ङोआसेबा म्हि

उपत्यका माङग्यारग्याम याम्बुरि तिलाइ लाला बिसि खाबाजुगुला लागि बाह्रमासे डिउटि हिन्ना कोठा म्हाइबा ।

नाम्सा दिमरिक्यार लठप्रोसे ह्राङला ल्हुइ ह्रो सजिलोन स्याप्बारि खाम्ला तासाइ चुरि कोठा याङबारि मुस्किल मुला । खाम आखाम स्याप्साइ नोन ल्होलो अडचन नातोला । छ्योआछ्यो हप्ता सोमते म्हाइमा हेन्से बानेस्वरला बुद्धनगररि याखारगि मध्ययुगिन उह्राङबा कोठा स्याप्जि । दिम मुलिसे रंगरोगन लासाइ नोन चिम्हान्बा खालला बिसाम आरेमुबा । भान्साला टाटाजुगु, कार्पेटला ब्राइब्रुइजुगु, आदोबा डेङचि, चुरोटला ठुटाठुटि, खाइनिला नाइबा थोजुगु, ब्याङबा कापिजुगु । बस, चुनोन मुबा कोठाला सौन्दर्य । ल्हिबा सेम थोसि सफा लाबारि चुजि । ङामरि गिक्खे बोक्टो कापि, झ्यालग्याम स्योर्सि खाबा लाबातेन फ्रेङचिबा मुबा । ङ्हाच्छा लिच्छाला बो क्रोबा मुबा । मुस्किलसे ‘याम्बु’ बिबा क्राछिग डोजि । च्यामा दैनिकि ह्राङबा छोर्मुबा । जिग्यासा ङ्हाम्जि । सफा लाबारि ख्लासि डोबारि चुजि ।

चिठिरि चुह्राङबा ब्रिबा मुबा–
याम्बु ! एतेन ह्रो स्होबाए नोन तिनि दिङ च्युइ छ्योजिन्जिम । च्युइते उराठिला हिउदजुगु एला न्हानरि न्हाजि ङाइ । चु दसक गि एतेन ङाइ तिलाइ ग्रेन अपेक्षा आथान्नि । न्हा लाजि खाजिबाइ आज्याबा गेनोन । बस एसे आङसि चिजि ङा ब्राचिजि । चुह्राङ म्हान्मुबा ए थेन ङाला सम्बन्ध छिन थेन स्याला ह्राङबा । तार्ङा थेन क्युइ ह्राङबा । गिसेम गिला परिपुरक ह्याङ । एला मुला ओम ङा मुला ङा मुला ओम मि ए मुला । गिसेम गि आरेना अधुरो ह्याङ ।
चुह्राङ नोन डान्सि दिङ च्युइ एला क्रिपरि निना लाजि ङ्हाइ । जब ए फोहोरला डङगुरसे नाइसिकेन क्रामुबा । ङा फोइदान फो दिनम्हुन एदा टुसे नुहाइतिसि पिन्मुबा । जब ए बिजुलि, ग्यास, पेट्रोलला हाहाकारसे क्रामुबा क्रिङमुबा । ङाइ मुठिनाङ सातु बासि दोपरि छुप निमुबा ओम कामना लामुबा एला बोरि ह्याल थोप्गाइ । ए अब्यबस्था, अस्थिरता, कुसासनग्याम क्षत बिक्षत तासि सिमा क्याम्साङ ह्यार्मुबा । ङा जनआन्दोलन, जनयुद्ध तासि सागर ह्राङ प्योमुबा ओम एदा तोर तोर थिमुबा ।

ए म्हाङला दुनियारि छार छार अपार्टमेन्ट थेन कोलिनिजुगु कोर्सिकेन ब्रामुबा । ङा टु दोसि एला पैतालारि ङ्हेबारि दोमुबा । एला पजेरो कुल्बा चौबाटा बोसि हुइजुगुरि डलरला गाल्दाजुगु ब्योङमुबा । ङा हत्केला नाङ स्वाभिमान थोसि ए ब्राबा ग्यामजुगुरि ङ्हाम्बा मिख्लि ब्योङमुबा । तासाइ खाइओम याम्बु ? ए थेन ङा गिक्खेन ताबा ?

