दुगु लाला च्युइसे ब्रे कुनुला रे । म्लेबारि आहाम्ना सेम न्हाङरिन खिल्सि चिबा मुला थे रे । ङादा सम्भोटा लिपि सेना लाबारि ज्यो थेबासे ओन्बा छ्योइ । ट्याङका फिरि जोर्सि थान्बाला मुबा । ङादा मोटिभेट ताना लाबा थे भित्ताला सिमेन्ट प्लास्टर फिरि फाइला किलो ठोक्सि थेरेरे च्योसि थान्बाला ज्योथेबाला सर्टिफिकेट थेन सम्मानपत्रकादे दत्ते दोनान मिरि फ्योङ च्योसि चिजिबा मुला ।
ङा फेत छोर्बैतेन डोङ रेसि माङग्यार निबाम स्ह्यो ओत्तेगि निदाम्जिम । दिनिला होइसेरसे दाज्र्याेइला थोबो वाइखा जिम । सौरे, जुरे थेन आहालेरि दिनि चिप्जिन्जिम । दिमरि हालाइ आरेम । आपा आमा एन बुरि मागाइ ख्वाबारि थोन्जि नाम । क्याच्च दिमरि म्हेर्जिबा डोन्बो जेक्खेन धारारि स्वा म्याप्चिबा जिम । माच्चाला आप्च्याङला दिमला म्हिकादेइनोन छे सिङरि थोन्सि जिन्जिम । सत्तन स्ह्यो ङ्यासे ङाथेन गोन्पोरि फ्या लाबरि निबा स्वोनाम एन आरेबा जिम ।
ङ्यासे चाकुखोला दोस्रो लघु जलविद्युत परियोजनाला मिटिङरि म्हिकादे योना पोब आताना मिटिङ फिना जिन्बासे लामा म्हुन्ना गि ङ्ह्यामा जेक्खेन म्हेर्बारि म्याङमुबा । थेसे लामा फिना रेसै थमथोम तजिबा मुबा । चाङ्ग्रेनसे नाम्सा ख्ला बा हिन्से गोन्पोरि स्ह्यो ङ्यासे छ्योबा ङाइ फुल्बान हाबा मुबा । गोन्पो जग्गि तोथाङ पिङगङ बिबा ग्लारि मुबा । स्ह्यो ङ्यासे लोङना लाबा ग्ला बिसि ङोसेबा ग्ला मुबा थे पिङ गङ । गलबुङ गङला ह्रि बोम्बो ब्लोन गङरि निमा ब्राबा ग्यालाम बिसि नोन जत्तुगु दुइरि ल्होङना बिबा मुबा । थेसे लामा जत्तुगुकादे लोङसि निबरि आहाम्बा थे पिङ गङरि गोन्पो स्हेङबा हिन्से बिसाम जत्तुगुकादेन आलोङना निबा मुबा । थे पिङ गङदा गोन्पो गङ बिसि मिन थान्बाला मुबा । दिङ सोम ङाच्छा जेक्खेन थे गोन्पोला ठोङसेन लाबाला मुबा । ख्राङगा क्वारारा दाज्र्याेइकादेसे देवाच्यन राङ छोर्बा थे गोन्पोला ख्राङगरि मुबा ङ्हेदोर दोङसे सिल्बा पिन्बा मुबा ।
योना योना लासि ङा गोन्पोरि छ्योबा लाबारि बिसि निजि । ख्राङगाला गारा पितवाइबा थेन कागजला प्लेन राङबा म्राङजि । ज्याना आच्याना ब्रानाब्राना चे पाटा गाङसाल ताखामा मगो दोङ ङामरिनोन कागजला प्लेन म्राङजि । तिगा जिम बिसि सेम दुइसि च्याबाम छ्योइ डे बाला प्लेन जिम । सेम दुइसि यारिन थोसि निजि । काँत्ला सोम वाइसि गोन्पोला ङामथेङा दोमा मनि खोर्लो डे सि सोक ब्लसि ब्याङबाला स्याप्जि । गोन्पोला म्राप झ्यालरि च्याबम डुङसि थान्बालान स्याप्जि । जग्गि छ्योङसि म्राप ठोङनिजि ।
ताल्चासे डुङसि थान्बा म्राप प्लोक ठोङसि च्याबाम साङग्येला स्हिङगापकादे बेनान टकल टोकोल निना था सि ब्लङब्लुङ गुर्ना लसि थान्जिम । होइबामेला छिक्मा फेक क्युइन लासि छ्या ङ्हिनोन क्युइन लजिम । च्याङरेसिला नोन छिक्मा ग्यामसे होक फेना लसि खारे टाङना लसि छ्यारि थान्बा बुद्धा चित्ताला ठेङबा बोर्जिम । गुरु रेम्बोर्छेला थेन याबयुमला स्हिङ्गाब नोन टकल टोकोल निना लजिम । च्योमदन्दे, डाक्पो, सिन्दुङमा नोन टकल टोकोल निना लजिम । प्लिक च्यामाम म्हिकादे थासि रलम्म लसि थान्बा राङ छोर्जि । साङग्येला स्हिङगाबकादेसे देवाच्यन राङ म्राङबा गोन्पो थे दुइरि सिल्हुइकादेला बो राङ ङ्हाम्जि । म्हाङ वा ङोन्छुप फेबारि आहाम्नि । ङा तोल बोर्सि ब्लाङ गुर्जिम ।
रेच्छगि लिच्छा फेत छोर्बाराङ तजि । चु मि से ट्याङक फिला छ्योइ थेन भित्तरि ख्याप्सि थान्बा ज्यो थेबाला सर्टि्फिकेटकादे थेन सम्मान पत्रकादे माइजि । थेकादे बेनान आरेम । सारि क्यार च्याबम फ्रेमकादे बेनान थिसि स्याक्स्योक डेसि ठाम्सि थान्बाला म्राङजि । छ्योइ डेसि रुदरुद लसि ठाम्बाला म्राङजि । थे छ्योइला प्लेनकादे थेन सम्मान पत्रकादेला प्लेनकादे समसेम दुइसि थुइसि च्याजि आतनि । थे छ्योइ डेबाराङ लसि तिङ स्योक डेबाराङ ङ्हाम्जि । थे गुम्बा व्यबस्था तथा विकास समितिसे पिन्बाला थेन च्युइ रेम का दान लाबाला सर्टिफेकेट । नेपाल सरकारला उत्कृष्ट कर्मचारि दोबाला, ल्होलो ग्लारि योगदान पिन्बाला प्रसंशापत्र थेन सम्मानपत्रला फ्रेम थिबाराङ लासि तिङ फेक थिबाराङ ङ्हाम्जि । थे म्लेबरिन आहाम्नि । हाइमाइ म्लेबरि आहाम्नि थे छ्योइ थेन डेनस्योला फ्रेम ।
