शान्ति आङा, फुलमान ज्योज्यो थेन ल्हुइला गोङमा

ङाला ‘ल्हुइला गोङमा’ मिनला छ्योइ छिसि जिन्मुबा । थे छ्योइ छिसि बिगे प्रेसग्यामसे बासि तिलाइ रे लिच्छा ह्वाइखा ब्रिखेन ह्रो मुक्तान थेबासे ह्रुप ताबा दुइरि ङादा तिरेम प्लिक च्यासि सुङजि, ‘इश्वर ह्रो, छ्योइ दारेम छिसि जिन्मुला । चु छ्योइला ठोङसेङला तामरि ह्राङला सेमताम तिला मुला ?’
ङाइए नोन थेबा ह्रोदा तिरेम प्लिक च्यासिन चुते पाङजि, ‘ठोङसेङ लाम्याङसाम ज्याबा तासेला ।’
बिमाइह्राङ ङाला ‘ल्हुइला गोङमा’ला ठोङसेङ गेताङ तामाङ ह्युल्बामाला गिक्छा ब्रिखेन बुद्धिमान मोक्तानला केवा रेला दुइसाङरि स्हेङबा ताजि । थेए नोन तामाङ डाजाङ थेन थेबा बुक्स, याम्बु गेन्दुन ङ्हि डिक्सि । ङादा ताङबा खाजि । फुरफुर ताङबा खाजि ।

ताङसि ङाला सेम तोरतोर मुरि जाजि ।
ङाला ‘ल्हुइला गोङमा’थोरि ल्हेङमो थान्बारि ङाइ गोर ङ्हि ब्रिखेनकादेदा दाम्जि– ब्रिखेन आङा शान्ति लामा थेन ब्रिखेन ज्योज्यो फुलमान बलदा । थेबा ह्रोसे ङाला छ्योइला थोरि ल्हेङमो थान्बारि ह्रो लाबा ब्रिखेन ङ्हिदा बिसि गोर ङ्हि ‘ल्हुइला गोङमा’ छ्योइ दोन्सि जिन्मुबा । थेबा ह्रोसे ओजा छ्योइ दोन्माकुनु ङ्यासे थाङमान ङाइ दोक्छेबिमा ङ्हाच्छा ब्रिखेन आङा शान्ति लामादा फोन लाजि । फोनग्यामसेन आङा शान्तिदा ङाइ ङाला छ्योइला थोरि ल्हेङमो थान्बारि म्होइजेन लाजि । आङा शान्तिसे तिखुरिन ‘ताला’ सुङजि । थेलिच्छा, ङ्यासे थाङमान ङाइ ब्रिखेन ज्योज्यो फुलमान ताइ नोन आङा शान्तिदा ह्राङलासिन ङाला छ्योइला थोरि ल्हेङमो लाबारि म्होइजेन लाजि । ज्योज्यो फुलमानसे नोन आङासे ह्राङलासिन तिखुरिन ‘ताला’ सुङजि ।

