बिमाइह्राङ
दिमरि आस्याङनिजाला मामला घेवा मुबा ।
आले अजयसे फोनरि ङादा पाङजि, ‘ज्योज्यो, मामला घेवारि एए नोन निबारि हिन्साम ङाए नोन एतेन प्रे नोन निला ।’
आपा थेन आमाचा ङ्हिरे ङ्हाउ नोन आस्याङनिजा दोलाजिन्मुबा ।
योथाङमा ङा खोपोङला कासनग्यामसे आले अजय टिबा खोपोङलान सूर्यविनायकरि मुबा डेरारि स्हाङ दोजि । डेरारि चाङ थेबा थेन जा विवेकदा ह्रुप ताजि । विवेक तिसारि आखाम्नागि म्हेर्सि टिबा म्राङजि । चाङ थेबासे ङादा पाङजि, ‘ज्योज्यो, अजयमि दोलोकेन थोन्सि जिन्बा मुला ।’
हाराबारा ङाइ अजयदा फोन लाजि ।
थेसे पाङजि, ‘ज्योज्यो, ङा सूर्यविनायकचोकरि मुला । ए थेरिन दोकाउ ।’
बिमाइह्राङ ङा सूर्यविनायकचोकरि स्हाङ दोजि । अजयसे ब्रान्सि टिबा टिम । थेरि दोसि तिलाइ दुइलिच्छा आस्याङनिजा निबा बसरि जिङ क्रेजि ।
बसरि आकु थेबा थेन खसीगाङला आस्याङ पाराङए नोन मुबा टिम । आकु थेबा, आस्याङ पाराङ, अजयतेन प्रे ङा आस्याङनिजा थोन्जि ।
मान
कोट तेमालरि दोदाम्मा बस न्होङजि ।
आकु थेबासे सुङजि, ‘लु दारेम ह्याङ कोट तेमालदोना ब्रासि नि । बस आक्योन्तेदोना च्या थुङसि टि ।’
थेरि आस्याङ पाराङ, आले अजय, पालुघाटला आस्याङ थेन ङा मुबा । ङाइ ह्राङला झोला पुइजि । आले अजयसे ङादा पाङजि, ‘ज्योज्यो, झोलामि बसला सिटरिन थान्साइ तासेला ।’
ङाइए नोन अजयदा पाङजि, ‘झोलारि ङाइ चाबा मान मुला । म्हासाम दोसि मान ग्लुबारि खोपोङरि दोतोला । थेलाथोरि झोलाइ नोन सोत याङबान मुला ।’
मोलाम
ह्रुप ताबाइतेन आस्याङ सोनामसे ङादा ज्यागोन गाइना हापख्वाइसि सुङजि, ‘कोन, ए ब्राबा ग्याम ज्याबा मुला । एसे ह्राङसेन ठ्वाइबा ग्यामरि ज्याबालासि खामुला । ज्यानालासि खामुला । आस्याङनिजुगुला लागिरि चु ताङबाला ताम हिन्ला । एला ताङबान ङानि आस्याङनिजुगुला ताङबा हिन्ला, कोन ।’
ङाइ तिलाइ आबिजिमा नोन दाबे आस्याङसे ङादा चेकाइसे सुङजि, ‘कोन, एदा लागिरि ङानि आस्याङनिसे तिलाइ लाबारि खाम्बा आरे, तिनिदोना । एसे दाम्बा ग्यामदा म्राङसि ङानि आस्याङनिजुगुला ना नोसि टिबा मुला । अझन एसे ज्याबालासि निउ । ज्यानालासि निउ । ग्योइकाइला थुमरि । ङानि आस्याङनिजुगुला चु नोन मोलाम मुला, कोनदा ।’
ओते सुङसि आस्याङसे दाबे ङादा हापख्वाइजि, ङाए नोन आस्याङला कुरि लेप ताजि ।
बाङ
ज्यागोन दिङलिच्छा लोपखाङरि डोबा दुइला ह्राङलान क्लासमेट ह्रो नाना साइलीदा ह्रुप ताबारि म्याङजि ।
ङादा ह्राङला ओन्छाङ ब्ले म्राङम्याङसि नाना साइली ताङजि, नाना साइली ताइ नोन ह्राङला ओन्छाङ ब्ले म्राङम्याङसि ङाए नोन ताङजि ।
ङ्हि नोन, फुरफुर ताङजि ।
नाना साइलीसे ङादा सुङजि, ‘आले, ङाइ एदा म्लेबा आरे ।’
