कुदापला ङामरि भुसुक्क म्हेर्बा गोर ङ्हि लाइनुदा फिरि कोठारि बोर्सि नाइपिन्सि दोबा जुना तामाङसे दाइबा, चाबा चिबु ताङजुगु पोप लाजि, थेदा प्लास्टिकला याखारगि ग्रेन बाटारि युजि ओम राला खोर ङामरि बोर्सि थानपिन्जि । थे चिबु ताङजुगु दातेन म्याप्से वा न्हाङगार योला लागि थान्से ? ह्रेच्छाक थेदा दोमन ताजि ।
गिक्खे सेमसे बिजि, ‘दातेन म्याप्को जुने, दातेन म्याप्को, टन्टान खलास लाउ, चाबा थान्जि स्यान्दोदा गे थान्जि ह्राङदा बिबा उखानमि थेबान मुला नि ?’
चु तामदा जायज म्हान्सि थेह्राङ नोन लाबारि जेक्खे म्हाइबाकेन तिला मुबा थेला स्यान्दो सेमसे तुरुन्तान बिजि, ‘आ… तिलाला हतार, न्हाङगार योरि नोन सिकारला बन्दोबस्तिरि खटप ताबा पिपाला सिपाहि ह्राङ खाजिबा ग्लेला पाल न्हान्तोबा मुला ओम एदा, तिनिन, दातेन मुतेबा गे जिन्बारि ?’
ह्राङला सेमसे पिन्बा ङ्हाच्छालाबिमा लिच्छाला ग्रोइ सेम निजि थेदा थेदुइरि । हिन्बाइ नोन हिन्ना, गोरङ्हि लाइनुजुगु थेन ह्राङ लासि गोरसोमला जाजा थेन छरितो कान भान्साला ताङजुगु सफा लाबारि कादेन दुइ तोबा हिन्ना ओम ? दाते लासाइ नोन न्हाङगार लासाइ नोन, ल्हानारि थेनोन घन्टा गाङसाल ल्हागतिबान म्हाले ।
थेलिच्छा चिबु ताङ पोप्बा बाटादा खोरला ङामरि ओस्सोन ख्लासि कुदापला कुनिथामा खाजि ओम थेरि थान्बा परालला चकटिरि ब्लेक ख्याजि । ब्लेक ख्यापा ताङरि ल्हुइ ओदे स्थिर थेन संयत आताबा म्राङसि थेसे ह्राङला फो थेन पुठ्ठारि जाकि ल्हानान छि वाङबा ह्राङबा म्हान्जि । जाकि खिन्ना ताजि ।
अधबैसे दिङला जस्केलारि दोगे लाबा ह्राङला गोसे आड म्हाइबाह्राङ छोर्जि थेदा । कुल्दुम दिला चकटि ल्हेसि ङामला थामदोना बोर्जि ओम थेरि डेङसि चिजि । थामरि डेङसि मि च्युम्मा लासि चिमा ल्हुइदा जाजाकि सुबिस्ता ताबाह्राङ ताजि । तासाइ, थेलिच्छा नोन तत्कालला लागि लाबा खाजिबाइ गे आरेबा म्हिला ह्राङबा अन्यमनस्क लिरि म्राङजि ।
ओतेन दुइरि तिक्खुरि थेदा तिलाइ दुइ ङ्हाच्छा गोर ङ्हि सोम सर्को जेक्खे छेङसि सेसि चौबन्दि आङरेला न्हाङला पत्ररि जाबा खाल्तिरि जतन लासि थान्बा चुरोटला ठुटोला डान्बा खाजि । चुरोटला थे ठुटोदा डान्माहेन्से लिरि च्याङना ताङबाला तरङग ल्हेबा म्राङबा थेसे थेदा खाल्तिग्याम तेजि ओम कुदापरि मुबा मेला फिलिङगोरि चोल्सि सल्काप लाजि ।
