ङाला घाइते सडकग्याम ब्रासि
क्योङ युगसे मे म्रासि
ङाला तिङरि डुइ ग्रोप्चिमुला
ङाला मिजुगु लिखन्डि ताना लाचिमुला
ओम ङाला चेतनादा थोस्वाचिमुला
ङाला राप दोबा रे ह्राङ्बा खेःबा (पुरानो)
लि डेसि ङा कादे रे सोसे
ह्राङ्लान कादा लुसि
चु लाबा लुङ्सुररि खाराङ लासि सोसे
ङाला मुतेबा ह्यालला दिनिसे लोङ्बा गो थेन थोबोला क्राजुगु
आलानि चु सन्नितपात ताबा रेजुगु खाराङ लासि थासे
तासाइ ङा लिखन्डि तासि उन्बारि आखाम
ङा ह्राङ्ला सुङफि ओर्सि पाङ्बारि आखाम, ङाला कु फब्लेटात्न छ्याम
ङाला आत्मा थेन चित्तदा नोन
खालाइसे ग्लुसि बोर्बा प्रयास ताबा मुला
भट्टि छोङ्खानग्याम्से आइराकला प्यालाजुगुतेन
देन्बान हिन्ना, ङाला स्योङला सिल्बा क्योइतेन छ्याम ङाला का नोन
चुरि चुङ्बा मुला
चुह्राङ्बान छोर्ला दारे (विश्वास… अविश्वासरि)
थेतासि पाङ्बारि खाम्गाइ छोर्ला ङादा विवश दोसि क्राबा म्राङ्मा
ङेबा राक्षसजुगु
विन्ति ! दोसि ङादा तिल्दा क्राबा बिसि आङ्योइगो !
ह्राङ्लान आमाला ङ्हे थुङ्बा एला सुङफिजुगुला ग्रान चासि
ह्राङ्लान देउरालीरि फ्युफ्यु ह्राप्बा थे लैबरीला डान्बा थोसि
ङादा बिपिन्गो, एला याला रेखाजुगु कादे लुबा मुला
तिल्दाबिसाम ङादा छोर्ला एला आमाला आत्मा प्रेतात्मा दोसि
सातान लोङ्ना लाचिमुला एदा
योला ह्वाबाला काइदोना… म्हाङसे स्युर्सि
दारे दोसि चुरि मुतेबा बसन्तला म्हेन्दोजुगु सार्सेला मुला
स्हिल्बाला मिख्लि क्रासिकेन डाँको ख्लासि
तिल्दाबिसाम लाबासे क्रासि नोन गोबा मुला, एला पोबा, थे पोबा
दारे चु पहाडसे सातान तिरस्कार लाला ङादा
तिरस्कार लाला एदा
गुरु सेपिन्बा प्लेटो दोबा मुला चु पहाड
आमा सेपिन्बा बिजा दोसि न्हाङन्हाङरि काल्याप ताचिमुला चु पहाड
हिन्बान तिल्मादोना थेदा चुह्राङ्बा दर्शन य य य आरेमुबा
तिल्माला चु थेला दर्शन आहिन ।
खाराङ लासि दार्शनिक ह्राङ्बा दोसि चिबा मुला चु पहाड
सुकरातसे ह्राङ ख्युनप्याला थुङ्बारि तयार मुला चु पहाड
निस्चय नोन चु थेला आत्महत्या तासेला आरे
खाइमा खाइमा ङाइ चु पहाडजुगु च्याला
ङादा टिठ ल्हागतिला कि खाराङ लासि ङाइ
चुरि अभिनय लातोला ङेबाला–सोबाला
हिन्ना, ङाला फो प्लिङ्ना लापिन्ना बिसि मोक्कोनसे पाङ्ला
ओम ङा खाइमा विवश दोसि च्याला थे रुखा लिजुगु
खाइमा ङाइ थेला थे लुबा आश्वासनजुगु
ङादा नाइसि खाला… चु सहवासजुगुतेन
ङादा निस्सासाप ताबाह्राङ छोर्ला ह्राङ्लान चु सिम्बा लाबाजुगुतेन ।
ङाला दोसिला केबारि ङादा थुजुछे पिन्बा याजुगु
ङादा यन्त्रणापूर्ण पोरजुगु दोसि जिचिमुला
ङादा चु युगसे थोस्वासि, ङाला नसादा प्लिचिमुला (लुछिरहेकोछ)
खाइमागि ङादा कन्चनजंगारि क्रेसि क्रिङ्बारि सेम खाला
ङाला बोला चु तिरस्कारजुगु एसे नातोसेला मुला
ङाला बोला चु उपहासजुगु एसे ङ्यान्तासेला मुला
मेला मुस्लो ब्योङ्बा स्योङजुगुरि एसे लि ब्लुम्तोसेला मुला
ङादा क्रोला ल्हाम चोल्सि पहाडरि
