बागमती प्रदेशसभाला बुधबार चिबा चिसाङरि प्रदेशसभा मुुल्मि ज्ञानबहादुर तामाङसे ह्राङ्ला आमाग्योइ तामाङ ग्योइरि सेमताम थान्बा मुला ।
ह्रोसे प्रदेश सरकारला कामकाजी ग्योइ ऐन, २०८० कार्यान्वयनरि खामाहेन्से गिक्छा रेम तामाङ ग्योइरि सेमताम थान्बा हिन्ना ।
चिसाङरि ताम थान्बान तामाङसे प्रदेश सरकारला कामकाजी ग्योइ ऐनला कार्यान्वयन ताबासे ह्राङ्से प्रदेशसभा चिसाङरि तामाङ ग्योइरि ताम पाङ्बा हिन्ना बिजि । सांसद तामाङसे दारे प्रदेश मातहात थेन स्थानीय सरकारला संरचनारि ग्योइ दोःबा म्हि थान्तोबा बिसि नोन ह्रिजि ।
‘ङोसेबा छ्यामला संघीयतारि प्रदेशसभा ग्याम सर्वसम्मत पारित लाबा ऐन कार्यान्वयनरि मुतेबा गम्भीर तातोला । दारे बागमती प्रदेशला मुतेबा सरकारी संरचनारि ग्योइ दोःबा नियुक्त लासि देन्बान ऐन कार्यान्वयन ताबा अनुभूति पिन्तोला,’ सांसद तामाङसे बिजि ।
तामाङ थेन बाइ समुदाय रुङ्बा मुबा बागमती प्रदेशरि प्रदेश सरकारसे निबा बैशाख २४ गतेग्याम सरकारी कामकाजी ग्योइला लिरि नेपालीला छ्याम तामाङ थेन नेपाल ग्योइदा नोन मान्यता पिन्मुला ।
ङ्हाच्छाला चरणरि प्रदेश मातहातला सरकारी गेदिम थेन स्थानीय तहरि गेदिमला बोर्ड थेन लेटरहेडरि सोम नोन ग्योइला प्रयोग तिबा मुला ।