ङादा ताङबा खाजि ।
आङा शान्तिदा ङाइ जाजामाहेन्देन म्राङबा मुसाइ ङाङ्हि जात्तुकरि छ्यामामा लानिहोइरि लाजाङ क्लाङचा आम्याङमुबा । आङा शान्ति थेन ङा नाम्सागिरिन केबा मुसाइ ङाङ्हिसे गिसेमगिदा ङाम्तेसे ङोसेचा आम्याङमुबा । आङा शान्तिला केवा ग्ला तिमालला मुक्पारि मुसाइ आङा हुर छार्बाचा आङालान आस्याङला नाम्सा डहुरि मुबा । ङाइ था ताबा अन्सार आङा शान्ति जात्तुकु दुइहेन्देन आस्याङनिला नाम्सा डहुरिन टिसि थेर्लान लोपखाङरि डोसि खामुबा रो । थेर्लान सारि लाजाङ क्लाङना क्लाङनान हुर छार्मुबा रो । थेर्लान सारि दाप्पाल क्लाङना क्लाङनान हुर छार्मुबा रो ।
ङाला दिला आले अजय थेन आङा शान्तिला थेबा आले सुमन लोपखाङला कक्षागिरि छ्याम नोन डोबा ह्रो मुबा । आले सुमन थेन आले अजय ग्रुङगिह्राङबा मुबा, ह्रुप तामाहेन्दे होक फेनोन आखाम्बा । थेङ्हिला चुराङबा ह्रिक्पादा ङाइ ङाम्तेसे म्राङसि खामुबा । ङाम्तेसि च्यासि खामुबा । थेङ्हिला चुराङबा तिङमा ह्रिक्पादा÷तिङमा चेकाइदा ओन्छाङसे ब्ले म्राङतासि ङाला सेम दोसि खामुबा, आदेङदेङ लासि । थाआयाङना ।
खालाइसे थाआयाङना ।
तिलासि तिलासि, तिरेकुनु ङाला न्हाबेङरि गोर्गि थासाङ स्हाङ दोकाजि । जामा ङा खोपोङरि मुबा । आले अजयए नोन ङातेन छ्याम नोन मुबा । थासाङरि बिमुबा, ‘अजयला ह्रो सुमन डोङजि ।’ ङादा आज्याना ङ्हाम्जि । आले अजयए नोन पुप तासि क्राबा चुजि । आले अजयसे क्रालि काइसे ङापाट्टि दोसि पाङजि, ‘ङाला तिङमा तिङ तिनिहेन्दे फ्रेट टाङजि ।’
आले सुमन च्यामाइ तोक जेबा । खालातामातेन ताम पाङमाइ क्वाइ लासि पाङबा । ओतेचे आहिन्ना, ङाइ आले सुमनला गोर्गि ह्रिक्पादाचा खाइमाइ म्लेआखाम । तिलाइ लासि म्लेआखाम । आले सुमनला थे ह्रिक्पा तिला बिसाम, ह्रुप ताबा दुइरि ज्युम नेसिचे ताम पाङबा । ज्युम आनेते ताम आपाङबा । ङादा आले सुमनला चु ह्रिक्पा आउदिन सेम निमुबा ।
लिच्छा, ङाइ सेमन्हाङन्हाङरिन म्हान्जि, ‘ज्याबा म्हिदा लासे योनासेन सेम दुइसि बोर्बा टिम । थाआयाङना बोर्बा टिम । खालाइसे थाआयाङना बोर्बा टिम । सेम दुइसि बोर्बा टिम, लासे ।’
आङा शान्तिला थोरि चु ल्हेङमो थुइबा ताङरि ङाइ ज्योज्यो फुलमान बलदा तिरेम डान्जि । आदेङदेङ लासि थुम डान्जि । फुलमान ज्योज्योदा ह्रुप ताबाबिमा ङ्हाच्छा ङाइ ज्योज्योलान गिक्छारेम छिबा ‘काजोल खातुन’ छ्योइदा ह्रुप ताम्याङमुबा

ङाम्तेसे ङोसेम्याङमुबा ।
लिच्छा, फुलमान ज्योज्योदा कान्तिपुर स्योस्योरि डोम्याङजि । ङोसेम्याङजि । जामादुइदोना, ज्योज्यो फुलमानदा ओन्छाङ ब्ले म्राङलाचा आम्याङमुबा । ज्योज्यो फुलमानदा ह्रुप ताबारि ङाइ ज्यागोन दिङ ब्रान्तोजि । ल्हाना ब्रान्सि याङबा स्हे ब्रोइ खामुला बिमुबा ।

हिन्बान टिम ।
आदेङदेङ लासि ज्योज्यो फुलमानदा ङाइ तामाङ डाजाङला गोर्गि ग्योइकाइ गेताङरि ङाम्तेसे ब्ले म्राङम्याङजि । ज्योज्यो फुलमानदा म्राङम्याङसि ङादा ताङबा खाजि । फुरफुर ताङबा खाजि । ताङसि ङाला काङ सारि आतानि ।