ह्रोजुगु ङा तिर्याम आसिना सिबा मुला
ओम दारे छार केवा किन्सि केबा मुला
ईष्र्या थेन स्वार्थीजुगुला नाइबा हुंकारला शुक्राणुजुगुग्याम
सहार थेन संकटला पाठेदिमरि ल्हानान दुइ ब्लोसि
चु सहरसे ङादा
ङाला दोसिला केबारि
कुटिसि फ्यालाबाह्राङ छोर्ला
खाराङबा केबा चु खाराङबा जाम्बुलिङरि
थेला स्थितिजुगु
थेर्ला परिस्थितिजुगु
बालुुवाला गोङ्मा ह्राङ्बान बुल्कु मुबा ।
ङाला दिमरि खाइमाइ नोन
ङाइ सन्तोषला सा बुन्बारि आखाम्नि
थेरि ङाइ खाइमाइ नोन
ह्राङ्ला लाबा किन्बारि आखाम्नि
राप्सि डेङजुगुफिरि
ङाइ ङाला ज्योमोगाङ च्याबारि आम्याङ्नि
ङाइ ङाला ज्योमोगाङ म्राङ्बारि आखाम्नि ।
दारेम ज्योमोगाङ नोन डोङजिन्बा मुला
टिस्टा थेन रंगितला क्योइ नोन थानथान ताजिन्बा मुला
ओम ङाला कुरि ङाला डोङ्बा च्युर्जिन्बा मुला
बिले ङाइ ङ्यासे दाङसे थुङ्बा लाबा भट्टि छोङ्खानग्याम्से
आइराकला लेप्बा प्यालाजुगु आहिन
काला वाला प्याला थुङ्बा मुला
ह्राङ्लान ङोसेबाजुगुला का थुङ्बा मुला
ङेङ्गोर नोन ङेङ्गोरला लासला ताँती म्लेसि
सिमानाला रेखादा बन्धक थान्बा मुला
कल्बरीला गाङ ह्राङ्बा ह्युलरि
ङाइ का ब्योङ्बारि आम्याङ्नि
तासाइ नोन केवारि सिपसिप तापिन्बा मुला
ओते हिन्ना, ङा क्रुसिफाइ दोबारि आखाम्नि ।
एनिकादे वीर
दारे क्यानभासरि ह्युलला सिमाजुगु ब्रिसिकेन नि
एला सुविधासे स्याप्तेदोना
एला फुर्सदसे स्पाप्तेदोना
खान्दामान सिमाजुगु ब्रिसिकेन निउ
खान्दामान सिमाजुगु ल्हेना लासिकेन बोर्गो
तसाइ फ्यास्हिङ मुला !
ओम ङाला विन्त मुला एनिकादेदा
कि ङाला लिनाङ म्लाङ फोर्सिन्गो
ओम ङा लाबारि खाम्गाइ
खाजिबाइ रे साझा छ्योइ छोङ्खान ओन्छाङ स्याप्खाम्साम
सुटुक्का पाङ्बारि म्याङ्गाइ–
बल्लभ ज्योज्यो ह्राङबिमा ङा ल्हानान अभागी मुला
एला कुरि आमासे आत्महत्या लाबा ह्युल मुला
क्राबारि मिरि मेची थेन काली मुला
फ्याबारि का ल्हागतिबा गोजा मुला
तासाइ ङाला लागि चोट ल्हागतिबा दोङराप बिमा स्यान्दो तिलाइ आरे
तिङ थिना लाबा उपहासबिमा स्यान्दो तिलाइ आरे ।
दारे ङाला रेबारि म्हाइबा याजुगुरि ख्युनमुबा पुख्रिजुगु जेक्खे कोला
ओम ङादा जिबारि लिपलिप ह्राङ्ला ल्हेजुगु तेला
थेहेन्सेम पाङ्स्युगोम बल्लभज्योज्यो !
ह्राङ्ला आमाला कासे च्युर्बा दोङरापरि ह्राङ ह्राङ्ला लि च्यास्ह्युला
तासाइ ङा ब्लुमजिन्बा दोङरापरि ङाइ ङाला का ङोसबारि आखाम
ओम खाइमा ङा ङाला दोङराप म्हाइला
ङाला मिरि ङा स्हेर आरेबा दोला
ङाला स्वाजुगु ताइला
ङाला याजुगु थाला
ओम ङाला डुँडे या मुरि फुर्बा दोसि क्याचिला
ओम ङाग्याम तेबा (निष्काशित) ङालान राप थेरि च्योपिन्ना ।
(२४ दिङरिन बेजोड ह्वाइखा ब्रिबा ह्वाइखाब्रिखेन जीवन थिङ डोङ्बा नोन ५ दशक ताजिन्जि । चोथेबा प्रतिभाशाली ह्वाइखाब्रिखेन नेपाली ग्योइकाइरि च्याङ्नान मुला । थेला डोङ्बा सन् १९७५ रि कलकत्तारि तामुबा । दोःबा : अगाध)
