गोर्कि नाम्साला दिम खाजुबाइ ग्लारि पोप खाजुबाइ ग्लारि खेना मुबा । खेना दिम मुबा ग्लारि बिमा जेना मुबा ग्लारि आउदिन ज्याबा मुबा । म्हिनोन ल्हाना ताला । थेनोन ग्लारि नाङसाल थेन होइसेर मुबा । तासाइ थे ङ्हि न्हाङरि प्रतिस्पर्दि ताबा मुबा । जेनोन तामरि ए बिमा ङा तिल्ला कम बिबा सेम ङ्हिरिन मुबा । गि सेम गिरि तिलाइ अडिक्पालान कारण जाजाबा तामरिन जोर (बिबाद) लाबा मुबा । नाङसालसे तिलाइ स्हे (सामान) छार उन्जि बिसाम होइसेर सेनोन छार मुला पाङसि आरेसाइनोन फुइ उन्बा मुबा । सत्तान कान चासि ग्ला गिरि क्लङबा लासाइनोन गिसेम गि ज्याबा ताम आरेबा ।
तिरेला ताम हिन्ना । नाङसाल आरेबा मौका लासि होइसेर चलाख तासि नाङसाल टिबा ग्ला छ्याक छिक लासि सामानकादे न्होङना लाजिम । ओम ह्राङसे तिनि ग्रेन गे लाजि बिसि मख्ख तासि होइसेर ताङसि दिमरि दोजि । थे म्हुना गाइना दोना होइसेर मख्ख तासि सेम ताङसि सेम न्हाङन्हाङ नेसि नेसि तिनि ङाइ बेनान थे म्युगुला सामानकादे न्होङना लाजि बिसि ताङसि म्हेर्जिम । न्हाङगार स्योरिन नाङसाल ह्राङ क्लाङबा ग्लारि निसि थे ग्ला च्यासिम थे ग्ला छ्याक छिक म्राङसि नाङसालदा ल्हाना क्रोदा रेजि । होतासि ग्रेन–ग्रेन काइरि क्राबान, क्रिङबान होइसेरदा च्यासि बाङबान लाजि । थेनोन दुइरि होइसेर चिचि नेबान नाङसाल ङामरि दोगाजिम । नाङसालदा थेला थे व्यवहार म्राङसि जन्नोन क्रोदा रेबा मुबा ।
जाथाभावि बाङसि क्रिङबा चुबासे होइसेरदाइनोन जोक रेजिम । ङ्हिनोन छेला ( झगडा) ह्राङ ताजि । ङ्हितेननोन जाजाकि सुत्ताइ नरमपान आरेबा । थेनोन दुइरि नाङसालसे होइसेरदा सर्त गि थान्जि । ङ्हिनोन बुरि सुन सुमा खाल्से प्रातियोगितारि सुन ल्हाना सुबारि खाम्ला थे पहिलो ताबा प्रास्ताब होइसेरदा नाङसालसे थान्जि । होइसेरसेनोन सेम ढुक्का लासि ताला पाङजि । ङादा चु प्रास्ताब ज्याबा मुला बिसि होइसेरसे पाङजि । ङ्हिनोन गि सेम गिरि राजिखरसि तामा लिच्छा ङामरि मुबा बुरि सुन सुबाला लागिरि तायार ताजि । ङ्हिनोन छ्यामनोन सुन सुबा सुरु लाजि । नाङसाल जक्कि चलाख मुबा । ओम थेसे चुराङबा प्रास्ताब थान्बा मुबा । नाङसाल ख्वारारा तासि सुन सुबा याला पुवा बेना लासि अर्काे पुवा चुङबरि दोजि । होइसेरनोन योना याला सुन पुवा बेना सुसि अर्काे चुङबारि निजि । तर सुन पुवा वेसि जिन्बा मुबा । होइसेरसे बिमा नाङसालसे ल्हाना सुन सुजि । होइसेरला या थान–थान ताजि । या ङ्हिनोन साप्प्रा सम्पान क्रोदासे नाङसालदा बाङबा चुजि । नाङसालनोन मख्ख ताबान ग्रेन काइरि नेसि ल्हेप्टे ए थेन दिमाग आरे । म्हि ग्रेन चेख्खेन तासि अछ्यो । खाइ एला दिमाग बिसि पाङजि । थे दइरि होइसेरसे ह्राङला गल्ति थाहा तासि थेदा स्विकार लासि तिनि हेन्से ए ङा खाइमाइ छेबा अलाबा ग्रान चासि सत्तान ताङबा, नेबा छ्यामनोन क्लाङबा, स्याबा थेन चाबा बिसि ङ्हिनोन गि सेम गि माफि ह्रिजि ।
न्हाङगार हेन्से ङ्हिनोन छ्यामनोन क्लाङबा थेन नेबा म्राङसि पाराङ ल्हानान ताङबा ताजि । थेनिकादेदा झन ल्हाना ज्याबा ज्याबा स्हेनोन ख्वाबा चुजि ।
रोशि गाउँपालिका–९, काभ्रे
