जाजा मुमा सिला बिबा सुर्ता
ग्रेन तामा साइला बिबा सुर्ता
आमा आपाला सेम कोलाजुगु फिरि
जा जामेला सेम युङबा फिरि
पाङबा उखान ल्हानान ग्लारि
ठ्याक्कान डिक्पा म्राङ्मा सुताइ
ह्राङ्ला ल्हुइला बिमा
जा, जामेला ख्याल लाबा आमा हिन्ना ।
जा, जामेसे चाजि, आचाजि बिसि
लि च्यामान थायाङ्बा
लि म्राङ्मान ताङ्बा थेन दुङाल गोखाम्बा
खाल्दा तिला सेम निला
तिला सेम आनि
तिला लाला, खालाङ निला, तिला चाला
खाल्ला सेम खारङ्बा मुला
बिसि कोइखाम्बा
खालाङ ए ग्याम
आखादे दोना रुङ्बा, म्हाइबा
बिवा दुइरि बिमा
ह्रेक्छक गाइजि बिसाम
पिजडारि थान्बा सुगा ह्राङ
ल्हानान फोतोतो बोल्बा
म्हाङ ह्रुप्पारि ब्राबा थेमे
फिरग्याप ह्युलरि मुसाम
तिरेम लि आच्याना
काइ आङ्यान्ना
सेम थान आखाम्बा आमा हिन्ना ।
जा, जामे खेप्पा, खुइ दोसाइ
मिला ङ्हाच्छा सत्तन जाजान म्राङ्बा
खालाङ ए निमा तोजि वा !
खाल्सेइ आज्याबा पाङ्जि वा ? बिसि
सेम गाङसाल लाबा
आमा हिन्ना ।
खालाङ ए निमा मुगाइ व्हा खामा
तिला तोजि बिसि
फत्तर–फत्तर ताबान
ह्राङ्से खाम्बा दोनाला
पापपोप लाबान
ताजि बिसाम तिङ, न्हे नोन
पुइगे ह्राङ बोल्बान
जा, जामे ब्राबा चुमा
थे मिसे म्राङ्दे दोना
दिम दिला ग्याम गुरि राप्सि
फेसि निमा दिनि सेमा
पिलिलि निमा ह्राङ दोप ताबा
खामा ख्रेन्बा, फुइबान सुपम्हाबा बिबान
मिग्याम मिख्लिला फोल्दोङ ताइना लाबान
के बाम्बा आमा हिन्ना ।
खालाइदा तिलाइ आतागाइ
तासाइ ङादान तागाइ
थेमेदा स्हुखाबा, ठोक्पा बिमा
तिल्दामान तासाइ ङादान तागाइ बिसि
कुन्ज्योसोमदा फ्या फुल्मा सुत्ताइ
तिलाइ स्हु खाबा, पिन्पा तासेला ङ्हाच्छान
वैज्ञानिकदा चुनौति पिन्बान
आमाला ङ्हे स्हुखाबा संकेत ग्यामसेन
जा, जामे स्हे, स्हुर खासेला, तासेला
थाहा याङबा आमा हिन्ना ।
छ्याम मुमा ओदेन सुर्ता
आरेमा झननोन सुर्ता
दिङ छार्बान खामा
ब्रेलसाङ लाजि झन सुर्ता
ब्रेलसाङ लिच्छा बिबा आताजि
ओदेन सुर्ता
छायाजुगु ताजि
झन–झन सुर्ता
सुर्तान सुर्ताला उम
पुइबा आमा हिन्ना ।
मु ताइसाम बाम ताला
सा फ्रेसाम काङ फाग्याङ लाला
खाराङ्बा दुइ खाबा नाबारि खाम्ला
ङाला ओन्छाङ
मिला ङ्ह्योमो दोगाइ
नाम ताइमा गाप्पा
दिनिसे क्रोमा सिल्बा पिन्बा आमा हिन्ना ।
खालाङ ए बजाररि निमा
ग्लुसि चाइलासाइ
नाङरि निमा
ह्राङ्ला फो ख्रेन्बा म्हाना लाबारि
म्हिसे पिन्बा दिगु तासाइ
ल्हुङच्योइसे डुइमा सुत्ताइ
फोइतान थान्सि
गोनरि युसि बसि पिन्बा आमा हिन्ना ।
खाल्दामानसे तिल्दामान बिगाइ
दुङाल, ताङ्बा मुनोन मुला
दुङाल, ताङ्बादा गु गिरि तोकथान्सि
ल्हुइदा तिलाइ आम्हान्ना
मैनवत्तीसे ह्राङ ह्याल पिन्वान
ल्हुइ निसाइ
सिबा थेन सोबाला जोम्जारि सुत्ताइ
ह्राङ्ला बिमा
कोलाजुगुला ख्याल लाबा
ओते जे आताना
सत्तानदा लागि फेसि
ल ह्युलला ग्याम चुङ्सि
खासु क्यामसाङ्ला
म्हेन्दोला डिहिरि
ब्लापब्लाप ह्राङ ख्वारख्वार
स्यटिबा दुइरि
जा, जामेला दुङालरि
ङोनछुपरि ह्रुप ताआखामसाइ
म्हाङरिन तासाइ
तिल्दा दुङाल म्हान्बा सेम,
म्हि ल्हुइ चोराङबान हिन्ना
गाङरि चेख्खेन दिनि आफे
खोपरिइनोन फेला तिरे
दुङालरि आलोङ्गो
सुखरि आताङ्गो
दुङाल लिच्छा ताङबा खाला बिसि
जा, जामेला दुङालरि
सेम बुना लाबारि, गोना लाबारि
खाम्बा आमा हिन्ना ।