स्योङ ङ्हिला किनार ह्राङबा, ए सातान ऐस्वर्यला इन्द्र नगररि म्हारला खार्पारि ज्युनार लाला ओम ङा सातान अभावसे छ्योइचिबा जोडि गि लिखन्डि पैताला छेङसिकेन ब्राचिबा मुला । ङाइ स्होबा नोबा नोबा टावरजुगुरि गनतन्त्रला नाराजुगु ब्रिजि । च्योच्योला नाराजुगु ब्रिजि । ङाला मिख्लि ङ्हेसि स्होबा नाङसालरि सान्तिला पानसजुगु म्राजि एसे । तासाइ खाइ ओम याम्बु ? आपोनि ङाला ङ्होरि ब्रिबा अभागिला खिदिला दाग ।

ओइमा खुलामन्चरि याखारगिसे भासन लाबा थेजि बिबाकेन मुबा, ‘नेपाल गनतान्त्रिक ह्युल हिन्ना । चुरि मुतेबा च्योच्यो तातोला । खाल्से टु ब्योङसि मेहेनत लाला थेलान दिमरि ङ्हाच्छारि दिमरि छाक ङ्हि ज्याबा मिन्तोला । थेलिच्छा जेक्खे देन्बाला गनतन्त्र नेपाल ताला । ज्यानखाउ प्राङबो दुखि ह्युल्बाजुगु ङाला पार्टिला झन्डादिरि गोलबन्द तास्ह्युगो । चाबा, चिबा, क्वान्बा ग्यारेन्टि ताला ।’

ङा न्हाङगारदाङसे योरिन थे पार्टिला गेदिमरि दोजि । गेटग्याम्सेन म्हिजुगु लाइन ल्हागतिबा मुबा । ङाइ ङ्योइजि । गिक्खे उतर पिन्जि, ‘कतार निसेला हिन्साम लाइन चिउ ।’ ह्रेच्छाकरिन गनतन्त्रला म्हाङ सिसाह्राङ थिजि ।

तिला चुनोन हिन्न याम्बु छार नेपाल बिबा ?
ङ्यान्गो, स्यान्दोनोइ राप पाङला ङाइ । दिङ ङिस ङ्हाच्छा एसे ङादा याखारगि मोटरसाइकिल किस्ताबन्दिरि पिन्जि । तासाइ ङाइ दातेदोनान थे किस्ताबन्दि फासिजिन्बा आरे । मोटरसाइकिल तुयुङमा कवाडिरि चुङजिन्जि । तिनि ङाला मुतेबा मिनेटला टु किस्ताबन्दिरि चुङचिबा मुला । टुतेन ङाला म्हाङ, ङाला लिउ मुतेबा मुतेबा किस्ताबन्दिरि परप ताबा मुला । पाङगो याम्बु तिला चुनोन हिन्ना छार नेपाल ?

दारे, ‘ङा’ तिला लाउ पाङगो याम्बु ? थेनोन फोहोरि म्हिजुगुतेन फिरौति ह्रिबान जातुकु अपहरन लाबारि चुगो ? ओम केवा पिन्बा ह्युलला चटक्क माया ख्लासि बिदेस म्हानिउ ? तासाइ ङालाम पासपोर्ट स्होबारि आखाम । ङाला नागरिकता आरे । चु खाराङबा केवा पिन्जि एसे ङाला ह्युल ।

चु ह्युल ङाइ नोन हिन्ना । तासाइ, खाइ ह्युलसे ङादा ह्राङला बिबा याम्बु ? एदा फुर्सद आरे ताला । तासाइ एसे ङाला गन्थन ङ्यान्नोन तोला । तिनि एदा सिङगारप लाबा मुतेबा प्राङबोजुगु म्हासिकेन निजि बिसाम एदा खाल्से स्होला याम्बु ? तासाइ एमि राजनिति लाना लाना ब्यस्त मुला । खाल्छे सम्बोधन लाला ‘ङा’ ह्राङबाला बोबा ल्हुइदा ?

याम्बु तिनि ’ङा’ एतेन गिक्छा थेन लिच्छा रेम ङाला राप पाङबाकेन मुला । फुर्सद मुला बिसाम ङ्यान्गो आरे बिसाम आङ्यान्गो । ङा नाम्साग्याम बिसिस्ट श्रेनिरि एसएलसि पास लासि ग्रेन म्हि दोबा म्हाङ थोसि याम्बु खाजि । राजमार्ग कुनिरि सिङ चुङसि ङाला गिक्खे आमासे चुबिमा ल्हानान डोना लाबासि खाम्बा अबस्थाए नोन आरेमुबा । ङाइ जागिर चासि आमाला अभावला रेजुगु च्याङना लातोबा मुबा । अचानक आमादा स्हुसे स्याप्जि ।

राजमार्ग कुनिला मुतेबा सम्पति चुङसि आमाला उपचार लाजि, तासाइ आमाला रोग २० ला १९ आतानि । बिर अस्पतालला आइसियुरि आमा, ल्हुइ सिबाला दोसाधरि बोल्बाकेन मुबा । लाख सोम म्हाइसिकेन ङा सडक सडकरि कोर्जि । नेताहेन्से मन्त्रिदोना, ब्यापारिहेन्से उद्योगपतिदोना आमाला सा सोना लाबारि ल्हुइला भिख ह्रिसिकेन ब्राजि । तासाइ, याम्बु ङाइ तिलाइ नोन आयाङनि । सडकला किनाररि आमाला फोटो थान्सि भिख ह्रिबारि चुजि । रेदाङसे आमा सिकिस्त तासिकेन निजि । तासाइ ङाइ लाख सोम छ्योना लाबारि आखाम्नि । लिच्छारि सहरला आज्याबा म्हिजुगुतेन संगत ताजि । ह्यो लाजि, डकैति लाजि । फिरौतिला गे लाजि । तासाइ याम्बु, ङा ल्हानान गाइजिन्बा मुबा ।

