ङा आमातेन प्रे सिङगुनरि स्हेङबा आस्याङनिजाला आखेला दुन्जेरि दोजि । ओजा दुइरिन आले सत्यलाल थोकरदा ह्रुप ताबारि म्याङजि ।
तामलाम तामरि आले सत्यलालदा ङाइ पाङजि, ‘आले, काइपा आले कोशिस थोकरदा ह्रुप ताबा सेम मुबा ङाला । आले कोशिससे कोबा ह्वाइ ङ्यान्सि नोन ल्हानान दिङ ताजिन्जिम । आले कोशिसतेन प्रे टिसि ल्हेङमो लाबारि म्याङसाम कादे ताङबा खासेला ।’
ङाइ ओते तिला बिमुबा; आले सत्यलालसे ङादा तिरेम प्लिक च्यासि पाङजि, ‘ज्योज्यो, ह्राङसे दुङाल थाम्हान्गो । ह्राङनि ङ्हिदा ङाइ योनासेन ह्रुप तानालासि दोन्ला ।’
बिमाइह्राङ तामाङ ह्युल्बामाला ह्वाइ–सङ्गीत थुमला सेमतिङ आले काइपा कोशिस थोकरदा ङाइ आदेङदेङ लासि ह्रुप ताबारि म्याङजि । आले कोशिसदा म्राङसि ङा ताङजि, ङादा म्राङसि आले कोशिस ताङजि । आले कोशिसदा ह्रुप ताबाबिमा ङ्हाच्छाहेन्देन ङाइ आले कोशिससे कोबा ह्वाइजुगुदा ङाम्तेसे ङ्यान्सि खामुबा ।
सेमरि थान्सि खामुबा । तिङरि थान्सि खामुबा ।
काभ्रे जोङला रोशी–८, खार्पाचोकरि ७ कार्तिक, २०४५ रि आपा दोर्जे लामा थेन आमा ताइस्या तामाङला कुग्यामसे केवा किन्बा आले कोशिस थोकर ह्वाइ–सङ्गीत थुमला ङोसेबा गिक्खे काइपा हिन्ना । आले कोशिसदा छाङमासेन सेम निसि खामुला । आले कोशिसदा छाङमासेन तिङ नासि खामुला । ह्वाइ–सङ्गीतला थुमरि आले कोशिस गिक्खे गान्दि हिन्ना; थेन आटिना ब्योङसि टिबा । ह्वाइ–सङ्गीतला थुमरि आले कोशिस गिक्खे स्योङ हिन्ना; ब्लाप्पा आन्हाना ब्योङसि टिबा ।
ङाइ चु बिला ।
आले कोशिससे ङादा आदेङदेङ लासि पाङजि, ‘ज्योज्यो, ह्वाइ–सङ्गीतला थुमरि वाङसि ङाइ ल्हानान दिङ ताजिन्जिम । बिनोन तोमा; ह्वाइ–सङ्गीतला थुमरि ङा जात्तुकु दिङ मुमाहेन्सेन वाङमुबा । ह्राङलान बाङसे ङा दात्ते चु ग्लारि दोकाबा हिन्ना, ज्योज्यो ।’
कोशिस थोकर
ङाइ तिलाइ आबिजिमा नोन; दाबे आले कोशिससे ङादा पाङजि, ‘ज्योज्यो, ङाइ ह्वाइ–सङ्गीतला ल्हाम तिबा दुइरि ङादा खालाइसे ह्रो (सपोर्ट) आलाबा मुबा । ङा याकार–याकार मुबा– जामा । ओतेबान दुइरि ङाइ खालाइला सपोर्ट आयाङसाइ डिन्छेन आमालाचा सपोर्ट याङजि । ङाला ल्हुइला थुमरि चु ताङबाला ताम हिन्ना, ज्योज्यो ।’
काइपा कोशिस थोकरतेन प्रे
आले कोशिससे ल्हुइरि ल्हानान सङ्घर्ष लाजिम । खाइमा याकार–याकार क्रासि ब्राजिम । खाइमा फोइथान–फोइथान क्रासि ब्राजिम । खाइमा सेमला स्हु तेसि ब्राजिम । खाइमा सेमला स्हेर तेसि ब्राजिम । खाइमा दुङालला डाक ल्हिबा दोइ पुइसि ब्राजिम । ओराङबान ओराङबान दुइरि आले कोशिससे ‘सुङरि लाली …’ (२०७२) मिनला ह्वाइ तामाङ ह्युल्बामाला ओन्छाङ बासि दोकाजिम । थेलिच्छा; आले कोशिससे ह्वाइ–सङ्गीतला थुमरि फ्लिक दोसि च्याआतोजि । आले कोशिससे कोबा ह्वाइजुगु तामाङ ह्युल्बामासे सेम निसि खामुला । आले कोशिससे कोबा ह्वाइजुगु तामाङ ह्युल्बामासे तिङ नासि खामुला । आले कोशिससे तिनिदोनामा तामाङ ह्युल्बामादा ल्हानान ह्वाइ–सङ्गीतजुगुला डाङ दोन्सि जिन्मुला । आले कोशिससे ब्रिबा, कोबा थेन सङ्गीत दोन्बा ह्वाइजुगु तामाङ ह्युल्बामाला सुङसुङरि च्योसि खामुला । दात्तेला छार पुस्ताला गुङरि आले कोशिसला ह्वाइजुगु ल्हानान लोकप्रिय मुला । ह्वाइ–सङ्गीतला थुमरि चुते सफलता याङबारि आले कोशिससे कादे सङ्घर्ष लातोजि ? थेमि आले कोशिस तान था मुला ।
ङाइ चु बिला ।