थेलिच्छा चिम्सा मि, तार लि थेन थाम्मरथुम्मर रुङबा ल्हुइ मुबा चु रापला गिक्खे नायिका जुना तामाङ, नेपालला ल्हानाह्राङबा प्राङबो अम्मलिजुगुला गिक्छा दाम्बारि परतिबा पाइलट मार्का सस्तो थेन खरो चुरोट धित सिबा लासि छेङचिबा म्राङजि । गिक्छा सर्कोरि छेङबा चुरोटला म्युगुदा तुरुन्तान माङग्यार आतेना खारेरिक्यार खानाङए कालकोल लाजि ओम ह्रेच्छाक लिच्छा नार्तुला ङ्हि नोन गालग्याम्से फुरुरु लासि ब्याङचिबा मुबा । साग्लो थेन ठुटो लासि थेसे थेकुनु थुङगे लाबा चुरोटला थे ब्रेछा खिल्लि मुबा ।
दिनेस सरसे ल्हानान रेम बिबा मुबा, ‘ह्राङला सुलुत्त परतिबा, मसिनो ह्यो थेन माझि जुम्बिला गुङ ङ्हेप्बा चुरोटला खिल्लिदा पाबा सुङफिदोना दोना लासि थेला ह्रेङबा सर्को छेङबा दुइरि ए गज्जबला सेक्सि म्राङला ।’ सरसे बिबा चु ताम दाते डान्मा थेला तिङ तिर्याम ढक्क ताजि । ओस्सोन फिस्सा ङेजि ओम चुह्राङ लासि चुरोट छेङमा तिला ङा देन्बालान सेक्सि म्राङमुला ओम ? सेमरि रेबारि म्हाइबा थे प्रस्नदा गुङरि प्लेन ताना लापिन्जि ओम टोलाप तामाह्राङ ताजि ।
चुरोट ह्राङबा नाथे पदार्थतेन थेला ल्हुइला मुतेबा बिमा ज्याबा डान्बा थुइबा ताम खाराङबा खाराङबा आडिक्बा थेन आनाउठो ह्राङ छोर्ला थेदा, दातेइ नोन । तासाइ, थे मुबा थेला ल्हुइरि खाबा याखारगि अदभुत दुइ, थेदुइरि थेसे ह्राङला ल्हुइरि खाबा गिक्छा ह्रेमकोलाप्रति केबा आउदिन घनिभुत रतिरागात्मक आकर्सनला थेह्राङबा तिब्र अनुभुति लाबा मुबा, थेदा छिगरि ठिकतेन उतार लासि बर्नन लाबारि सम्भब आङ्हाम थेदा ।
थेसे ह्राङला तिङला अन्तस्तलरि ल्हानान जतनला छ्याम छुम्सि थान्बा गिक्छा प्रेमला डान्बा–तरङग दोसि तिर्याम छोन्बोह्राङ तासि चेतनारि ल्हेबारि चुमाहेन्से थेला पाबा दार्बा सुङफिरि ओस्सोन मुस्कानला जाबा धर्सो म्राङमुबा मुतेबा रेम । थेदुइरि नोन ताजि थेह्राङबान । थेसे तिर्याम ह्रेङबा सा बुन्जि ओम ह्राङला डान्बाला कोसागारग्याम ह्राङला ल्हुइला थे मुतेबाबिमा महत्वपुर्न दुइदा माङग्यार तेजि, थेतेन ह्रेच्छाक क्लाङबा चेस्टा लाजि ओम थेसे पिन्बा आनन्दला सरोबररि ह्राङदा चुर्लुम्मा ब्लुम्जि ।
जुना तामाङला डान्बाला ढकुटिरि दुख, बिरह थेन बेदनाला आज्याबा तामजुगु नोन ल्हाना मुला । तासाइ, दिनेसहरि सरतेन ताबा गिक्छा ह्रुप थेन चुरोटला प्रसङगदा बिसाम थेसे ह्राङला डान्बाला एल्बमरि मुबा मुतेबा बिमा जेबा तस्बिरला लिरि तिङरि सजाप लासि थान्बा मुला । जुनादा ङ्हाम्ला, थेला तिङला न्हाङला तहरि कोरप ताबा थे तस्बिरला रङ थे आसितेदोना फिक्का तासेला आरे ।
खिरिलो ज्यान मुबा, सामान्यबिमा जाकि नोबा, अधबैसे ह्राङ म्राङबा इटेबेसिला गौरेस्वर हाइस्कुलला अंग्रेजि सिक्षक दिनेसहरि नेपालि सरतेन जुनाला म्राङबा ह्रपताबा तिक्खुरिन ताबा मुबा । थे ङ्हिलान ल्हुइला मार्गचित्रदान पुरान पोपिन्बा थे अदभुत दुइला डान्बा जेक्खेसे नोन जुनाला तिङरि रोमान्चला तरङग रेला दातेइ नोन ।
