नेपाल तामाङ घेदुङ, कास्की जिल्ला समितिसे डोङ्बा लालबहादुर मोक्तानला डान्बारे तेन्जि । तामाङ घेदुङ कास्कीसे चैत्र २६ गते ह्रोला योगदानदा डान्सि डान्बारे (स्मृति दिवश) तेन्बा हिन्ना ।
तामाङला ग्योइ, गोइलो, रिमठिमदा छार्ना, ल्हेना लाबारि थेला महत्वपुर्ण योगदान मुला । २०४६ सालरि ताबा नेपाल तामाङ घेदुङको सोमछा राष्ट्रिय जोम्नाहेन्सेन ह्रो सक्रिय मुबा । मोक्तानलान पहलरि कास्की जिल्ला ग्याम ईन्द्रबहादुर डुम्जन, श्यामबहादुर मोक्तान, कृष्णराज रुम्बा, कुमबहादुर योन्जन छ्यामरि १५ जना म्हिजुगु याम्बुला जोम्नारि बो किन्बारि दोमुबा ।
याम्बुरि ताबा घेदुङला सोमछा जोम्ना ग्याम दोसिमाम कास्कीरि दोगामाहेन्से मोक्तानसे कास्की जिल्ला तदर्थ समिति स्हेङ्मुबा । ब्योनजुगुदा ङ्हाच्छा बोर्तोला बिबा ह्रोला सेम मुबासे मुल्मिरि चिसि ह्रोसे दीर्जमान लामाला चोहोदानरि १५ मुल्मि मुबा तदर्थ समिति स्होजि । दीर्जमान लिच्छा कतकबहादुर डुम्जन थेन लेखबहादुर डुम्जन संयोजक दोजि । तासाइ तदर्थ समितिदा पूर्णता पिन्बारि आखाम्नि ।
गेताङरि लामाजुगु
स्यान्दोसे गे लाबारि आखाम्माहेन्से ह्राङ्नोन कार्यबहाक चोहो दोसि लालबहादुर मोक्तानसे गिक्छा कास्की जिल्ला जोम्ना लाजि । जोम्नासे कृष्णराज रुम्बादा चोहो दाम्सि कार्यसमितिदा छ्योना लामुबा । चुह्राङला लासि मोक्तानला मिन कास्की जिल्लारि तामाङ घेदुङ स्हेङ्बा गान्बाला लिरि सातान डान्चिबा मिन हिन्ना ।
कास्की जिल्लाला दातेले चोहो भक्त तामाङसे सुङ्जि, ‘ङा जाजान मुबा थेदुइरि नोन लालबहादुर मोक्तान समाजसेवी मुस्ह्युमुबा । नाम्साग्याम पोखरा सहररि वाङ्बाजुगुदा ह्राङ्ला गच्छे आन्सार गेम्हासि पिन्बा लामुबा । थेतासि ह्रोला दिमरि सातान म्हिला घुइचो तामुबा । मोक्तानसे चुर्ला तामाङजुगुदा गिक्खे लाबा गे लाजि । चु योगदानदा ह्याङ्से खाइमाइ म्लेला आदे ।’
मोक्तानसे नेपाल तामाङ घेदुङ, कास्कीला गेदिमला लागि ह्राङ्ला दिमरि सोतेदोना अफिस कोठा पिन्जि । गेताङरि खाबाजुगुदा ओस्बान चिया थेन दिगु ख्वाबा गे लाजि ।
ह्युल थेन ह्युल्बाला सेवा लाना लानान लालबहादुर मोक्तान ७२ दिङरि क्षयरोला करण बि.स.२०५७ चैत्र २६ गते डोङ्बा हिन्ना ।
