स्यो गाङसाल ङाच्छाला नाका क्रामान
आखे डोङ्रेजि
लेप क्युइरि बाब ग्वाइजि
बाडा सोम सिप लाजि
म्युङ्कुरसे सुर्ति धिजि
बुनुनु म्युगु थोपो वात्न पित्बान
डा नाङ खार्बा छे पुइसि
हुइ हुइ लाबान
फाम सोम सा तात्बान
बामाला तार कार्पेटरि ब्राजि
काङ्फ्लाला छापसे लिच्छा लिच्छा ताब्जि ।
साइलुङ गाङरि
दिनिला सेर फेबा आरे
तासाइ स्यो गाङ्सालरिन
आखे, मामला डोट्खाबा न्हान्बा (सिरक) न्हाङ्ला लेप्पा फेजि
तिनिजे आहिन डोट थेन लेप्पा फेबा
बोगाल सोम दिङ ताजि ।
आखेकादेला खेप्खेप्पा कातला ल्हेङ्मोसे
कोलामखान होङ्जि
अन्तरगाङ होङ्जि
नागि चुजि
दुर्सा गाङला ह्रिरि नामे ङ्याजि
पोर्वा छोर्जि ।
आखेला ल्हुइ लेप्जि
पोकोररि क्युइ प्योबाराङ
ङोला च्युइनि मुजासे
ङोरि टु प्योजि
यासे टु सुम फ्याजि
कविर म्हेमेला न्हानरि
धोत फ्लाक नाजि
आखेसे हुइ लासि, रेङ्बा सा पिच्जि
सिम्बा युङ्थोरि फ्लाक चिजि ।
राइरि खिबा के से
गान नाङ सुर्ति तात्जि
डुमाङ ल्हाप्ते बारि रिल्जि
सलाइ छ्वाक दिजि
ल्हाप्तेबाला भाट्टिसे थोन्बा
निकोटिन सुर्तिला काम्बा म्युगु
गाङ्साल फोक्सोसे डुट्जि
गाङसाल मुला कुइरो मन्डलरि
राङ्सेन ग्याम माइसि फ्याङजि ।
साइलुङ भन्ज्याङला सिम्बा लाबासे
टु खार्जि
ल्हुइ सिम्जि
डोङ्रेजि आखे
सुरवालला साप्प्रा साजि
दोत पुइजि, खान्डो ग्याम लेप्जि ।
अन्तरगाङ, क्युइ न्हान वाच्जि
परपर थिबा काङ्ला गोङ्मासे
पेरु ग्याम चुङ्जि
क्युइ न्हानरि खान्डो क्रेबाला
सा न्हासि खाबा बाङसे
पेरु ग्यामला ल्हाम योना क्रेजि,
ग्यामदि ग्वारि
छारबा पाठा म्हेन्दोसे डेन लाजि
चिपिल्छि, ब्याङ्गुलिङ नामेला काइरनसे
व्हाइ गोबारि मोइजेन ठाजि
म्राप स्वा ताइबा, लि स्यालसे
मुस्कान ठाम्बान
आखेला सेम न्हाङ्ला सागररि,
उत्सुकताला चोमोलुङ्मा रेजि
‘तिक्दा तिनि दोत लिजि ?’
ग्योइ गाङरि आखे दोजि
गोठेरि रा, म्हे, मुइकोला
राङ राङला काइरि ङ्याजि
आखे खाबा थाहा याङ्जि,
लिबा दोत ब्राङ ङामरि हुर्जि
डा छो ब्लाजि
खर्बा छेला चेप ग्याम्से
पोको सोम सारि ताइजि
आखे दङ्ग ताजि
पोको ठोङ्जि
मकै मोठे, ब्रा थेन गन्डु म्राङ्जि
ओसेम आखेसे सेम न्हाङरिन पाङजि
‘खुइसे आम्राङ्ना लासि थान्जिम’
मामला मायाला पोको म्राङ्जि
आखेला खान्डो ब्राबाला ब्लाप्बा माजि ।
लि स्याल थाङ लाबान मुस्कान ठामजि
खुइदा डान्जि
अन्तरगाङला खान्डोरि ल्हिबा दोत डान्जि
बामारि काङ थान्थान भ्राबा डान्जि
चु मकै, मोठेला पोको जे आहिन
चु मामला मायाला मेरि पोर्न लासि ह्रोबा
मायाला छोसे खिबा पोको हिन्ना ।
चु ब्रा थेन गन्डुला पोरे जे आहिन
मामसे रान्दारि सेम तिङ हेन्छेला चेगाइदा
प्रे स्याङ्सि झोरसि पित्खाबा ब्रा थेन गन्डुला पोरे हिन्ना ।
महादेउरि तपतप ताइबा क्युइला थेजे राङ,
आखेला ङोसे फुरुल फुरुल टु सादोना ताइजि
जसै आखेदा लेखो आरे
तिल्दा बिसाम,
गान्दिरि दोगा प्लुम निबा राङ
मामला मायाला सागररि
प्लुम निजि ।
दोलखा दाते ः कोरिया ।