नाना साइलीपाट्टि दोसि ङाइए नोन पाङजि, ‘नाना, ङाइए नोन एदा म्लेबा आरे । ह्राङतेन प्रे डोबा जात्तुकुला ह्रोजुगुदा म्लेबारि आखाम्बा टिम, नाना । तिलाइलासि, म्लेबारि आखाम्बा टिम ।’
ह्रुप तासि तिलाइ दुइलिच्छा नाना साइलीसे ङादा दाबे सुङजि, ‘आले, एला सेम नाबा दुइरि आस्याङला जामे अनिता (ङाला आस्याङ सोनामला जामे थेबा) कादे क्रामुबा, थेमि ङादाचे था मुला ।’
दाबे नोन, नाना साइलीसे ङादा सुङबारि आगाइजि, ‘अनितासे एदा देन्बा चेकाइ लामुबा । एला ज्याबादा लागिरि लादा बाङ ह्रिमुबा ।’
पास
ङ्यासे थाङमा ङा आस्याङनिजाला दिमला पिन्डारि टिमुबा ।
ओजा पिन्डारि आस्याङनिला जामेजुगुइ नोन मुबा । आस्याङला जामे माइलीसे ङादा ङोबा चुजि, ‘आङिला जासे आस्याङनिला जामेजुगुला मिनमि स्योङ म्लेजि ताला ।’
ओराङ नोन लासि, आस्याङला जामे विष्णु थेन जोगमायासे नोन ङोजि ।
ङाइ ताङलासिन, आस्याङनिला जामेजुगुला मिन पाङसि निजि । ओतेबान दुइरि ङाला ङामरि मुबा आस्याङला जामे विष्णुसे पाङजि, ‘आङिला जासे आस्याङला जामेजुगुला मिन म्लेबा आरेम । चु विषयरि आङिला जा पास ताजि ।’
विष्णुसे ओते तिला बिमुबा, छाङमान दिम होङना नेजि ।
छ्योइ
आङि स्वस्तिकादा ह्रुप ताबा दुइरि ङाइ ङाइ ब्रिबा ‘ल्हुइला गोङमा’ छ्योइ दोन्जि ।
आङि स्वस्तिकाला ङामरि मुबा गिक्खे ज्योज्योसे सुङजि, ‘चु छ्योइ ङाइए नोन डोबारि म्याङसाम कादे ज्याबा तासेला ।’
ङाइ ‘ल्हुइला गोङमा’ छ्योइ ल्हाना बोर्बा आरेबा मुबा । थेतासि, ङाइ ओजा छ्योइ ओजा ज्योज्योदा दोन्बारि आखाम्नि ।
ङादा आज्याना ङ्हाम्जि ।
छाङमान
आकु च्युनिसे ङापाट्टि दोसि पाङजि, ‘आले, ङ्यासे म्हेर्बारि ए चुरिन (थिङम्हेरि आकु च्युनिला दिमरि) दोगाउ । ज्याबा ताला ।’
आकु च्युनिसे ओराङबिसि टिबा दुइरि खसीगाङला आस्याङ पाराङ, आकु थेबा, आले अजयतेन प्रे स्यान ङेङगोरजुगुइ नोन थेरिन पोप मुबा । आकु च्युनिला ल्हेङमो थेसिलिच्छा आस्याङ पाराङसे ज्युम नेसि आकु च्युनिपाट्टि फ्लिक दोसि सुङजि, ‘ज्योज्यो, एसे जा थेबादाचे ङ्यासे म्हेर्बारि खाउ सुङजि, जा पाराङदाचा आसुङजि । हिन्बाम, जा आज्याबा पाराङ, ह्वारा आज्याबा गाराङ बिमुला ।’
आस्याङ पाराङला ल्हेङमो थेसि छाङमान दिम होङना नेजि ।
जाजा
आले विवेक (आरु विमलाला जाथेबा) दा ङाइ ङाइ ब्रिबा छ्योइङ्हि ‘पिङ्गाई’ थेन ‘नोरी’ दोन्जि ।
ओजा छ्योइङ्हि दोन्बा न्हाङगारदाङसे आले विवेकसे ङादा पाङजि, ‘ज्योज्यो, ङाइ ह्राङसे ब्रिबा छ्योइङ्हिदा डोसिजिन्ना लाजि । ज्योज्यो, छ्योइमि चुराङबान जाजा जाजा पेजला ब्रितोला । डोखेन ताइ नोन, छ्योइ डोबा दुइरि ब्लेबा आखा ।’
ङाइ विवेकदा तिलाइ आबिजि, नेसिचे टिजि ।
