काच्याउलि थालास्युगोले
बिजाबुमोजुगु क्लाङसि टिमुला ।
छ्योइला दोइजुगु पुइसि
लोपखाङरि निमानिमा
मि च्युप्सि स्योला छिकजुगु
म्राङतेबान डोनाडोनान
ब्रिगुला ङोकुजुगु थुम्नालासि
ब्रिनाब्रिनान
ब्रेसिजिन्बा बिजाबुमोजुगु
क्योन्बादा लागिरि ग्याम छेप डुङसिलिच्छा
बिग्या सासक डोङबा दुइरि लोपखाङजुगु
बिदा लासिलिच्छा
थेनिजुगु क्लाङबारि फिर्क्याप थोन्मुला, काच्याउलि थालास्युगोले, बिजाबुमोजुगु क्लाङसि टिमुला ।
इलास्टिक प्राङबो मुबा पाइन्टजुगु चुङसि
नाला नापला वास्ता आलाना
ख्रेन्बाफुइबाला वास्ता आलाना
थेनिजुगु ब्याट, बल थोसि
ग्यामरि थोन्मुला
ह्राङनिजुगु काच्याउलि थालास्युगोले
बिजाबुमोजुगु क्लाङसि टिमुला ।
खालाइचा हाफपाइन्टरि
खालाइचा फुल पाइन्टरि
खालाइचा स्कटरि
खालाइचा जामारि
ह्युल क्लाङबा स्हेरिन सोसि टिबाह्राङ
ह्युलरि गाडी ब्राबा ग्याम
ओम, बिजाबुमोजुगु क्लाङबा पाङगेल स्यानस्यान नोन मुबाह्राङ लासि
दिमदिमग्यामसे बिजाबुमोजुगु थोन्मुला क्लाङबारि ।
च्यास्युगोम तिरेम थेनिजुगुला मिरि
बल छ्योङबा म्राङसि
बल ब्राबा म्राङसि
बल फ्याङबा म्हाङसि
तिलाइ दुइतान लागिरि मुगाइ
थेनिजुगुला लिरि ताङबा सार्मुला
देन्बान काच्याउलि थालास्युगोले
बिजाबुमोजुगु क्लाङसि टिमुला ।
तिनि बिदाला रे
थानथान पाङगेलरि ह्राङसे लाबा ग्रेनग्रेन काइला बासन ङ्यान्जिबिसाम
फेसबुकरि ह्राङसे ब्रिस्युबा
फ्युक्पो ताबाला स्टाटस म्राङजिबिसाम
खाज्युबाइ ह्रुप ताबा दुइरि ह्राङसे उन्स्य्ुबा
म्हाङ डान्जिबिसाम
थेनिजुगु फुप्सेला मुला
ओम, ह्राङदा स्होबारि म्राङबा म्हाङ टाङसेला मुला
देन्बान, ह्राङनिजुगु काच्याउलि थालास्युगो
थेनिजुगु ह्राङलान म्हाङतेन प्रे क्लाङसि टिमुला ।
दो:बा : ईश्वर थोकर
