तामाङ चलचित्र संघ नेपालसे स्हेङ्बा तामाङ ग्योइला तुन्बा सिनेमा ‘ब्रेल्साङ’ला विशेष च्यारिटि शो पोर्चुगलला Cinema ideal, rog do loreto 15, 1200-241 lisboa रि अगष्ट २५ तारिखरि ताबाकेन मुला । दाते स्हेङ्बा पक्ष थेन तामाङ समाज पोर्चुगल चु गेरि ल्हागतिचिमुला ।
गेताङ जामाकुनु दिन्छेला १२ः१५ बजेहेन्से तासेला तामाङ समाज पोर्चुगलला ग्रेनगौराइ कुमारसिं बलसे ग्रा पिन्मुला ।
सिनेमा “ब्रेल्साङ”रि बुद्ध थिङ, उत्तर लामा, रुपा एस घले, कुइसाङ रुम्बा, प्रवल थिङ, भुइसाल लामा, मायादेवी मोक्तान, सञ्जय हुत्त, दिपक तामाङ, शम्भु मोक्तान, सुनिता दोङ, विकास स्याङतान, सङ्गिता तितुङ, अमर लामा, रेसमकुमार ‘स्याउली’ तामाङ, पुष्प लोप्चन, समीर घिसिङ, गोकुल तामाङ, सिरोम तामाङ, ट्यापे डन, हिरा मोक्तानसे अभिनय लाबा मुला ।
डोन्बो कलाकारला लिरि नायक ओम निर्देशक कुमार मोक्तान थेन नायिका सुनिता लुङ्बा मुला । चु सिनेमाला निर्देशन कुमार मोक्तानसे लाबा हिन्ना । भिडियोला छायाँकन सुमन घिमिरे थेन डिक्खेन त्रिलोक लामासे लाबा मुला । सङ्गीत जोगलाल लामाला मुला ।
पोर्चुगलरि उन्माहेन्से “ब्रेल्साङ” कुवेतरि नोन उन्सेला चलचित्र संघला ग्रेनगौराइ उत्तर लामासे ग्रा पिन्मुला ।
