सुन रोबा बु बाँझो थान्सि नाइबा म्ल्ह चाला
माकाइ मोठेला बोरि जंकफुट चाउचाउ चाला
म्हारला बोरि आजक डाल्टा थेन रिफाइन छ्युकु चाला
बरु म्हेहाल चुङ्सि नोन फिग्र्याप ह्युल निला
पाते थेन छ्याम्बाला बोरि बर्गर थेन पिज्जाका चाला ।
ङाला ह्युलरि !
सोझो सिधाला आरे ग्ला भ्रस्ट थेन ब्यान्बान तोला
अपराधिजुगुसे चलप लाबा चुह्राङ्बा ह्युल्सा स्यान्दो खानाङ याङला ?
ब्योनजुगु मुतेबा रेमिटेन्सला मिनरि फिग्र्याप ह्युल नोन स्युर्ला
चोर्से भासनरि बिसाम ल्होलो आतोबा ल्हानान फुर्ति ल्हागाब लाला ।
ङाला ह्युलरि ।
सातान निरिह दोसि स्यान्दोलान जेक्खे सुख ताक्तिला
म्हारला म्हान्ज्या थोसि क्रासिक्रासि भिखका ह्रिला
खिम्जेला गिद्दे मि परतिला सातान थे ताङ्रि
दान्तेन न्हाङ्स्या ठ्वाङ्बारि दिमन्हाङ्रिनका ङ्योइला ।
ङाला ह्युलरि ।
स्या, आइराक थेन जाजाकि न्होरिन ग्युर्ला
ग्यु ह्युल्बा थेन कार्यकर्तासे खाइमा लोप्ला ?
ह्रेच्छाकला सुख ङ्हाउ, दोत थेन लिउ म्लेला
सातान चुह्राङ्बा ललिपप ख्वाबाजुगुनमि टिकप ताला ।
ङाला ह्युलरि ।
दुनिया खानाङ दोजिन्जि दान्ते खेबा (पुरानो) दोङराप लोप्ला
ग्युइसेर (शिक्षा)ला मिनरि थोबारिन आखाम्बा छेला दोइ पुइपुङ्ला
खान्दामान ब्यान्बा जेक्खे खानाङ्ए आरे सेम सिल्ना लाबा ताङ
थेतासि प्राङ्बो थेन बेतिथि डान्सि ह्युल्बा थोबो छेप्ला ।
ङाला ह्युलरि ।
याङ्बारिन ख्लाजि नाम्सारि न्हा जन्ति न्हा मलामि
तासाइ नोन छेप्ला भ्रस्टजुगुदा पिर्के सलामि
आदो सिटामोलला गोलि प्राङ्बोला नाम्सारि
ह्युल्बा फोइदान, फुइबा नासि नोन कादे लाल गुलामि ?
ह्याङ्ला ह्युलरि ।
स्यान्दो ह्युलरिक्यारमि अपराधिजुगुदा फासिला फन्दारि युला
ह्याङ्लारि कादे ग्रेन अपराधि ओदे डेनला म्हाह्राङ न्हाला
अड्डा, अदालत, प्रहरि प्रसासन मुतेबा ग्युर्ला चुरि
फटाह, लुटाहा थेन घुस्याहादा कुरि ख्वाइसि ज्याबाचा ब्याङ्ला चुरि
ह्युङ्ला ह्युलरि ।
बेतिथि थेन भ्रस्टचारितेन महंगि नाआखाम्बा दोना ल्हेमुला
बेरोजगार ब्योनजुगुला पलायन ताबा दरला पारो क्रेमुला
तासाइ नोन मस्त ङ्हुबारि मुला सरका खाजिबाइ छार आरे योजना
आरे कलकारखाना खाजिबाइ चुसेनका आयस्रोत रेदाङ्से च्याङ्मुला
ह्याङ्ला ह्युलरि ।
बैज्ञानिक थेन बिधुवाजुगुदा हत्कडि थेन सुङरि टेप ल्हागाब लाला
ओम स्वाँठ, फटाहा थेन गुन्डाला नाइकेजुगुसेचा चु ह्युल चलप लाला
ह्युल्बा नोन ल्हानान स्यार लो, न्हुप ज्याङ क्यार दोबा मुला
देन्बान सुख, समृद्धि थेन बिकासला लागि बुद्धि खाइमा बुला ?
ङाला ह्युलरि ।
