उइमा ह्युल्ला ग्लेठिमसे
प्लेसि नाङ्सि थान्जि
ह्याङ्ला रिमठिम ।
आखेम्हेमेसे ह्राङ्लान सेम
दिमदिमरि छुम्सि थान्जि
ह्याङ्ला रिमठिम ।
तिल्दा आगोबा चु ताम
ज्योज्योआले नानाआङा
लोप्पाडोबा लासाइनोन ।
ङ्हाच्छाला ताम थुम डान्सि
जाम्बुलिङ क्योङ्नोन छार्न ल्हेना ल्हाइ
तामाङ ङोसेबा ।
चुरि तामाङ तामाङसेन
ह्याङ्ला रिमठिम
ङोसेबा आगोनि ।
ह्याङ्ला तामाङ चोहोकादे
गिसेम गि सेबा सोसि
ताम आडिक्नि ।
चुरि तामाङला रिमठिम
गोना लादोबा लामा बोन्बो ताम्बाकादे
तोरमार ताम लासि ब्राजि ।
दारे लिच्छा खाबा आलेआङादा
ह्याङ्ला रिमठिम
गोबारि गाह्रो ताजि ।
तिनि न्हाङ्गार
ह्याङ्ला नाम्सा दिमरि
म्हिला ह्युल्ला ठिम बाजि ।
ह्याङ्ला रिमठिम दोङ्राप आहिन
म्हिला ह्युल्ला ठिम
सेसीकेन निजि ।
तामाङला गोइलो गेटप थाआरे
म्हिला फेक तुन्बा
गेटप लासि ब्राजि ।
तामाङ बिसि ङोसेबारि
ह्याङ्ला रिमठिम
ङोसेबा ओन्दोजि ।
चुरि तामाङलान
चोहोकादेसे ह्याङ्ला ठिमरि
म्हिला ठिम दोङ्जि ।
छार गेताङ चुमा
म्हिला ह्युलरि स्होबा
डिउला बोतल थान्जि ।
आखेम्हेमेसे स्हेङ्सि खाबा
रिमठिमदा म्होकोन तामाङकादेसे
सेम न्हाङरि डान्तोजि ।
तामाङला रिमठिमरि
आइराक सगुन पोङ थान्सि
छार गेताङ चुदोजि ।
तामाङ ज्योज्योआले नानाआङा
म्हिला धर्मरि वाङ्जि ।
दारेम एसे तामाङ आबिउ या
एदेन तामाङला
रिमठिम दोङ्राप म्हाजि ।
गाङ्गिरी छार्बा तामाङथेमे
लेबा फेबा तासि ब्राजिलोम ।
दारेम ह्याङला ङोसेबा
तामाङ बिसि खाल्से ब्रिबा
ओन्बा लापिन्नोम ।
घ्याङलेख गाउँपालिका वडा नं ५, बुदुमचुली, सिन्धुली
