१. होङ्ना
तिलाइ रेङ्हाच्छा; बाइ ग्योइला खेन्पो बिमल ताम्राकार सर थेन बिष्णुकेशरी ताम्राकार म्यामतेन प्रे ह्रुप ताबारि म्याङजि । ह्रुप ताबाइतेन; बिष्णुकेशरी म्यामसे ङापाट्टि फ्लिक दोसि सुङजि, ‘देन्बान, ह्याङ दोक्छेबिमा ङ्हाच्छा खाइमा ह्रुप ताजि ताला ?’
ङाइ तिलाइ बिबारि आखाम्नि । बिमल सरए नोन कुटिसि टिबा म्राङजि ।
तिलाइ दुइलिच्छा; ज्युम नेबान बिमल सरसे बिष्णुकेशरी म्याम थेन ङादा प्लिक च्याबान सुङजि, ‘दोक्छेबिमा ङ्हाच्छा ह्याङ ग्योइकाइलान गेताङरिक्यार ह्रुप ताजि ताला ।’
बिमल सरसे ओते तिला सुङमुबा– थाआयाङना; ङानि सोम नोन दिम होङना नेजि ।
२. लुँध्वाखा
तिरेकुनु ह्रुप ताबा दुइरि बिमल सरसे ङादा सुङजि, ‘ङा डिक्खेन मुबा स्योस्योरि ह्राङला तुनराप छिबारि म्याङसाम कादे ज्याबा तासेला ।’
स्योस्योला मिन ‘लुँध्वाखा’ टिम ।
फुर ताङसि ङाइ ङ्हान्बा ग्योइला ‘आधा’ क्राछिकला तुनराप इमेल लासि पुइजि ।
इमेल लाबा तिलाइ लालिच्छा ङाला ‘आधा’ क्राछिकला तुनराप बाइ थेन ङ्हान्बा ग्योइरि तिखुरिन छिसि खाजिम ।
बाइ ग्योइग्यामसे ‘आधा’ या ‘गाङसाल’दा ‘बच्छि’ बिबाटिम ।
३. ल्हेङमो
बिमल सर थेन ङाला; मेसेन्जररि ग्योइकाइला थोरि ह्रेङबा ल्हेङमो ताला ।
गिक्खे ताङबालान ताम; बिमल सरसे मेसेन्जररि ङातेन प्रे तामाङ ग्योइरिन ल्हेङमो लासि खामुला ।
ओन्छाङ ह्रुप ताबा दुइरि नोन बिमल सरसे ङातेन प्रे तामाङ ग्योइरिन ल्हेङमो लासि खामुला ।
ह्रुप ताबा दुइरि ङाइ बिमल सरदा सुङसि खामुला, ‘ह्राङसे ङातेन प्रे चुते ज्यानालासि तामाङ ग्योइरि ल्हेङमो लासि खामुला । ह्राङसे तामाङ ग्योइरि नोन ब्रिगु स्याङसाम कादे ज्याबा तासेला ।’