रोसि स्योङला प्योबाग्लारिक्यारला याखारगि जाजा नाम्साग्याम गिक्छारेम पनौति बजारला इन्द्रेस्वर मन्दिररि माघे संक्रान्तिला दिन ल्हागतिबा मेला कोर्बारि चाङगेन अनिता ब्लोन तामाङला छ्याम ल्हागतिसि खाबा मुबा १९ दिङला चन्चल चपल छामे जुना ब्लोन तामाङ । मंसिर लाला खुला चेरि ह्राङला जाजाबा ब्यापजुगु फिर्फिर ल्हासिकेन निर्धक्क फ्याङचिबा गाइने बुलुङ ह्राङबान पनौति बजाररि मि ङ्हाच्छा खाबा मुतेबा स्हे थेन थेसे स्होबा दृस्यदा मिसे च्याम्बान, थेन थेन तासिकेन ब्राचिबा मुबा थे ।
तिक्खुरि थेला मि इन्द्रेस्वर लाथानरिक्यार निबा मोडङामला डबलिरि थान्बा प्लास्टिकला कुर्सिजुगु गुङला याखारगिरि ल्हानान निस्फिक्रितेन काङ स्योङसि चिबा थेन आउदिन भाति लासि आउदिन ब्रोइ ल्हागतिबा लासि चुरोट छेङचिबा दिनेसहरि सरजा दोसि तोइबा मुबा । थेह्राङमि थे दृस्यरि थेह्राङबा आनाउठो तिलाइ नोन आरेमुबा तासाइ जुनादा थेसे मन्त्रबिद्धह्राङ बेसुध पारतिबा मुबा । म्राङबाइतेन छ्याम बेकारला ह्राङ छोर्बा, सुर्ति खुम्बा कागजला याखारगि प्लेन सुङरि च्यापतिसि छेङबान सुङ थेन नाग्याम थुबा म्युगु मुस्लो तेचिबा थे ख्याउटे अधबैसे थेकुनु, थे खास दुइरि थेदा तिल्दा ओदे ल्हाना आकर्सक ङ्हाम्बा मुबा, थेला रहस्या बिसाम थेसे दातेदोना नोन पत्ता ल्हागाब लाबारि खाम्बा आरे ।
दिनेसहरि सर चिबा बिमा स्यान्दो गोर सोम ब्लि कुर्सि नोन मुबा थेरि । थेरि स्यान्दो म्हि चिबा मुबा । थे सरला ह्रो वा बिद्यार्थिजुगु हिन्मुसिम । तासाइ, जुनासे बिसाम थे दुइरि पनौति बजारला थे मुख्य चोकरि अंग्रेजि सर दिनेसहरि नेपालिबिमा स्यान्दो खालाइदा नोन आम्राङनि । म्राङमान गम्भिर थेन निरस छोर्बा थे भद्रपुरुससे योनान थे दुइरिन थेला सेम थेन दिमाग ङ्हिदान कोङना लासि ह्राङला पकडरि किन्बा तामरि बिसाम खाजिबाइ सन्देह आरेमुबा ।
ह्राङसे खाइमाइ आम्राङबा, खाटि नाम्साला तामाङस्या ह्राङबा म्राङबा याखारगि किसोरिसे थेह्राङ लासि नुप्बा दृस्टिसे ह्राङला लिरि च्याबा थाहा तामाहेन्से दिनेसहरि माडसाबसे जाकि असजिलो म्हान्जि । गो छेङसि संयत ताबा प्रयत्न लाजि ओम थेलिच्छा तिबा कुर्सिग्याम रेसि जुनाला ठिक ङहाच्छा खासि राप्जि । जुना सोङहार्जि । ल्हानान लोङबा थेन लोङबा च्याङना भरोसाला मनस्थितिरि थोबो कुर्सि रापचिजि ।
तिला लाइ, खाराङ लाइ ताबा दिनेसहरि सरसे कमिजला फिरिक्यारला खाल्तिरि मुबा याम मार्का चुरोटला बुटाग्याम योनायोना याखारिग चुरोट तेसि जुनारिक्यार स्योङबान च्याङना संकोचला छ्याम ङ्योइजि, ‘थुङला ?’
