याम्बु । नेपालि रास्ट्रिय क्रिकेट टिमसे आय आयरल्यान्ड वुल्भ्सलिसोला गोर ङ्हि क्लाङ्बाला २० सिरिज डाबा मुला ।
मिरे (मंगलबार) ताबा ङ्हिछा क्लाङ्बारि ७१ रनला डाबा तेसि नेपालसे सिरिज २–० से डाबा हिन्ना । चु ङ्हाच्छा लानिरे (सोमबार) ताबा गिक्छा क्लाङ्बारि नेपाल ६ बिकेटसे डामुबा ।
मिरे नेपालसे पिन्बा १९९ रनला लक्ष्य दाङ्बा आयरल्यान्ड १८.३ ओभररि १२७ रनरि माङ्यार थोन्मुबा ।
आयरल्यान्डका ओपनरङ्हि रोस एडियर डोहेनिसे आक्रमक तिमुबा । ङ्हि गुङ्रि गोर ङ्हा ओभररि ४३ रनला साझेदारि तामुबा ।
रोस १७ रन थेन डोहेनि १३ बलरि २६ रन स्होसि माङ्यार ताजि । डोहेनिदा ङ्हाछा ओभरला लिच्छाला बलरि सोमपाल कामिसे कप्तान रोहित पौडेलग्याम क्याच लाजि । रोस बिसाम कुसल मल्लला बलरि गुल्सन झाग्याम डुछा ओभरला ङ्हिछा बलरि चुङ्जि ।
थेलिच्छा कारमाइकल १८ रन थेन मोर्गन टपिङ २१ रनरि माङ्ग्यार ताजि । कप्तान निल रकसे १७ रन जेक्खे स्होबारि खाम्जि । गाभिन होए १ रन थेन फिन ह्यान्ड ५ रनरिन माङ्यार ताजि ।
नेपालसे आयारल्यान्डला लिच्छा सोम बिकेट बलरि किन्मुबा । सोमपालसे १९ छा ओभरला गिक्छा बलरि म्याकार्थिदा १ रनरि बोल्ड लाजि । ङ्हिछा बलरि बेन ह्वाइटदा सुन्यरि क्याच लाजि । सोमछा बलरि गोरेथ डिपेनिदा कप्तान रोहितसे १५ रनरि रनआउट लाजि ।
बलिङरि नेपालला कुसल मल्ल थेन सोमपाल कामिसे ३–३ बिकेट किन्जि । कुसलसे ३ ओभररि १५ रन पिन्जि सोमपालसे २.३ ओभररि १७ रन खर्च लाजि ।
थे ङ्हाच्छा किर्तिपुरला त्रिबि चेरि मिरे टस डासि गिक्छा ब्याटिङ लाबा नेपालसे ७ बिकेटला क्षतिरि १९८ रन स्होजि ।
नेपालला लागि गुल्सन झासे ४६ रन थुइजि । थेसे ३२ बलरि १ चौका थेन ४ छक्का छेप्जि ।
थे ङ्हाच्छा ओपनर ङ्हि कुसल भुर्तेल १६ बलरि २ चौका थेन २ छक्काला ह्रोरि २५ रन थेन आसिफ सेख ९ बलरि चौका थेन १ छक्काला ह्रोरि ११ रन थुइसि माङ्ग्यार ताजि ।
अनिलकुमार साहसे ११ बलरि २ चौका छेप्पान १२ रन थुइजि । कप्तान रोहितकुमार पौडेलसे २४ बलरि ५ चौका छेप्पान ३३ रन थुइजि । आक्रमक ब्याटिङ लाबा कुसल मल्लसे १३ बलरि १ चौका थेन ४ छक्का छेप्पान ३४ रन स्होजि ।
लिच्छाला बलरि माङ्ग्यार ताबा सन्दिप जोरासे १० बलरि २१ रन स्होमा बिबेक यादवसे नटआउट ७ रन थुइजि ।
बलिङरि आयारल्यान्डला म्याथ्यु फोस्टरसे ३ बिकेट किन्जि । थेसे ४ ओभररि ४२ रन खर्च लाजि । बोन ह्वाइटसे २ बिकेट या किन्जि ।
नेपालसे आइसिसि टि २० बिस्वकपल तयारिला लागि आयरल्यान्डतेन क्लाङ्बा हिन्ना ।
आयरल्यान्डतेन गोर ङ्हि टि २० क्लाङ्बा क्लाङ्बातेन नेपालि टिम चुनोन ङ्सिरेरि भारत निसेला मुला ।
किर्तिपुररि बिसाम नेपालला ए टिम थेन आयरल्यान्डला बुल्भ्स गुङ्रि नारे (बिहिबार) हेन्से सोम टि २० थेन सोमरे दिक्गि क्लाङ्बाला सिरिज तिसेला मुला ।
