आमा ह्रिरि रेदाङसे छे खान्बरि निमुबा । गोठेनाङ रा, म्हे, मुइकादे ताबासे आमादा ल्होङ खाइमाइ आतामुबा । आमासे च्याङबादा सत्तान दिम रुङबारि थान्मुबा । दिमरि स्यान्दो खालाइ आरेबा । आमा थेन ७–८ दिङला च्याङबा चेख्खेन मुबा । ज्याना लासि दिम रुङगो, खालाङए क्लाङबारि आनिउ, दिमरि ह्यो वाङला बिसि आमासे च्याङबादा कुल्थान्मुबा ।
‘जाजाबा नाकाला कोला छाङसे रङगारि च्युपथान्मुला । दिनि ल्हाना क्रोबा दुइरि दिमनाङ बोर्सि च्युपको’ चोदे सुङसि आमा ह्रिरि ब्राला स्हिजि ।
‘ह्या आमा’ च्याङबासे नोन आमाला ताम ङ्यान्बाह्राङ लासि पाङजि ।
च्याङबा बिसाम दिमला राङगारि चेख्खेन टिसि आमा अखादे दोना रुङसि टिआखाम्बा मुबा । आमा ह्रिरि निबरि ह्वारा मे बितआवाइचिमान ओर्सेला काजि, साजि पोप्सि क्लाङबारि वाङमुबा । दिमला राङगारिजे आताना नाम्सा कोर्सि क्लाङ ब्रामुबा । तिनि नोन थे ह्रोजुगुतेन क्याच्चा दिमरि क्लाङचिमुबा ।
चु नोन दुइरि मार्से कोले नाम्साला बामन आखे काठि जुसि दिमला रङगारि तोरतोर खाबन मुबा । थारेङ ग्यमसे च्यामा रङगारि खाला म्हि खजि बिसि योनायोना दिमला रङगारि छ्योङगाजि । च्यामाम बामन आखेला थोबोरि क्रानोन बोङ सार्बा टिम । छिक्मानोन कुबिरिक ताजिन्बाला टिम । थे फिरि ना नोन कुल्टिङ मुबा टिम ।
च्याङबादा लोङबा ह्राङनोन ताजि । थे दुइरिन ‘तिम्रो आमा कहाँ जानु भो ?’ बिसि ङ्योइजि ।
च्याङबा कुटिसिन च्याबाला च्याबान टिजि । दोसि थेनोन ताम ङ्योइजि । च्याङबासे ज्यार्ति ग्योइ आगोनि । ना कुल्टिङ खेप्पासे तिला बिजि तिनी म्हान्जि च्याङबादा । ताम गोसाका पाङसे म्हान्जि सेम न्हाङरि ।
ना कुल्टिङ आखेसे ‘भन्ने भए भन नभने म लान्छु’ बिसि पाङजि ।
क्यार्से प्लिक च्यामा नाकाला कोला कादेनोन दिनिसे क्रोसि सिसि जिन्बाला म्रङ्जि । दरेम नाकाला कोलाइ सिजि आमासे साइबा ताजि म्हान्जि च्याङबादा ।
‘दिमरि ग्रेन म्हि आरेबा दुइरि ह्यो खामुला, दिम आख्लागो ।’ दोलो आमासे पाङथान्बा ताम डान्जि च्याङबासे ।
पक्कान चु खेप्पा ह्यो नोन मुसिम बिसि च्याङबासे म्हान्जि । दिम न्हाङरि ह्यो आवाङगाइ बिसि योनायोना दिमन्हाङ निसि म्राप काइसि सुप लासि टिजि ।
बामान खेप्पा हाथोम चिजि ।
