ङा गणितरि फेल ताजि
ओइ गणित
ताङ्बाला क्षेत्रफल
ल्हेना लाबा सुत्र खाजिबा हिन्ना ?
ओम म्हाङ्ला नोबा
खाराङ लासि पत्ता ल्हागाब लासे ?
केवाला खाजिबा डोबा थेन
खाजिबा पानारि थान्बा मुला
‘भेन चित्र’ स्होबारि बिसि ?
तिल्मा बिजगणित आसेमा
नाका दोबा ङा
तिनि ल्हुुइला अंक गणित आसेमा
ल्हइसे नाका स्होचिबा मुला ।
तिला गे
‘ए’ थेन ‘बि’ला सुत्रजुगु
‘भाग, जोड, घटाउ थेन गुणन’जुगु
थेरि दुङाल च्याङ्सि सुन्य आता
सुख सुन्यग्याम आल्हे
खाइ खानाङ गेतिजि
तथ्याङ्क शास्त्र थेन ज्यामितिला कोणजुगु
पाइ, अल्फा थेन बिटाला मानजुगु।
आमासे
‘सय कडा तीन’ रि छे किन्सि
ङादा चक्रिय ब्याजरि डोबारि पुइबा हिन्ना
दारे आमा काङ थानथान ब्राबा
काङफ्लाला ‘दुरी’ खाजिबा सुत्रसे दाप्से ?
आपासे ल्हुुइनाङ ब्योङ्बा
टुला आयतन खाराङ लासि तेसे ?
चुगणितला सुत्रसे गे आलानि
ङा गणितरि फेल ताजि ।
सामाजिकरि
छिमेकी छोन्बोला जन्ति
सिबाला मलामि डोपुङ्मुबा
तासाइ तिल्दा
ताङ्बा खि खाइमाइ आपिन
दुङाल खि खालाइसे आह्रि
डोसि ह्युलला सेवा लातोला
छ्योइला पानारि मुबा
तासाइ फिरग्यापह्युलला गुलाम दोतोला खानाङए डोआपुङ्नि
ङा सामाजिकरि नोन फेल ताजि
चोदे
न्होरला इफोर्ट क्वान्बारि खाम्जि बिसाम
ल्हुइला लोडजुगु
रोताङ आरेनान थिबारि खाम्ला
बिज्ञानसे तिल्दा खाइमाइ डोआपुङ्नि ?
गुरुत्वआकर्षण बाङसे
दोङ्ला आम्बा सारि ताइला
तासाइ
दिम स्होबालान लागि
दिम ख्लासि
फिरग्यापह्युलला जाम्बुलिङरिन
टु ब्योङ्सि चिबाजुगुदा
दिमला गुरुत्वआकर्षण बाङ्से
मुतेबा पल छेङ्चिला
ह्राङ राप्माला बिमा
ह्राङ केबा साला
गुरुत्व बाङ ल्हाना ताला
बिज्ञानसे तिल्दा खाइमाइ लोप्सि आपिन्नि ?
ङाला
ताङ्बाजुगुदा दुङालजुगुसे
सातान विकर्षण लाला
ध्रुवजुगु खाराङ लासि डिक्ना लासे ?
ख्रेन्बा फोसे आन्दोलन लामा
कादे डेसिवलला ध्वनि केला ?
जिम्मेवारीला घनत्व ओम
छेला चाप खाराङ लासि पत्ता ल्हागाब लासे ?
गरिबीसे बाङ्स तोकतिमा
खाजिबा ‘अम्ल’ केला ?
चु ङ्योइबाला कासाल
ङाला सर्टिफिकेटरि आरे
ङा बिज्ञानरि फेल ताजि ।
केवा ङेसि सोतोला
सान्त्वना पिन्सिचिला मुतेबा
तासाइ
आपाmा ङाइ ब्लुम्बा लगानि
ओम आमासे ङाला लागि लाबा
दुङाल म्राङ्सि ङेबारि
ङाला नैतिकतासे खाइमाइ आपिन
ङा नैतिकरि नोन फेल ताजि
आर्थिक मुसाम जेक्खे
ङ्हाच्छा वाङबारि आँट खाला
ङादा अर्थशास्त्रला सिद्धान्तसे
खाइमाइ लोप्सि आपिन्नि
ङा मि
डोस चिजि छ्योइला पेजाजुगु
निन्तर क्रेसि चिजि फिला कक्षाजुगु
तिनि फेल ताजि केवाला परीक्षारि
आज्याना लासि ब्याःजि ह्राङ्लान परिस्थितितेन ।
दोःबा : अगाध
