आपाला काङ थेन धुलोला
छोन ओस्बा ओस्बान ताजि ताला सायद
छे थाबारि निबा दुइरि
खामआखाम (जबरजस्ति) छुम्बारि
आखाम्माहेन्से हाइ प्रेसरदा
सारि जुबा पाले जेक्खे तासि
लड्खडप तामुबा आपाला काङ
थोनाङला जिम्मेवारिसे
नाङ्बारि आखाम्बा
छे सिङला ग्रेनखेप्पा दोइसे
खाइमाइ कोल्टेङ ताना आलाबा आपाला थोबो
खाराङ लासि कोल्टेङ ताजि अचम्म
नाङ्बा प्लेबा आलाबा ओम आनाबा नोन
आपाला इमानदार ल्हे
खाराङ लासि लरबरब ताजि
खाराङ लासि म्हाजि
अन्याय लिसो रेबा काइ ?
अचम्म छोर्ला
हाइप्रेसर बिबा
भान्सा दिम तेत्थेबान आपासे पुइस्ह्युबा
छेला दोइबिमा ल्हिबाला चिम
हाइ प्रेसर बिबा
पुजिपतिसे श्रमिकदा पिन्बा
आज्याबा केबा बिमा
दुखदायि चिम
हाइ प्रेसर बिबा
सासकसे लाचिबा
ङ्हाप्पा (शोषण) बिमा स्हुखाबा चिम
ङाइ थेकुनु गोबा ।
आपासे साप्रातेन लाचिबा चेगाइ म्राङ्सि
लाए नोन क्रोबा चिम
थेतासि साप्रातेन ठिक्क छोन डिक्पा
आपाला काङ्से सा थुर्ला आदेबा चिम ।
खाइमाइ आब्लाप्बा आपाला मि
अस्पताल दोआम्याङ्मान
तिरमिर्याप ताबा, ब्लाप्पा, छोन आरेबा
ङाइ थेकुनुन म्राङ्बा हिन्ना ल्हुइरि ।
आमाला लिला लाचारिपन
हिन्ना ङाइ थेकुनुन हिन्ना
छर्लङ्ग म्राङ्बारि खाम्बा
आमाला लिरि स्याचिबा
यार्खाला सांकेतिक दोप खासु
ङाइ थेकुनुन च्याबा हिन्ना
मिला झ्यालग्याम
आपासे ङान्ना पर्वाह आलाना
ब्लाप्पा न्हास्ह्युमुला
ङाइ थेकुनुन हिन्ना म्राङ्बा
ङाला केवारि
आइसियुला ल्होलो यन्त्र थुइबा कक्षारि
म्हेर्सि स्ह्युचिबा
आप्पाला लिरि
ङाइ थेकुनुन हिन्ना हतार आम्राङ्बा
अभाब आवस्यकता आम्राङ्बा ।
हाइ प्रेसरमि अभाब आवस्यकताबिमा
ग्रेन चिम ङाइ थेकुनुन गोबा ।
ओम ल्हुइ सोबारि
ङान्दा सोना लाबारि
आपासे खाराङ लासि
संघर्स लास्हिबा चिम
ङाइ जामाकुनुन जाकि गोबा
आपाला पर्यावमचि डाबा हिन्ना
थाहा मुबा देन्बान डास्ह्युजि
हाइ प्रेसर बिमा ङाला आपाला
सेमला विस्वास झान कोङ्बा चिम
आपा थेनोन काङ्से
सादा नाङ्बान दिम दोस्ह्युमा
थाहा ताजि
तिनि आपाला केवा मानरि
ओम ङान्ना केवा
आपाजा डेन्बा मुला ।
आपा बिबा सोबाला
स्यान्दो अर्थ चिम
हिन्ना ङाइ जामाकुनुन गोबा ।
