लक्कि ओराङबान ३५।३६ दिङला मुबा । तुन्बा तुन्बा ताम जक्कि तोते पाङबा मुबा कानपुर ला वडा नम्बर ङिस कालिमटिरि केबा हिन्ना । थेला दिमरि मिन तिला मुग्याम ङादा था आताजि । ह्रुइजा थेला लामखोर हिन्ना । ङा केबा ग्ला गाङनाम्साबिमा फिरि थेला नाम्सा हिन्ना । ङा सङकटकालला दुइरि तेमालग्याम गाङग्यापरि दोजि । ङानि एरिया गिरिन गे लातोबा ताजि । जामा तालडुङगा गाविस थेन डाडागाउ गाविस च्यातोपा मुबा । खाइमा ल्हानोन ल्हा जुरे, डाडागाउ, धनमना, बाङगे, सिरुटार थे चित्रेला तिफाइनोन तिफाइ खाबा ह्रि खाइमा तालडुङगा, डुम्रे, पथरचोक थेन जगथलि स्योप स्योप क्रोबा ब्यासि तासि ब्रातोबा मुबा । चुराङनोन लासि ब्रामा गोर्ङि ह्रो कमरेड लक्कि थेन भुमिगत आताबा डाडागाउ जुरेला लोकबहादुर सिङतान ( चिलिम फड्के) ङाला ह्रो हिन्ना । थेनि ङिह नोन ङा बिमा ग्रेन थेन्ना ओन्साङ ङा जाजा बुरा हिन्ना । लक्कि थेन ङा ह्रुप तामा कुनुन ङा नोन कानपुर गाङनाम्साला बिमा सेम फुर ताङबा मुबा । ङाइ कानपुररि कक्षा डुरि डोमा होया (मीत) स्होबा मुबा ङाला होयानोन लामाखोर हिन्ना बिसि पाङमा एला होयाला मिन तिलोम बिसि ङयोइजि । ङाइ जाजामा थेबा लेङस्याला मिन पाङमा पाप खाला रो बिसि । ङाइ आपाङजि । कुटिसि टिमा दोसि ङयोइजि एला होयाला मिन पाङगो ? उ….हु पाप खाला आपाङ । पाप साप आखा म्हिसे म्हिमि साइबा ग्लारि पाप थेन धर्मला ताम लाबा छाउरि खुरुक्क पाङगो ? ङादा माया लासि छाउरि बिजि । हिन्बाम ङा जाजान मुबा १४÷१५ दिङला । कक केक लासि ङाला होयाला मिन ज्ञानि । ङानि कापि देप्सि होया दोबा । पडप लाबा ख्लासि जिन्ज । कक्षा डु बिमा तोर आडोजि । थाङकु ब्रिबा लोप्पा मुला रो थेबा ताम पाङजि । ओदे बिमा लक्किसे ङादा हाप ख्वाइजि । मिग्याम मिख्लिन फ्रुल पुइजि । ङामि उदेक तासि लक्किला लिरि च्यासि टिजि । खाइ तिल्दा मुग्याम ङाला मिरि मिख्लिनोन आखाजि । लक्किसे तिलाइ डान्बा ह्राङ लासि पाङजि ज्ञानि ङाला ज्योज्योला जामे । ज्ञानि ङालाइ जामे हिन्ना । एला होया ङाला जामे । ए ज्ञानिला होयाया । जामेला होया ङाला जामे हिन्ना । ए जामे होया हिन्ना । ओराङ बिसि टिजि । ङादाइ बर्गिय माया बिमा काला माया थाङ खाबा म्हान्जि ।
खाइमा फोइथन खाइमा स्या म्ल्हाकन खाइमा क्युइ जे थुङसि ब्राबा दोना ब्राजि । लक्कि जक्कि बोमो रेबा म्हि हिन्ना । खालाइसे थेदा तिलाइ बिसाम थेनोन डातोबा मुबा आडासाम बोमोसे काइ ग्रेन ग्रेन लासि म्होकोदान क्रिङबा मुबा । तिल्दामान लासाइ थेलान ताम हिन्बा बितोबा थे तास समिक्षा बैठकरिजहिलेन थेसे लासि कराछेत ङयान्तोपा मुबा । ङादाम जामे ताबासे मुन्तला मायानोन लाबा मुबा । लक्किदेन छ्याम ब्राबारि नानाआङाकादे सेम आलाबा मुबा । जहिलेन क्रिङला लक्किदेन आनि बिसि पाङबा मुबा ।सुनि, चमेलि, सिता मि जन लक्किदेन छ्याम नितोसाम क्रानोन क्राबा मुबा थे तासिनोन ङा लक्किदेन छ्याम ब्रातोबा मुबा । तिरे लक्कि ङानि ङिहनोन बाङजि । थेसे जनतादा सताप लाबा बानि ङादा सेम आनिजि ।आक्रिङगो, गोल्सेसे पाङसाइ थेनोन ताम हिन्ना । आज्याबा तामनोन गोल्सेसे पाङसाम ज्याबा थेला । ज्याबा तामनोन क्रिङसाम आज्याबा थेला बिसि ङाइ पाङमा थेदा ङाला ताम सेम आनिजि । थे तासि ङानि ङिह ठकठुक ताजि । चु ताम गोल्सेसे, एरिया इन्चार्ज बुद्धि (हाल शहीद) थेन सेक्रेटरि छेटुपला न्हाब्याङरि दोजि । एरियाला मुदेबा ह्रोकादे पोप लासि समिक्षा लाजि । ह्राङ ह्राङला गल्ति सुधार लासि ब्राउ बिसि सुजाब पिन्जि । आत्मा अलोचित तातोजि । थेनोन दुइरि गाङग्याप ख्लासि ङाला कार्यक्षेत्र पागुस्योङरि बिसि जानकारि खाजि ङा थेदेन फेतोजि ।
