बागमति प्रदेश न्हाङरि सरकारि गेला ग्योइ तामाङ थेन बाइ कार्यान्वयनरि खाजि । प्रदेश तहरि गिक्छा रेम बागमति प्रदेशरि नेपालीबिमा स्यान्दो आमाग्योइदा सरकारि गेला ग्योइ स्होबा हिन्ना ।
लानिरे (सोमबार) बसन्तपुररि ङ्योइबा गिक्खे गेताङ गुङ्ग्याम्से प्रधानमन्त्रि पुष्पकमल दाहाल ‘प्रचण्ड’से तामाङ थेन बाइ ग्योइदा बागमति प्रदेशला सरकारि गेला ग्योइ घोषणा लाबा हिन्ना । चु घोषणाला छ्याम दारे बागमति प्रदेशरि सरकारि गेरि नेपालीतेन तामाङ, बाइ ग्योइ कार्यान्वयनरि खामुला ।
बागमति प्रदेश सरकारला चु निर्णयसे प्रदेश न्हाङ्ला ल्हाना संख्यारि मुबा थेन आत्मसम्मान, ङोसेबा म्हाइचिबा समुदाय ताङ्बा मुला । प्रदेश तहरि गिक्छा रेम नेपाली बिमा स्यान्दो ग्योइदा सरकारि गेला ग्योइला मान्यता पिन्बा रे लानिरे बागमति प्रदेशरि सार्वजनिक बिदा नोन पिन्मुबा ।
बागमति प्रदेश सरकारसे २७ भदौ २०७९ कुनु तामाङ थेन बाइ ग्योइदा सरकारि गेला ग्योइला लिरि प्रयोगरि बाबा निर्णय लामुबा । थे निर्णय आन्सार सामाजिक बिकास मन्त्रि कुमारी मोक्तान थेन समितिला बिज्ञ मुल्मिजुगु अमृत योन्जन थेन ओमकार्यश्वर श्रेष्ठ मुबा गोरसोम मुल्मि तान्सि तयारिला गे तिमुबा । समितिसे मुख्यमन्त्रि शालिकराम जम्कट्टेलदा प्रतिबेदन पिन्माहेन्से ग्योइसम्बन्धि ऐन स्होसि तामाङ थेन बाइ ग्योइदा सरकारि गेला ग्योइला लिरि कार्यान्वयनला प्रक्रिया ङ्हाच्छा वाङ्बा हिन्ना ।
प्रदेश सरकारि गेला ग्योइ सम्बन्धि व्यबस्था लाबारि स्होबा ऐन २०८०, प्रदेश प्रमुखग्याम २०८० कार्तिक २३ गते प्रमाणिकरण तामुबा । चु ऐन लागु तामाहेन्से बागमति प्रदेशरि दारे सेवाग्राहीसे म्हान्बा सरकारि गेला ग्योइरि लिखित थेन मौखिम ग्रा पिन्तोबा ताला । सार्वजनिक पदरि चिबा म्हिसे सरकारि गेला ग्योइ प्रयोग लाबारि आङ्यान्साम जरिबाना थेन सजाय ताबारि खाम्बा प्राबधान थान्मुला ।
बागमति प्रदेशरि ल्होलो जात जातिला ग्यार्जा गिसे ब्लि ग्योइ पाङ्बा लाबा सामाजिक बिकास मन्त्रि मोक्तान संयोजकत्वला समितिसे मुख्यमन्त्रिदा पिन्बा प्रतिवेदनरि उल्लेख मुला ।
तामाङला ग्योइकाइ गेन्दुन तामाङ डाजाङ, स्रष्टा समाजला छ्याम तामाङ ग्योइला थुमरि गे लासि खाबा गेन्दुनजुगुसे नोन सरकारला चु गेदा डेन लाबा मुला ।
