खाङबा लला दुइरि स्योरि दोङला बाकादेग्याम सित तपतप ताइबान मुबा ।
इर्से उर्से गाङकादेरि केर खसु डन्डुन मुबा स्ह्योला दिनिला स्हेर फिरकेप खबारि आखाम्न बोल्बान बोल्बान म्राङमुबा । कप ङि सोम च्या थुङसाइ ङानिला ल्हुइरि डोइ आरेबा मकवानपुरला गोरगि तामाङ नाम्सा सुन माया ह्रोदेन ङा कोरबान कोरबान ब्राजि । तामाङकादेला गोरगि रुङबा नाम्सा सेम फुर ताङमुबा ङानि ङिला ।
ङयासेला रिमरिम ताजि, म्हि ङोआसेला ह्राङ ताजि सुनमाया थेन ङा दिमरि दोसि कान चासि लिच्छा सुनमायादा तिलाइ तामकादे ङयोइबा सेम तामु । थे बिसाम डोबारि ओङबाइगेन मुबा ङादा चु नाम्साला फेरि तिलाइ ताम पाङगोले ङाला तामसे थेला लिरि पोबाला सकेत खाजि । खइ तिल ताम पाङसे ह्राङदा चुरि ङाच्छा गोर गि फ्युक्पो ज्यार्दि मुबा बेनान तामाङकादे थेलान गे लासि छाक टारब लामुबा । ङानि जत्तुकु मुबा दुइरि ङाला आपा आमानोन थेलान गे लासि ङानिदा छार्ना लाबा हिन्न ।
चु नाम्सारि तामाङकादेला ल्हानान दुङाल्ला राप मुला थे ह्रोला तामसे ङा अचम्मा ताजि ह्याङला ह्युलरि थेह्राङबा ल्हानान ग्लारि तामुला तर थेदा ह्याङसे पोबारि खाम्दोला ङाइ थेलान तामरि थुइबान पाङजि । लु पाङो तिनि एसे चु ताम आपङदे दोना ङा म्हेर्नोन आम्हेर ङाइ घुर्कि ओन्जि थेदा । ङानि जत्तुकु मुबा चु नाम्सारि गोरगि ज्यार्जि थे ताम दोलोन पाङजि ङाला आपा आमा स्ह्यो ङ्यासे थेलान गे लाबारि निमुबा ङा दिरि आले आङाला लोप्पा डोबा चाबा थुङबा ल्हनान गार्हो मुबा । आमा रामेदा छे थाबा बेनान गे लमुबा तिरेकुनु आमा क्राबान क्राबान दिमरि खाजि ङाइ आमादा ङोइजि । आमा ह्राङदा खाल्से तिल लाजि ? दारेम ङानिनोन ग्रेन तासिजिन्जि एदा क्राना लाबादा थेदानोन क्राना अलादे आख्ला ङाइ बोमोसे तिलाइ आम्राङनि, आहिन जामे ङादा तिलाइ ताबा आरे ए कुटिसि टिउ ह्राङला जाँचला तयारि लाउ आमासे पाङजि । आहिन आमा दरेम ङाइनोन ल्हानान ताम गोबारि खाम्ला । ङादा थाह मुला एला सेमन्हाङरि मेला बोन लुङसि टिमुला, चुदा आसाइनि विसाम खजिबाइ दुइरि दिबारि खाम्ला । आमासे बेनान ताम आलुना पाङजि ए ग्रेम दोसि जिम्जिम ङाइ तिनि जेक्खेन थाह याङजि । ङ्याङो जामे तिनि स्ह्योरि एला एस. एल. सि. ला लागिरि जक्कि टाङ्गा र्हिमुबा ङाला यारि चुङसि एदा कादे टाङ्गा तोला पिन्ना बिबान ङाथोरि आज्याबा गे लाजि । टाङगानोन आपिन्जि । खलाइदा पाङजि बिसाम एदान आज्याबा ताला बिबान तोजि थेसे । आमा ङाला कुरि ख्लुब तासि क्राजि ङादा ल्हानान बोमो रेजि दात्तेनोन निसि थेदा साइगे म्हान्जि ।
