‘लाउ याम्बु निबा दिङ गिक्खे सुताइ आछ्योजिमान तोच्चा गोलेम्हेला माइसे खारेन रिल गाप्ना म्हार क्वान्सि नाम्सारि दोगाजि होइ ।’ योला दिगु बडानाङ बाप गाङसाल दानदान स्वाड डुइसि स्याङतान खेप्पासे ह्राङला सेमताम घिसिङ बबुतेन थान्जि ।
‘म्हेमेलाम क्याम्साङ ब्लेला योन्जनला तिउरिसेम झन याम्बु निबा ला ब्लिरिन तोला ङ्हि म्हार छाबा रो बिमुला । तिला ओइमा न्हाब्याङ थानथान ह्योङब्राबा थेला आमाचासे क्यो जामेसे पुइगाबा बेरुवा म्हार न्हाब्याङनोन फेटटाङला ह्राङ छेसिङ निमा सुताइ क्वान्ब्राबा ।’
‘थेनिगादे चुलान दौतारिन म्हाले । खाइ चु ताइस्याजा १६ दिङ वाङजिन्जि तिलाइ सुर आरे ।’ स्याङतान खेप्पासे मुइ मामादा खोले फ्योर्बान स्यान बाडारि बाप युसि घिसिङ बबुदा पिन्गे लाचिबा छायाला लिरि च्याबान बोडोक्जि ।
‘ह्रोन्नाम ङेङगोरजुगु याम्बुरि मुबासेगा चोसो ताबोम म्हेमे । खाइ ह्याङलाम खालाइ आरे । दारेम ङानोन पचासरि वाङजिन्जि तिनि दोना याम्बुला लि म्राङबा आरे । ओन्छ्यान म्हुइसाङ माच्याङमि क्योलोलो १६ दिङरि वाङबा म्हिदा तिला बिसे ?’ स्याङतान खेप्पादा वाम्बा तोसोसे योन्जन बबुसे ताम थान्जि ।
‘हिन्बाम हिन्ना होइ बबु । ओन्मा तिर्याम आइरक ताङ किन्बारि नितोजि बिसि तयार तामुबा खाइ न्होरए आतानि, ह्रोए आस्याप्नि । ओस्सोन ल्हुइ निजि ।’ स्याङतान खेप्पासे नोन ह्राङला सेमताम थान्बान ङ्योइजि, ‘आहिन बबु थे गलैचाजा खाराङबा स्हे हिन्ना ओम ?’
‘तिला थाहा म्हेमे गोलेम्हेला माइदा ङ्योइमा थेसे बिमुबा ओन्माला थारेह्राङबा रो ।’ घिसिङ बबुसे बिजि ।
‘थारेरिम न्होर आखामुबा । चु स्हेरिजा आउदिन न्होर ताबाचिम ह्वा । हिन्बाम ओन्मा थारे रासि चुङबारि ग्लुबा म्हि आरेबासे नोन मुताला ?’ स्याङतान खेप्पासे दोलोला बाडा नाङ बाप जिन्ना लाजि । चोदे मुसाम दारे म्रेन्जि बिबा तोसोरि फो न्हाइबान क्रेप्सारि के खिसि घिसिङ बबुतेन म्राङरिमार हाङसु बोर्सि फाप्जि ।
ह्याङला ह्युल नाम्साला चलन नोन चुराङबा मुला । न्होर, सम्पति छा खाम्बा पौरखि जा, जामे, छाया छुया दिमथेमेला सेमचेमो ताबा, थाइथाइ लाबा । आखाम्बादा हेपप लाबा, बाङबा, केबा । म्हुइसाङसे म्हेमेनि थोन्सि ब्रजिन्माहेन्से डान्जि, दिङगिरि सुताइ गोइलो गि पोआखाम्बा ह्राङला आपा । स्ह्यामाम ओन्मा ब्रेल्साङरि तिर्याम ङान्छि ख्वाइबा बिमा चुर्से ल्हेजाङ बिबा खाइमाइ ख्वाइआम्याङबा आमा । बाङबोङ सार्बा क्रादा गाप्बारि कुलाकि कुमा डेसि सिकसिक ताबासे गापआखाम्ना ग्वाङग्वाङ जाङह्राङ ताबा म्हेमेला थोबो । न्हाबाहेन्से चुर्से मुठिनाङ लेप्पा ज्याना