पोखरा, नेपाल तामाङ घेदुङ पोखरा महानगर समितिसे बधाई थेन डेन गेताङ स्हेङबा मुला । जेठला १२ गते कुनु पोखरारि गेताङ स्हेङबा हिन्ना ।
नेपाल तामाङ घेदुङ संघिय ह्रोचोहो दिपक तामाङला ग्रेनडोन्बोरि ताबा गेताङग्याम गण्डकि प्रदेशला ङिच्छा जोम्नारि नेपाल तामाङ घेदुङ कास्कि जिल्लाग्याम प्रतिनिधित्व लासि निर्वाचित तास्ह्युबा छार निर्वाचित ह्रोचोहो राम बहादुर ब्लोन तामाङ, गाउराइ मनिष माम्बा थेन मुल्मि प्रेम लोप्चनदा डेन लाबा हिन्ना ।
थेराङनोनलासि घेदुङला इकाइकादे रिठ्ठेपानि तामाङ इकाइ समिति थेन सिम्पानि तामाङ इकाइ समितिला छार चोहोजुगु पूर्ण शिला स्याङ्बो थेन विरबहादुर थोकरदा नोन डेन लाबा मुबा ।
गेताङदा ठोङस्हेङ लास्ह्युबान ग्रेनडोन्बो दिपक वाइबा तामाङसे तामाङ ह्युल्बा नेपालला आदिवासि जनजातिलान सोम्छा ग्रेन जनसंख्या मुबा ह्युल्बा तासाइ नोन नेपालला राजनीतिक, आर्थिक, प्रशासनिक, शैक्षिकलगायत राज्यला महत्वपूर्ण अंगकादेरि दाते नोन तामाङला पहुँच ल्हानान च्याङना मुबा ल्हेङमो थान्मुबा।
नगर घेदुङला कार्यबाहक चोहो कुमार थिङ तामाङला चोहोदनरि ताबा गेताङरि नेपाल तामाङ घेदुङला ग्रेन ग्रोइपा टेक बहादुर तामाङ, राष्ट्रिय आदिवासि जनजाति महिला महासंघ जिल्ला समन्वय परिषद कास्किला ह्रोचोहो मिनमाया तामाङ, केन्द्रिय मुल्मि हरिमान थिङ, ङ्हाच्छाला केन्द्रिय का।वा।कुमबहादुर योन्जनलगायतसे ज्याबाम्हान्बा ल्हेङमो थान्मुबा ।