ङाइ दारेम चु ह्युलबादा पोनोन तोला सेम सेमरिन आठोट लाजि । ङा एस.एल. सि. जिन्जि गिक्छा श्रोणरि पास ताजि । आपा आमा ल्हानान ताङजि उच्च शिक्षा डोबारि टाङगा आरेबा ङा दारेम याम्बुरि डोबारि निबारि तयार ताजि । न्हाङगार दाङसे दोसिन थे ज्यार्दिला दिमरि टाङगा पाङबारि निजि ङादा म्राङसि थे मुसुक्का नेजि तिनिमि जामेनोन दोगाजिम । ङादा थेला लि च्यासिम आबा आरेबा तर तिल लासे ङानिदा टाङगा तोबामुबा आमसे पाङजि च्यागो म्हेम्हे दारेम याम्बुरि डोबारि पुइदोजि चुसे एस.एल.सि.पास लाजि जाग्गि टाङगा दोन्दोजि ङानि खेप्पा खुइसे ह्राङला छे फाला म्हाले । थेसे ङेबान पाङजि ओ हो ङाइ तिनिदोना चु ग्लारि तामाङ डोबाम म्राङबा आरेबा झन तामाङला जामेसे एस.एल.सि. पास लाबा रो हहह बिबान ङेजि । ङा कुटिसिन टिजि । रेच्छागि लिच्छा ङादा थेसे दिम न्हाङरि ओइजि, ङा सुइसुइ निजि थेसे म्राप डुङजि च्यागो नानि एदा डोबारि कादे टाङगा तोला ङाइ पिन्ना तर ङाइ बिबा गोरगि ताम ङ्यानतोला ङाला ङामरि टिबान पाङजि । तिला ताम खाह्रङबा ताम ङा डोङ रेजि । दोसिन थे ङेबान पाङजि ङादा एला लि स्हयालसे ल्हानान सेम नाबारि आखाम्नि तिनिला म्हुन तिरे ङादेन टिउ अनि नाङगार टाङगा बोर्सि निउ । च्यागो एसे ङादा थेराङबा ताम म्लेसि सुत्तान आपङो ए ह्राङबा पापिदा दारेम चु ह्युलरि सोबा तिलाइ अर्थ आरे । तिल्दा थेह्राङ पाङबा खाउ ङादेन बिबान ङाला या छेङबारि माइजि, ङाइ थेदा प्लिङनिना हुइसि पिन्जि एसे ङादा तिलाइ लाबारि म्हाइजि बिसाम एदा कानुनसे ख्लासेला आरे थाह मुला ? एसे कादे नानाआङा आमाकादे क्राना लाबा थेनिकादेला मिख्लिसे दरेम एदा क्रोला ।
ङ्यानो ङा गोर गि लोप्पा डोबा तामाङला जामेकोला हिन्ना । तिनि दोना एसे चु नामसाला नानाआङाकादेदा शोषण लाजि ङादा थाहा मुला । ङयानो दारेम थेला हिसाब किताब तिनि एदेनछ्याम आकिन्दे आख्ला बिबान ङाइ थेला खारेरि छेङजि । दिम न्हाङला हल्ला खल्ला थेसि नाम्साबाकादे ह्रापह्रुप ताजि ङाइ म्राप ठोङजि थेदा डुइसि नाम्साबाकादेला गुङरि बोर्सि थान्जि दारेम चु पापिदा ह्राङनिसे सजाय लाउ । थे क्रिङबान पाङजि ङादा तिनिदोना खाजिबाइ तामाङसे लिगाङ लासि च्याबारि खाम्बा आरेबा । चुसे ङादा साइगे लाजि बिबान चुदा नाङगेझार लासि साइगो बिजि । थेनोन दुइरि ङाइ आमाला यारि मुबा हाङसुसे थेला सुङरि छेक्सि पिन्जि लिग्याम का ताइजि थे सारि प्लिङनिजि ।
थेनोन दुइरि म्रिङकोलाकादे डिक्सि कोन स्युसि युङबान युङबासे छेक्सि छेक्सि साइजि । थे लिच्छा क्योङनोन लिरि ताङबा दिनि फेजि ङानिला नाम्सारि । ङाला सहासदा म्राङसि ङादा डोबारि बेनासेन ह्रो लाजि कोइसे रा चुङजि कोइसे नागा चुङजि ङाला सेम ल्हानान ताङमुबा थे दुइरि । सुनमाया ह्रोला तामकादेमि ङाइ म्हाङरिन ब्रिसिन टिजिम कापिला पानाकादेरि ।
काभ्रे
