ल्हानान दिङ ङ्हाच्छा !
चोदे बाङसे आबितोजि बिले । च्युइ÷च्युइसे ङ्हि दिङ ङ्हाच्छा ङाला ल्हुइला याखारगि क्योलो केबा अबोध स्ह्योसे ङा केबा ङाला केवा साहेन्से तोङजाऔं माइल थारेङला याखारगि ह्युल निबा ज्याबा सन्देस बासि खाबा मुबा ।
सन्देस ओस्सोन देबा (सजिलो) ग्यालामग्याम खाबा आरेमुबा । ल्होलो कोसिसला रोरो दोसि रोबा मुबा ङाला ल्हुइला याल्ङा (डाली)रि । आलाङ ङाला खोबाला गागुरि छ्योनाछ्योना बैदेसिक कोरा म्हाङला म्हेराला मे दोसि चोल्जिन्बा मुबा ।
स्यान्दोजुगुला म्राङ्सि ङान्हाङ्ला ङा स्यान्दोजुगुदा उन्बारि तासाइ नोन मुला ग्यालाग्याम फ्याङ्सि निबा निर्नय निर्धारन लाबा मुबा सेमसेमरि । ङाला सेम न्हाङ्न्हाङ्ला योजना साकार ताना लाबारि थे दुइला परिबेस ङाला लागि अनुकुल तासि खाजि ।
अनुकुल परिबेसला फाइदा ब्यान्सि डोबाकेन लाबा कलेज निबारि ख्लापिन्जि । छ्योइला झोला ब्याङ्सि क्यारक्यार थारेङला म्हाङजुगुला झोला थोबा बाङ्बा (हिम्मतिलो) भरिया दोजि । ह्राङ्लान ल्हुइला ल्हा बेंसिरि बुबाकेन लाबा ज्याबा म्हाङजुगुला ।
ल्हानान क्यारछ्योङ मारछ्योङ लासि ज्याबान एजेन्ट स्याप्बासे ङा ओम ङाला ङेङ्गोरजुगु ताङ्जि । ताङ्बाजुगु युरोपेलि ह्युल रोमानियाला भिसा दोसि खाजि । न्होरसे आछ्योना दिमला जिन्सि स्हे खानाङए बन्धकि थान्सि बिबा आन्सारला न्होर छ्योना लासि पिन्जि ।
मुतेबा गे ताङला बैधानिक लिरि छ्योना लासि ल्हानान दिङ ङ्हाच्छा मुला ग्यालाम तासिकेन भाग्य म्हाइबारि, कर्म चुङ्बारि ह्राङ्लाहेन्से ल्हानान थारेङ बोर्बा मुबा ।
खानाङए अप्ठेरो किन आतोनि । दोतोबा ग्लारि दोजि देबारिन । नेपाल हेन्से थोसि बाबा म्हाङजुगुदा छ्योना लाबारि रोमानियाला सहर सहररि जतनसे सम्हालाप लासि ब्राबा कोसिस लाचिजि ।
ङ्हाच्छा दोबा ह्रोजुगुला ह्रोरि थेर्ला चिबाथुङ्बा गोबारि ल्हाना कस्ट आतानि । दुइतेन छ्योल्सि खाबा गेजुगु देबान स्विकार लासि ङ्हाच्छा वाङ्चिजि ल्हुइला ल्हामरि । दिङ ङ्हिला मुबा गे लाबा दुइ । दिङ ङ्हि वाइमाहेन्से दोसि नबिकरन लाजि गे लाबा दुइदा ।
गे लासि न्होर स्होबा जेक्खे आरेमुबा ङाला लक्ष्य । लक्ष्य मुबा युरोपेलि ह्युलला पिआर किन्बा । ङा चिबा ह्युलग्याम वर्क परमिट कार्ड याङ्मुबा । थे कार्ड उन्सि युरोपेलि खान्दामान ह्युलरि निबारि अनुमति पिन्मुबा ।
ह्रोजुगुग्याम्से पिआर ताबान पासपोर्टला लागि देबान (सहजै) आबेदन पिन्बारि डिक्बा ह्युल पोर्चुगल हिन्ना बिसि थाहा याङ्जि ।
दिङ ङ्हि वाइना लाजि रोमानियारि । थेलिच्छा पोर्चुगलरि निसि गे लाबा ओम ह्राङ्ला लक्ष्यरि दोबा म्हाङ थोसि निजि पोर्चुगल, चुनौतिसे प्लिङ्बा अप्ठेरो ग्यालाम नाङ काबारि चिबा ल्हानान गाराजुगु दाङ्सिकेन ।
