिम तिङि ङोसेजि । म्हुनरि ओ दिङिरि खनाइ नाम्सा लम्डा थाजिम यर्तोसे तसम आमाचे जङगु ले सोमकि पुजि ख्यप्जिम यरो लम्डरि सिङो स्यप्ल पङ्बला । सिङो स्यप्जि पङसम क्रनाबा फोजिबा ताबिबिनो तबरो ।
म्हेमेला मेदाङ स्यबि ग्लारि ङिबदिङ सिङो सन्डे बाबारो पङपि तामचे ङा बेस्ले लोङजि । ह्रिरि ग्लप म्हे छरब मुपला । म्हेमे ग्लप दङ्बरि चेक थारेङ यर्मनो ङादा बेस्ले लोङजि । लोङजिम ङा दरेम गिगिनो टिब आखम्से तजि । ङाइ मिचे खदुरि मुब बेक्कर बुट्टरि मसानका मुजिवा म्हेन्टिजि सेमन्हाङ ।
तिला म्हुननरि म्रङपि मेदाङ न्हङ मसान सिङो सन्डे खब पङपि तामचे ङा लोङजि । ङा ङोङ्यम मुपि म्हेमेला या चुङङिजि । ङा लोङ्प म्राङजिम म्हेमेचे सुङजि ‘ता तपला चु ठिरदा ? ता बि लोङ्टिब दिङि गुङरि ?’ । ङा पङमु लोङजिम च्याम चुरटिबा । म्हेमेचे रा म्हेदा दिमरि दोजि । ङा लोङजिम म्हेमेला कछड चुङ्जिम ब्रटिजि । ‘ओ तिल्के खन छ्योङ्बा ग्यामरि ब्राउ, चु मले ग्लाप खन तिकङ ब्रटिउ ऐकि चिक्प फ्रेब दरे ।’ म्हेमे ग्लाप म्हेदा बरक्टिबा । ग्लाप म्हे म्हेमेइ ताम गोजिम वा आगोन ता हिन्जि दरेम ग्लापमेजे तङराले ग्यामरि ब्रजि ।
ङा म्हेमेला कछाड न गि चुङजिम ग्यामरि ब्रटिबला । रा म्हे ग्लाप ङोनङोन म्हेमे ग्लाप ग्यापरि । ङा म्हेमेकि कछाड न गि चुङजिम गोदोप बिमा ग्यपरि । ङादा बेस्ले लोङप छोर्जि । ङादा ग्यापचे कोसोक्ले खल्जे छुब छोर्जि । ङा ग्यापरि दोजिम च्याजि खलाइनो आरे । ङादा दोसिन ग्यापरि खल्जे हिन्जि छुजि । दोसिन दोजिम च्याजि ग्यापरिमि खलाइनो आरे ।
ङा यम्जि यम्जि दोजिम ग्यापरि च्याबा म्रङजिम म्हेमेचे ङोजिम ओइ देमेनले हिन्जि, ‘ओइ आले आएकि ग्यपरिमि ता सिम म्लङम्लङपि म्हि ग्रोसोलकि डुनडुनले †’