‘छ्या थुङला कि तिला ओम ङानिम थेह्राङबा जाबो चुरोट ?’ जुनासे जाकि छेर्बा म्युङतुङ काइरि जवाफ दोजि । थेदुइतेमा थे चुरोट आथुङमुबा, थेदा सुर्तिला थाङनोन सेम आनिमुबा ।
‘ओहो, गल्ति ताजि सरि है’ दिनेसहरि माडसापसे चोदे बिजि ओम जुनाला ङ्हिनोन यादा गिक्खेन ग्लारि थान्सि चपक्क चुङसि स्योम्जि । थेला थे दार्बा थुर्बा थेन थेला मधुरो काइरि ह्रिबा माफिसे जुनाला तिङरि चोदे कोङबा प्रभाब ताजि कि थे भाबाबेसरि खासि छोनछोन दार्बारि चुजि । थेदा सरला ङ्हाच्छा रापचिबारि सकस ताजि । सरा याग्याम ह्राङला ङ्हिनोन यादा गोलेसे फेसि थे ङामरिन मुबा कुर्सि डुइ चिबारि दोजि ।
जुनादा थेलिच्छा दिमरि तिला ताजि ? आपा, आमासे तिला पाङजि, मलेसियारि मुबा ज्याज्योसे तिला खबर पुइगाजि, चाङगेनसे ह्रो लाजि कि आलानि ह्राङबा तामजुगुला बिबरन पिन्बारि सेम आनि । थे ह्राङला थेन दिनेसहरि नेपालि सरला सम्बन्धदा किन्सि ह्राङसे लाबा थे अहम निर्नयदा जेक्खे डान्ना, थेसे थेदा तिनिला स्थितिरि दोनालामुबा ।
जुनासे डान्जि, थेकुनु चाङगेन थेन सर ह्राङलान करबलसे इन्द्रेस्वरला मेलाग्याम ल्हिबा सेम थोसि दिमरि दोबा जुना थेला लागि नोन पुरा आताचिमान याखारगि रुकस्याकरि गोरङ्हि जोडि क्वान, स्वाम्याप्बा मन्जन थेन बुरुस, याखारगि काइयो थेन मुठिन्हाङरि वाङबा खालला याखारगि जाबा ऐनाह्राङबा खिच्रिमिच्रि सामान युसि सरासर दिनेसहरि सरसे पढाइतिबा स्कुल मुबा ग्ला इटेबेसि दोगाबा मुबा ।
थेह्राङ लासि दिम ख्लासि ब्राबा थेला सेमरि ग्रेन धुकचुक मुबा । ल्होलो प्रकारला असुभ आसंकाजुगुग्याम स्युर्बा थेला काङफ्लाजुगु सुताइ थे ब्राचिबा ग्यालामला ठिक ग्लाग्लारि ताचिबा आरेमुबा । तासाइ, थेला सेमला न्हाङला गुरि बिसाम दिनेसहरि सरप्रति थेसे लाबा भरोसाला नाङसाल मन्दमन्द आचरि तासाइ नोन पुरा दृढताला छ्याम लुङचिमुबा ।
ङ्योइसिकेन सर चिबा दिम पत्ता ल्हागाब लासि थेला ख्राङगारि चिसि थेदा ब्रान्चिबा जुनासे दिन्छे साढे ४ बजेरिक्यार सर खामाहेन्से ल्हानान सुस्थिर थेन संयत काइरि ‘सर ङाम खाजिले’ बिबा मुबा ।
थे खासेला मुला बिबा तामरि ढुक्क तासि चिबाह्राङ दिनेसहरि नेपालि सरसे नोन थेदा असिम अनुरागला छ्याम कुरि ख्वाइसि बिबा मुबा, ‘डेन मुला जुना प्यारिदा । ङा प्रकार गिसे एदान ब्रान्चिबा मुबा ।’
जुनाला प्रेमसे प्रेमिला कु स्याप्बा मुबा, थेला ल्हुइसे सन्तुस्टि । थेसे योनान याखारगि म्रिङकोलाला ल्हुइला लागि सर्बाधिक महत्वला म्हान्बा मातृत्वला सुख नोन याङबा मुबा । दिङ सोम न्हाङरि गोर ङ्हि सन्तानला आमा दोबा मुबा थे । थेलिच्छा ङ्हिलान ग्रोइसे दिनेसहरि सरसे परिबार नियोजनला स्थायि उपाय किन्बा मुबा ।