देबा आरेबा थेर्ला चिबा । गे याङ्साइ नोन बिबाते छाबारि आखाम्बा मुबा । गोङ्मा गोङ्मारि आस्वासन जेक्खे बोलाबा छारमाङ्ग्यार ह्युलरि चिबाजुगु ह्राङलान नसलला एजेन्टजुगु च्याङ्ना आरेमुबा । चुह्राङ लातोला, ओह्राङ लातोला । कादेन ! तोबा स्युगुजुगु सक्लोन ह्राङ्से स्होसि थेसेन पिआर थेन पासपोर्ट पिन्सेला ह्राङ्बा ताम लासि आज्याना लासि ठकतिमुबा ।
ल्हानान चुनाउति नासि, ख्रेन्बा फुइबा पर्वाह आलाना सेम थेन तिङ मुबा छोन्बो मेसिन दोसि ल्हुइला उर्बर थेन महत्वपुर्न दुइ क्याफेला कपहेन्से बारला वाइन ग्लास कादे ख्रुजि ख्रुजि । ओदे ल्हानाम ङाइ ङाला लि नोन आख्रुनि ताला ।
जैबिन जैतुनला दोङला स्याहारहेन्से स्टाबेरिला घारिदा कादे चेगाइसे क्वाजि कादे । ओते ल्हानाम ङाइ ह्राङ्लान व्हारिला माकाइ आक्वानि ताला ।
दुइला नियम हिन्ना वा लाला नियति, सोम्छा (संसार) जाम्बुलिङ्रि परतिबा म्हिजुगुला ल्हुइ नोन ताहुललान मुला । लिच्छारि खाबा खात्दामान सुख दुङाल तामजुगुदा नातोबा (सहनुपर्ने) देबातेन सहनसिलताला नमुना दोसि ।
क्यार्से दिनि फेबा दिसारिक्यारलाङाला ह्युलहेन्से दिनि नुप्बा दिसारिक्यार परतिबा तोङ्जाछा माइल थारेङ्ला ह्युल्ला स्युगुलिरि थेनोन ह्युल्ला म्हि दोबा ङाला रहर ।
‘बठ्याइ हिन्ना वा ङाला मुर्खता !’
ल्हुइला ल्हानान दुइ खर्च लासि स्याप्बा मुला पिआरतेन थेन्ला ह्युलसे पिन्बा पासपोर्ट । पिङ पासपोर्ट थोसि खाबा ङाला यारि वाला छोनला पासपोर्ट स्याप्बा मुला । ह्राङ्लान ह्युलरि नितोमा भिसा किन्सि नितोला, अध्यागमन दस्तुर फासि ।
ल्हुइला च्युइसे ङ्हा दिङ खर्च लासि याङ्बा थेन्ला ह्युलला आइडेन्टिसे ल्हानान ङ्हाच्छा थान्बा लक्ष्यम छ्योबा मुला ङाला । तासाइ ल्हानान दिङ डिक्सि ल्हानान बोक्टो स्होबा ङादा थे याङ्बा पिआर, पासपोर्टसे ताङ्बा आहिन, स्हु पिन्बा छोर्बाकेन मुला तिनिन्हाङ्गार ।
ङाइ थेन्ना ह्युलला ग्योइ पाङ्साइ नोन, ङाइ फातोबा कर थेन्नान सरकारदा फासाइ नोन, थेनिकादेसे चाबा ह्राङ्नोन चाबा चासाइ नोन खाइमागि खान्दामान झेलप लातोबा ङ्योइबा (प्रस्न) सातान गिक्खे ताला– ‘व्हेर आर यु फ्रम ?’
दिक्क ताबा मुला चु ङ्योइबाला जवाफ पिन्ना पिन्नान ।
चु ङ्योइबा ङातेन च्योबा याङ्ला । ङातेन ङाला ल्हुइह्राङ्नोन लासि । ङाला यारि थेला ह्युलला म्हि हिन्ना बिबा प्रमान मुला । सबुत मुला । तासाइ नोन ङाइ थेनिकादेदा ङाला ह्युल चुनोन हिन्ना बिबा हैसियत आयाङ खाइमानोन । खाइमादोना चुरि चिगाइ ङा । पेबा मुला, तिल्दा खाजिमह्राङ छोर्ला ।
म्लेजिन्बा (भुल) मुला । दारे ङाइ थे उर्बर रेजुगु दोसि बाबारि आखाम थे उर्बर दुइ ह्राङ्लान ह्युलरि खर्च लाबारि खाम्गाइ ।
खाइमागि म्हान्ना तिला ङाइ गेल्ना (गल्ति) लाबान हिन्ना ?
गेल्बान हिन्साम प्रायस्चित लाबारि खाम्ला ओम ङाइ चु केवारि ?