लिच्छारि आमासे ङादा गिक्खेन लासि निजि । ङाला राप आमातेन तिजि, आमातेन जिन्जि । ङा खाला हिन्ना ? खाल्ला जा हिन्ना ? दारेम तिलाइ ङोसेबा आरे ङातेन । याम्बु स्यान्दोए नोन ङ्यान्ना ? अहँ ताजि एतेन ङ्यान्बा न्हाब्याङ आरे । च्याबा मि आरे । अनुभव लाबा मावनता आरे । ममता, मानवताम ओन्मान जंगबहादुरला पालारि ख्राङसि चाजिन्जि ।

न्हाङगार योरि कोठा भाडा आफानि बिसाम घरबेटिसे तिला लाला ? थे ङादा जेक्खे थाहा मुला । मैनबति जिन्गे लाजि । खाजिबाइ उपाय खाबा आरे । चु मैनबतितेन जिन्बारि म्याङसाइ तासेला । याम्बु, ङा एतेन आचि दारे । पाङपिन्गो चु मुतेबा सहरला नोबा नोबा दिमजुगुदा, ‘एदा स्होबा म्हि फोनाङ चाबारि आयाङना चोभारगाङ थासि निजिन्जि’ बिसि । तासाइ थेन्से थेसेला आरे । थेनिम….।’

थेलिच्छाला छिगजुगु चुरोटला ठुटातेन क्रोबा मुबा । सेम बोल्बारि चुजि । थे ङोआसेबा म्हि खाला मुल्ताला ? खानाङ निजि ताला ? कोठाला कुना कुनारि थेला मिन, मोबाइल नम्बर, ठेगाना म्हाइबारि चुजि । घरबेटिदा ङ्योइजि । ‘हप्ता गि ङ्हाच्छा थे झ्याल बोसि ह्यार्जि ।’
ङा स्तब्ध ताजि । चुह्राङबाइ नोन केवा ताला ? याम्बुरि ग्रेन म्हि दोसि चु ह्युल्ला मिन नोना लाबा म्हाङ थोसि याखारगि प्राङबो खानाङ निजि ताला ? संक्रमन दुइला ह्रान्दारि लिउ स्याङसि चु याम्बुहेन्से ब्रेबा याखारगि टुहुरो खानाङ निजि ताला ? संघर्सला ल्होलो म्रापजुगु ढकढकाप लाबा प्रयत्न लाबारि म्लेसि थे ङोआसेबा अन्जान म्हि खानाङ निजि ताला ?

ङा ब्लाप्सि सारि चिजि । ह्राङलान समस्याला गाङजुगु ख्यारख्युर कोर्बारि चुजि । कागजला प्लेनजुगुरि ङाला ह्राङलान समस्याला ल्होलो प्रस्नजुगु म्राङबारि चुजि । थे अन्जानला प्रतिबिम्ब चुरोटला ठुटाजुगुरि म्राङबारि चुजि । तिक्खुरि थे ङोआसेबा म्हि कोठाला गुरि चिसि ङादा ङोचिबाह्राङ छोर्जि । थेसे पाङबाकेन मुबा, ‘ङा काचला सिसा बोसि निजि । तासाइ ए खाजि ? ङ्यान्गो, चु याम्बु धुर्त, जालि, फटाह फ्युक्पोजुगुला लागि जेक्खे हिन्ना’ चुरि मानवता काउडिला भाउरि चुङला । चुरि स्वाभिमान टुडिखेलरि च्योसि सिचिबा मुला । चुरि स्वार्थ, पाखन्ड, ढोगिजुगु जेक्खे सोबारि खाम्ला । न्याय, स्वतन्त्रता, च्योच्यो, प्रेम, स्नेह, मुतेबा मुतेबा ओनमान जंगबहादुरला पालारि सिजिन्जि ।’

थे ङाला ओन्छाङ डोङ रेसि पाङचिजि । थे च्याना च्यानान ङा ह्राङबान म्राङबारि चुजि । ङा लोङजि । ल्हुइ सिरिङग ताजि ।

मोबाइलला घन्टि ङ्ह्याजि । ङाम कोहोरेगि ताजिमु । फोनसे फेतछेर्ना लाजि । फोन थिसि दोसि कोठा सफा लाबारि चुजि ।

तिनि ङा खानाङ खानाङ जुन जुन भिड थेन गल्लिजुगुरि दोला, थेनोन ङोआसेबा म्हिदा म्हाइचिबा ताला ।