आमा मुस्युमुबा ओम
चुर्सेओर्सेला दोङ थेन
दिमला जाङला नामेजुगुसे
च्याबारि म्याङमुबा ।
आमा
ङानिदा ख्योसि दोन्बाबिमा ङ्हाच्छा
कारसुलासे
कासाउडिग्यामसे
जाक्कि कान स्यास्युमुबा
ओम बा बारि
तिलाइ बो लासि
फिक्र्यापरि ब्रान्सि टिबा
नामेजुगुदा दोना लास्युमुबा
ओम नामेजुगुसे चाबारि म्याङमुबा ।
आमा मुतेदोना
ख्रेन्सि टिबा नामेजुगु
आङगारि
आमादा ब्रान्सि टिमुबा ।
आमा मुस्युमुबा ओमि
चाबारि म्याङमुबा नामेजुगु ।
ङानि थेन नामेजुगु
खालाइ नोन टुहुरा आरेबा मुबा
आमा मुतेदोना ।
आमा कुथापरि ङ्हेबा
ब्याङबा
छाङमान चिबु चाबास्हे
गि गि लासि दुइसि
चेकाइसे चिबु ब्याङबा ग्लारि थान्स्युमुबा ओम
म्लाङगाइ, वालादा
होइसि होइसि ख्वास्युमुबा ।
आमा मुस्युमुबा ओमि
फोइथान आतामुबा
ह्योङसि ब्राबा नाकिजुगु ।
आमा दिमला स्यान ब्याङतोबा स्हेदा ह्रुप्पान
म्हेला सुङरि
राला कोलाला सुङरि
मुइला कोलाला सुङरि दोना लास्युमुबा ।
बिनोन तोमा
आमा मुस्युमुबा ओमि
खालाइ नोन फोइथान आताबा मुबा ।
आमातेन
चुर्सेओर्सेला छाङमान ल्हुइला
तिङ मुबा ।
आमा खालाइला सेमदा स्हुखाना
आलास्युमुबा
छाङमान आमातेन प्रे नोन ताङसि टिमुबा ।
बिनोन तोमा आमा मुमा
ल्हुइ लोङसि टिआतोबा मुबा ।
दोःबा : ईश्वर थोकर