छ्योआछ्यो ङाला ल्हुइ गाङ्साल मिनजिन्मुला । गोल्छे गोल्छे मिन्बा ल्हुइदा तेन्बारि थाँक्रो तोला । तेन्बा ल्हागाब लाबा थाँक्रो छ्याम ल्हुइ थोसि दोसिखामा तिला बिला बिबाजुगुसे बिबा लोङ्बा बिरुवा ल्हेबाकेन मुला गाङस्योङरि ।
ङाला चु बठ्याइपुर्न म्लेबासे ङाला बिबाजुगुदा तिलाइ भाउतिक सुबिधा पिन्बारि खाम्जि ताला । ङा ह्राङसेन आपाला आपासे जुबारि आम्याङ्बा सारि जुम्याङ्जि ताला । ङाला आमासे लोप्बा बिमा फेबा ग्योइ पाङ्बारि सेजि ताला । तासाइ थे मुतेबा ताङ्बा तामजुगुला छोनसे ताङ्बा च्युर्बारि आखाम्नि ङाला सेमदा ।
थोबोरि गोक्टोक चिबा क्रास्याला कुल्बा ङ्यान्बारि आङ्यान्बा आम्राङ्बा ओम अनियन्त्रित सेम दुइदुइरि मिला ग्यालाम ताबान मिख्लि दोसि ताइपिन्ना, म्लेबाजुगुदा डान्सि ।
दुर्गम नाम्साला ग्यालाम ताबान किन्बा ल्हुइला ल्हाम मोहम्मद माथिरला बिकसित ह्युल मलेसियाला ग्यालाम तासि युरोपेलि ह्युलला ग्ला ग्लारि दोजि । दुङाल याङ्जि । सुखदा ख्वाइजि । परिस्थितिसे बाबा मुतेबा चुनाउतिदा सफलता डान्सि सम्झाउता लाजि । ओम ब्राचिजि ।
छेङ्सिकेन (डोर्याएर) ब्रापुङ्बाकेन मुला ल्हुइदा दुइला फेरो चुङ्पुङ्सि ।
तिल्माओइमा आयाङ्ते तिला तिला ताला बिबा पिआरला छिगजुगु पुजु दोसि ग्रोप्बाकेन मुला, खानाङ खानाङ न्हाङ्रि ।
सुखसयलला च्याङ्बा आरे । रहस्यमयि क्युइला संसार कोर्सि छेम (मज्जा) ब्यान्बारि याङ्बा मुला । मिन नोन आसेबा ल्होलो ज्याबा परिकार चाबास्हे चाबारि याङ्बा मुला ।
ङा ओइमादोना स्कुले क्वानरिन छ्योङ्सि छ्योङ्सि म्हे छासिकेन ब्राबा ह्रिरि । बिङ्कुलिङ नामेला दरबार दोबा सतिबनला पोथ्रो । पामे ढुक्कुरला जाङ मुबा फडिमला दोङ । क्वान डेबा लासि क्यारदोना निसि थुबा बयर घारि आरे चुरि ।
स्होसि चिबा ल्हाना आस्चर्यजनक मुला ल्हानान ग्लाजुगु चुरि थेन्ला रहरसे स्होबा सहररि । ङाला ह्युलरि आस्होना ह्राङनोन स्होबा ल्होलो चुह्राङ्बा स्हे थेन ग्लाजुगु मुला । थेदा सेम लासि नोन म्हिजुगुसे स्होबारि आखाम । बिडम्बना मुतेबा मुतेबा खाप्पा मुला ।
ल्हुइ मिन्बान मिन्बान निमा हेन्से गोल्छे थाहा याङ्बा चिम थाहा तातोबा तामजुगु । बिले दातेला ङा ङ्हाच्छारि चुह्राङ्बा ताम सेमला गुरि फुइबा हिन्साम चुरिक्यार खासेला आरेमुबा, थेग्याम्से चोर्से निसेला आरेमुबा ।
दाते पछुतो लाब बिमा तिलाइ लाबारि आखाम । ल्हुइ ब्योन मुमा डान्सि डान्तोबा तामजुगु । दारे गोल्छे साम्सिकेन ताइबा दुइरि डान्बाचिम ङ्हाच्छारि डान्तोबा तामजुगु ।
ङातेन दारे खेप्पा नाख्रुसे तेन पिन्बा बोक्टो ल्हुइ मुला । ओम पिआर । दोसिनिला केसि छार्बा ग्लारि । ग्लोबल भिलेजला ब्रोइ थोसि ग्लानिला पछ्याउरिसे लि गाप्बान ।
स्हेर मुला, ङाइ ख्लासि खाबा ग्यालामसे ङोसेला वा आसे बिसि । वाति खार्सि मार ब्योङ्बा स्योङ्ला क्युइ लिफ्टिङ लासि दिमला ख्राङ्गारि धारा दोबा मुला रो । थेनोन धारारि स्योल्ला तिल्माओइमा लाबा जातुकु गेल्बाजुगुदा (गल्ती)।
दो:बा : अगाध