चिलिम फड्के (लोकबहादुर सिङतान) स्थानिय ह्रो हिन्ना । थेनोन ४०÷५० दिङला मुबा । थेला दिम डाडागाउला जुरे बिबा ल्हारि हिन्ना। म्रिङ ङिह मुसाइ कोलाजुगु आरेबा मुबा । माओवादिदा ज्यान ब्याङसि ह्रो लाबा ज्योज्यो हिन्ना थे ज्योज्योदेन ल्हानान छ्याम ताजि । ङानि थेला दिमरि दोमा तिला मिन्बा टिम थेनोन चाउ बिसि पिन्बा मुबा । आरेसाम योना योना दाइसिन पिन्बा मुबा । दिगु कि साङला गेङ कि तया थेन इस्कुस ब्लोसि चातोबा मुबा। चाबा थुङबा योबान मुबा चिलिम फड्केला दिमरि । खाइमा ल्हानान रे छ्याम खाइमा अलग ताबा मुबा । ङाला कार्यक्षेत्र ल्हेजि बिमा चुते ज्याबा आङा दोसि खाला वा आखावा बिसि सुर्ता लाजि । ङाइनोन खाला मलोम तिल्दा आखासे बिसि आस ओन्जि । खाइ पाँगुस्योङरिम ल्हाना सेना खाबा मुला रो चुरिबिमा जक्कि होसियार तासि ब्राउ हया ? बिजि । ङाइ थोपो ह्योङजि । ओदे दुइरि हवाइ डान्जि ‘युद्धरि ङाला का ठाम्साइनोन वाला ताना चु सा बाम्साइनोन जालिला ग्ले ठिम पोबारि ज्योज्योआले तयार मुला निबारि ङाम तयार मुला छेबारि ङाम ।’ चुराङ बिसि ब्राबा योद्धा तिनिफेला न्हाङगार फेला रेनि हयाङ ह्रुप ताला म्हान्जि । गाङग्याप ग्यामदा ख्लासि पाँगुस्योङरि खाजि । दिनिरि तेति ब्रा आम्याङबा म्हुना कादे ब्रासे । पाँगुस्योङ बिमा गाङग्याप नोन ज्याबा मुबा म्हान्जि । छार ग्ला छारनोन ह्रोकादे, आर्मि सिभिल ड्रेसरि खाबा ओदेन ।कादे लोङसि ब्रासे । योला कान चासि लिच्छा नुहाव लाबारि बिसि छ्याप तापा मुबा झोलारि क्वान तेमा रेडियो म्राङजि खोलाप लाइ म्हान्जि । खोलाब लाबाम तामसोर खाबागेन टिम थेनोन दुइरि ‘काभ्रेको डाडापारि माओवादी आतंककारी र नेपाली सेना बिच दोहोरो भिडन्त, भिडन्तमा दुइ माओवादीको मृत्युु ।’तामसोर दोसि पिन्नावा बिमा आपिन्जि न्ब्याङ बन्द ताजि । सेम चाउचाउ ताजि खाला सिजि तालोम म्हान्जि । यारि मुबा सन्चार सेटग्याम फोन लाजि । फोन अथिजि दोसि दोसि लाजि । बल्ल रेडियो गणतन्त्ररि तामसोर पाङबा ज्योज्यो छिन्ताङसे ताम पाङजि । ङाइ सा गिरिन ङयोइजि खाला साइजि गाङग्यापरि? जनता कि हयाङलान ह्रोकादे? छिन्ताङ ज्योज्योसे पाङजि ‘लक्किदा जुरेरिन गुर्ना लाजि चिलिम फड्केदा चुङसि जगथलिरि बोर्सि साइजि ।’
थे बिमा स्हयान्दो ताम ङयोइबारि आखम्जि । ङादा होसियार तासि ब्राउ बिसि पाङबा चिलिम फड्के तिनि तिल्दा थेनोन होसियार ता आखान्जि? लक्कि थेन चिलिम फड्केला लि झलझल म्राङजि । दोसि दारेम खाइमाइ ह्रुप आदा बिबा म्हान्जि । ओदे जे अहिन चिलिम फड्केला गोर्नि म्रिङ गिजा जक्कि अपाङगाला ल्हुइ मिरि खाजि । ओन्छ्यान दारेम थेनि ङिहला साहरा खलोम खाइ म्हान्जि । होयाला आकुनोन छयाम मुला बिसि दिमरि निमा पाङतोला म्हान्नाम्हन्नान आकु लडाइरि गुर्जि बिबा ताम थेजि । ङा थोम ताजि । होयासे ह्रुप तामा ङालाइ आकु जनवाद बाबारि निबा मुला बिसि ङादा पाङला तिलासि आकु सिजि बिसि पाङसे म्हान्जि । जनवाद बाबारि ब्राबा आकु थेन लाल सेनादा ह्रो लासि खानाखानान म्रिङ ङिह ख्लासि ग्यालाम गुङरि गुर्बा लाक्क थेन चिलिम फड्केला म्हाङ खाइमा ओन्छुप दोला वा…….. सेमरि ताम क्लाङसि टिमा आर्मिसे तुम्बाक फोसि डयाङ डयाङ….. बिबा थेजि । ओदेनोन दुइरि लाबा दोना हयार्तोजि ।