ङ्हाउला काम्बा–केकेबा डान्बाजुगुला ग्योइरि ब्लुम्बा–थोन्बा लाबा जुनासे दोसि स्यान्दो चुरोट म्राजि । दिला सुङफिला याखारगि पत्ररि म्युङ आच दोना लासि याखारगि सर्को छेङजि ओम सुङ क्लुमक्लुम स्होसि थेदा म्युगुला जाजाबा निलो रङरि मुस्लो ब्याङजि । तिल्दा हिन्ना थेला सेम च्याङना सान्त ताजि ! ओम थेसे ह्राङला ल्हुइरि घटित थे मुतेबा बिमा भयानक घटनसे तिङरि पारतिबा खाइमाइ खाटा आजिबा पोरदा स्योम्बारि चुजि ।
याखारगि घुरमैलो दिनना ताम हिन्ना चु । स्कुलग्याम ल्हानान गाइना लासि खाबा दिनस सरसे थेकुनु स्कुल निमा क्वान्सि निबा क्वानदोना नोन आपोना थेदा म्हेर्बा कोठारि ङ्योइबा मुबा ओम आउदिन धिमा काइरि थेन थेन तासि बिबा मुबा, ‘ङादा माफ लापिन्गो प्रिय जुना, ङाइ ङाला ल्हुइला मुतेबा बिमा ग्रेन रहस्य एतेन छुम्सि थान्बा मुबा । ङा माओबादि दलला कार्यकर्ता हिन्ना, याखारगि तहला नेता बिसाइ नोन ताला । एतेन सम्बन्ध ल्हेना लाबा थेन छ्याम चिबा दुइरि ङाइ पार्टिदा जानकारि पिन्सि अनुमति नोन किन्बा मुबा । तासाइ, दाते पार्टि नेतृत्वला आन्तरिक द्धन्दला कारन परिस्थिति पोबा मुला ओम ङाफिरि कारबाहि तातोला बिबा कमरेडजुगु निर्नायक तहरि दोबा मुला । थेन्से ङाफिरि यौन बिचलन थेन सुबिधाभोगि निम्न पुजिबादि ब्यबहार लाबा पाले ल्हागाब लासि ङादा आचरन सुद्धिकरन थेन आत्मालोचनाला लागि पस्चिमला जलजला थुमला श्रम सिबिररि पुइबा निर्नय लाबा मुला । न्हाङगार नोन ब्राउ बिसि कुल्बा मुला ।’
सरला ताम थेसि जुनालाम ह्राङ राप्बा सानोन भासतिमा ह्राङ ताबा मुबा । आउदिन अतप्रभ ताबा थेसे गोलेसे ङ्योइबा मुबा, ‘पार्टिला चु कुल्बा आङ्यान्साम तिला ताला ?’
‘ङादा सेसि चुरिक्यार खानाङए ब्याङपिन्ना ।’
‘ङाला तिला ताला ओम दारेम ?’ अधमरो काइरि जुनासे स्यान्दो प्रस्न ङ्योइबा मुबा ।
‘ह्याङला गोर ङ्हि लाइनुजुगुला लागि एसे सर्भाइभ लातोला । ङाइ ब्राइट फ्युचर बोर्डिङ स्कुलला प्रिन्पिल राघब सरतेन ताम लामुला । थेसे एदा तिलाइ न्हा तिलाइ गे पिन्सेला मुला । ह्याङला प्रेमला निसानि चु गोर ङ्हि लाइनुदा सोना लाबा ग्रान चाला नि ?’
थेलिच्छा ङ्हिलान लागि गिसेम गि पाङबा थेबा ताम तिलाइ लेङबा आरेमुबा ।
थेला न्हाङगारदाङसे स्ह्योरि योनान गोरङ्हि ह्रेमकोला थेन गोर ङ्हि म्रिङकोला कमरेडजुगुसे राप्ति अन्चलला पहाडि थुमरिक्यार दोना लाबारि बिसि बोर्सि निबा जुनाला प्रानप्रिय, गौरेस्वरि हाइस्कुल इटेबेसि काभ्रेला अंग्रेजि सिक्षक दिनेसहरि नेपालिला चोथेबा दिङ वाइजिन्मा नोन तिलाइ खुटपत्तो आरे । चुर्से दिनेस सरला प्रेयसि जुना तामाङ बिसाम नाम्सालान याखारगि प्राइभेट स्कुलरि पियनला गे लासि ह्राङला थेन दिनेस सरला प्रेमला निसानिजुगुदा खामआखाम सोना लाबा प्रयत्न लाचिबा मुला ।