तोरतोर मुरि जाजि ।
फुलमान ज्योज्योदा दोक्छेबिमा ङ्हाच्छा ब्ले म्राङमाकुनु ओन्छाङ टिसि ल्हेङमो लाआम्याङनि, लाबा ङ्हाज्याङ सेम मुसाइ । फुलमान ज्योज्योदा दोक्छेबिमा ङ्हाच्छा ब्ले म्राङमाकुनु ङोसेबा जुआम्याङनि, जुबाङ्हाज्याङ सेम मुसाइ । ङादा आज्याना ङ्हाम्जि ।

दाबे आज्याना ङ्हाम्जि ।
लिच्छा, ज्योज्यो फुलमान थेन ङा जाकारकार ङोसेबा चुमा ङाला ‘ल्हुइला गोङमा’ छिसिजिन्मुबा । ङाला ओजा छ्योइलान थोरि तिलाइ ल्हेङमो लाबारिबिसि फुलमान ज्योज्योदा म्होइजेन लाबा रेकुनु ज्योज्योसे ङादा सुङजि, ‘आलेला ह्वाइखादा ङाइ ङाम्तेसे डोसि खामुला ।’

‘ल्हुइला गोङमा’ ङाला ब्लिछा छ्योइ हिन्ना बिसाम, गिक्छाचा डान्बापोपला छ्योइ हिन्ना । ङाला चु छ्योइ चुराङलासि आछिसेला मुबा । चुराङलासि ङाला डोखेनकादेला ओन्छाङ बाबारि तामाङ डाजाङ गेन्दुन थेमे थेन तामाङ डाजाङ स्योस्यो थेमेला ङ्हाज्याङ बाङ मुला ।

टु मुला ।
ओराङ नोन लासि, ङाला चु छ्योइ बिगे ‘ल्हुइला गोङमा’ चुराङलासि छिबारि थेबा बुक्स, याम्बु थेन थेबा बुक्सलान ङाला तिङमा ब्रिखेन ह्रो मुक्तान थेबा लाइ नोन ङ्हाज्याङ बाङ मुला ।

टु मुला ।
ङाइ चुराङलासि गिसेमगिला तिङमा बाङ थेन तिङमा टु चेकाइसे आयाङसाम ङाला ‘ल्हुइला गोङमा’ ङाइ चुराङलासि ल्हुइरि खाइमाइ ल्हेआखामसेला मुबा । तिनि ङाला तिङमा डोखेनकादेला ओन्छाङ थेन आटिना चु गोङमा बिगे ङाला ल्हुइला गोङमा ल्हेबारि खाम्बारि ल्हानान ङेङगोरकादे लाइ नोन बाङ मुला ।

टु मुला ।
ङाला ‘ल्हुइला गोङमा’ ठोङसेङ गेताङरि ङाइ तिलाइ ल्हेङमो लाबारि म्लेजिम । स्योङ म्लेजिम । ङादा दात्ते पेबा खासि टिमुला । स्योल पेबा खासि टिमुला । पाङबारि म्लेबारि आताबा स्हे म्लेजिम । बिबारि म्लेबारि आताबा स्हे म्लेजिम । म्लेजिम ।

स्योङ म्लेजिम ।
‘ल्हुइला गोङमा’थोरि तिलाइ ङाला सेमताम थान्बा ताङरि ङा ल्हानान ह्राङसे ह्राङतान म्राङसि तिङ नाजिम । क्रालि काइसे तिलाइ ह्राङलान सेमला पोरकादे प्रिजिम । सेमला पोरकादे प्रिना प्रिनान, ह्राङसे ह्राङतान स्योङ म्लेजिम । ओजा स्योङ म्लेबा ताङरिन ङाला ‘ल्हुइला गोङमा’थोरि सेमताम बिगे ल्हेङमो थान्बा ज्योज्यो फुलमान थेन आङा शान्तिदा डान्बारि म्लेजिम ।

