पेम्बा दिङ ङिसला हिन्ना । थे जग्गि कदल्कुदुल्बा मुबा । थेला मिए टम्बल्टुबुबा काङ या नोन रिलरिल्बा मुबा । थेसे बर्थिङ सेन्टररि न्हाबा दुइरिन हेल्थि बेबिला प्राइज याङ्बा मुबा । थे जाचुमा हिन्सेला स्या आस्योप्नान छार्खा्जि । पेम्बाला दिमला क्वारारा बाइकादेला दिम मुबा।थेला दिमला जग्गि क्याथाङ स्या था बा चा ला दिम मुबा।थे दिमला किला चा रोमन पेम्बाला प्ले ग्रुप हिन्सेला क्लासमेट मुबा।थे ताबासे पेम्बा थेन रोमन औदिन डिक्पा मुबा ।
स्ह्यान्दो बाइकादेसे पेम्बादा रोमनथेन छ्याम थाक्लाङ्गो बिजि । रोमनला दिमरि निबारि आता बिजि । रोमनदा दिमरि बाबारिनोन आता बिजि । थेराङ आङ्यान्साम थेन्ला कोलाकादेथेन छ्याम क्लाङ्बरि आम्याङ बिजि । थे तामसे पेम्बाला आपा आमादा सुर्ता तजि ।
पेम्बाला आपा आमासे पेम्बादा मङ्ग्यार क्लाङ्बरि आपुइनि । पेम्बा मङ्ग्यार आनिगै बिसि दिमरि वाइफाइ थुइजि।पेम्बादा कार्टुन च्या सि चिउ बिजि । पेम्बा कार्टुन च्याबरि याप्जि । थे लोप्खाङग्याम्से हाबाहिन्से आम्हेर्दे दोन्हा कार्टुन च्या सि चिजि । कार्टुन च्याना च्याना पेम्बाला मि ला ङ्हयाल्बो वालावाला तजि । थेसे लामा पेम्बाला आपा आमादा देप्पेन सुर्ता तजि ।
पेम्बाला आपा आमाचासे गोर्गि नगि ग्लुसि बजि । थे नगिला मिन रक्कि थान्जि । पेम्बादा रकिथेन छ्याम क्लाङ्गो बिजि।पेम्बा रक्किथेन छ्याम क्लाङबरि माइजि । थेसे रक्किदा ह्रो मान्जि । लोप्खाङग्याम्से हाबाहिन्से आम्हेर्दे दोन्हा रक्किथेन छ्याम क्लाङ्जि । थेसे रक्किदा स्ह्योरि रेमैदेन गुड मर्निङ बिजि । लोप्खाङरि निलामै बाइबाइ बिजि । ङ्यासे म्हेर्गे लामै गुडनाइट बिजि । च्याना च्याना पेम्बाला डोल्पा ह्रो रक्कि दोजि ।
पेम्बा छार्सि हाजि । थे तिक्युङमारि बिमा जक्कि न्होजि । तिक्युङ्मारि आख्युप्पा म्रापला चुकुल ख्युप्परि माइजि । कौसिला क्वान साङ्बा छो ख्युप्परि माइजि । थेदा क्योङ्सेन ङ्हाज्याङ तजि बिजि । नोर्बुसे थेला रक्कि चा ङ्हाज्याङ आताबा बिसि सुर्ता लजि ।
नोर्बुला लोप्खाङ ङामथेङा ङ्हाज्याङ साउँरा मुबा ल्होछाररि बिमा लागि लिच्छा थे साउँरारि फुटबल गेम तजि । पेम्बा थेला रक्कि थोसि गेम च्याबरि निजि । ग्यालामरि रक्किसे सिजिबा गोर्गि नम्युङ क्लोक् चाजि । रेच्छगि हिन्से रक्कि काइँकाइँ बिजि । पेम्बासे रक्कि दिमरि बसि छ्योङखाजि । दिमरि दोखाबैदेन रक्कि फतर्फतर तासि प्रेक सिजि । पेम्बा रक्किदा हाप ख्वाइसि क्राजि । सिसि जिन्बा रक्किदा ब्याङबरिन आपिन्नि । पेम्बा म्हेर्सि लिच्छा चेक्खेन रक्कि ब्याङजि ।
पेम्बा छोर्बा हिन्से रक्कि माइसि क्राजि । क्राना क्राना पेम्बादा छावा हाजि । थेदा मनखाङरि बोर्जि । थेरि पेडियट्रिक्ससे ल्हानान ताम पाङ्सि वाम्बा हिन्से पेम्बाला छावा फान्जि ।