स्योङ म्लेजिम ।
डाजाङग्यामसे फिक्र्याप थोन्मा का थायाङजि, आङा शान्ति थेन ज्योज्यो फुलमानदा डाजाङग्यामसे तिरेम थुम डान्बारि म्लेबा रापकादे । ओजा डान्बारि म्लेबा रापकादेदा डान्सि तिरेमि ङादा आज्याना ङाम्जि । ङाइ तिखुरिन ङाला ङाम्तेरि मुबा आङा शान्तिला न्हाबेङ ङामरि दोसि सातामसे पाङजि, ‘आङा, ज्योज्यो थेन ह्राङदा डाजाङग्यामसे डान्बारि ङाइ म्लेजिम । ह्राङ थेन ज्योज्योदा ङाइ डाजाङग्यामसे थुजेछे दोन्बारि म्लेजिम । स्योङ म्लेजिम । म्लेबारि आताबा स्हे म्लेजिम । स्योङ म्लेजिम ।’
ज्योज्यो फुलमानए नोन आङा शान्ति थेन ङाला ङामरिन मुबा । शान्ति आङादा ह्राङ लासि ङाइ ज्योज्यो फुलमानदाचा ओजा ताम ङाइ सातामसे न्हाबेङ ङामरि निसि पाङआखाम्नि । लिच्छा, ङाला सेमरि खेन्जि, ‘तिङमा आङा शान्ति थेन ज्योज्यो फुलमानदा आडान्ना ङाइ ख्योल्बा गे लाजिम । आताबा गे लाजिम । तानोन आताबा गे लाजिम ।’

ङादा दाबे आज्याना ङ्हाम्जि ।
ओतेबा दुइरि ङादा पेबा खाजि । पेसि ङाला लि वाला ताजि । च्याना च्यानान वाला वाला ताजि । तिरेम यासे लि गाप्जि । थाआयाङना । खालाइसे थाआयाङना । मिख्लिला ल्हेङमो थुइमा खाइमागि ह्राङसे ह्राङतान म्लेबा टिम । खाइमागि ह्राङसे ह्राङतान म्लेमा ह्राङला तिङमा ङेबा ङेङगोरकादे ताइ नोन म्लेबा टिम ।

स्योङ म्लेबा टिम ।
‘ल्हुइला गोङमा’ ल्हेबा ताङरि ङाइ लाबा गिक्छा ख्योल्बा गे गि चुए हिन्ना । म्लेबारि आताबा गे । ख्योल्बारि आताबा गे । हिन्बाम, ल्हुइरि खाइमागि ख्योल्बा गेए तामुला । थाआयाङना तामुला । खालाइसे थाआयाङना तामुला । ल्हुइरि गे ख्योल्बा ग्रेन ताम आहिन, थे ख्योल्बा गेग्यामसे ल्हुइरि लोप्पा गेचा ग्रेन ताम हिन्ना । ‘ल्हुइला गोङमा’ ल्हेबा ताङरि ङाइ लोप्पा तामगिचा चु हिन्ना । ङाइ लोप्पा ग्रेन ताम । ङाइ लोप्पा ङ्हाज्याङ ताम । ङाइ म्लेनोन म्लेबारि आताबा ताम ।

चु ताम ।
ङाला ‘ल्हुइला गोङमा’ ठोङसेङ गेताङला डाजाङग्यामसे ङाइ ङाला तिङमा ब्रिखेन ज्योज्यो फुलमान बल थेन तिङमा ब्रिखेन आङा शान्ति लामादा डान्बा हिन्साम, तिरेम थुम डान्बा हिन्साम, बिगे तिरेम थुजेछेचे बिसि थुम डान्बा हिन्साम, सायद ङाइ चु डान्बा ह्राङनिला ओन्छाङ आब्रिसेला मुताला । देन्बान ब्रिआखामसेला मुताला । आङा शान्ति थेन ज्योज्यो फुलमानला थोरिन ब्रिसाइ स्ह्यान नोन थुमरि ब्रिसेला मुताला, स्ह्यान नोन थोरि ब्रिसेला मुताला ।
देन्बान, ङाइ चु बिला ।