लासि चाआम्याङना ल्होडे दोबा फोरि राइसोक्खे म्राङबा कुपोसित आले । दोसि थेसे डान्जि, ह्राङसे ह्राङबान दुङाल पुइसि छार्बा ह्रो गोलेम्हेला माइतेन योन्जनम्हेला तिउरि माइलि । च्याना च्यानान थेला लिसे म्राङजि, तिला ओइमा जेक्खे लिखन्डि मुबा थेनिङ्हिला खारे उरउरबा म्हारसे रिख ख्वाइसि निबा । थेला आपा आमासे छारछार गोइलो क्वान्बा । दिमनाम्सारि दाते थेनि ङ्हिला बिबा स्यान्दो खालाइला ताम आरे । खेप्पा, खुयु, ब्योन, छामे, जातुगु खालदामान मुगाइ । थेनि ङ्हिलान फयान । दोसि थेसे डान्जि दोलो जेक्खे म्हेमेसे घिसिङ बबुतेन लाबा बात, ‘थेनिगादे चुलान दौतारिन म्हाले । खाइ चु ताइस्याजा १६ दिङ वाङजिन्जि तिलाइ सुर आरे ।’
माबारगाङ दिला चु लाप्से नाम्साला तिनि दोना खालाइ याम्बुरि दोबा आरे । छे–सिङ, म्हे–मुइ, रा–नाका लासिन तिनि दोनाला जुग निजि । याम्बुरि दोतोबा तिलाइ आतुरि आतानि । चाबा थुङबारि ह्वारा, म्राङला बालिसे छ्योआछ्यो दिङ दाङसिन खाजि । थेबिमा ग्रेन म्हाङए खाइमाइ आम्राङनि । तोथाङ माथाङ छेवार, ब्रेल्साङ, गेवारि नितोसाम नाम्साला मुबाजुगुला गोइलो ङान्छि टारतिमुबा । सेम आछुबा तामजा गिक्खे मुबा, जात्रामात्रा । थे दुइरिजा नाम्साला छारक्वान मुबाजुगु नोन निबासे आरेबाजुगुसे पोआम्याङबा । आहिन्साम चु नाम्सारि गुनासो बिबा तिलाइ आरेबा ।
चु म्हेनिङरि गोलेम्हेला माइतेन योन्जनम्हेला तिउरि दोगाजि । दिमम्हेदा थाहा नोन आपिन्ना सुटुक्क थेनिङ्हि ह्रुप तानिजि म्हुइसाङसे । ओहो, ओइमा नाम्सारि मुमा ह्राङसे ह्राङ ख्याबा ग्ला सुताइ आरेबा क्वान क्वान्सि ब्राबा थेनिङ्हि टिसर्टतेन पायन्टरि कादे जेना म्राङबा । फुङसार्बा लिए छ्योपछ्योप तासि खाजिम । ठ्याक्कान मामसे सुङबा रापला परिह्राङबान । थेन्ना ल्हुइ म्राङसि म्हुइसाङ थोमबोर्जि ।
‘ओइ तिदा थोमबोर्जिबा ?’ तिउरिसे म्हुइसाङला ग्राम्बारि यासे प्याट्टा छेप्सि ङ्योइजि ।
‘ङा…ङा…ङाए याम्बुरि नितोजि । एन्तेन…।’ थेनि ङ्हि ह्राङलान ह्रो तासाइ तिक्खुरि फेदछोर्बा म्हिह्राङ हडबड तासि म्हुइसाङसे पाङजि ।
‘ताइस्या…।’ तिउरितेन गोलेम्हेला माइ ग्लाडाकडाक ङेजि ।
‘ङान्दामि तिमाले आपालेङसे बोर्सि निबा । ए पाजिदा खाल्से बोर्ला ओम ?’ थे ङ्हिसे ङोसि पाङजि, ‘गलैजा राबारि नोन आखा । तिला गे ए पाजिला ।’ तिउरिला आपासे तिमाले दोङतेन लेङ स्होमुबा । बोगाल गिसे च्युइतेला थे म्हि रा छोङ लामुबा । योन्जन खेप्पा ताम्बा ताबासे क्याम्साङ जासामला ङेङगोरतेन ज्याबा सम्बन्ध मुबा । चु नाम्सारिक्यार रा म्हाइबारि सजिलो तागाइ बिसि थेसे योन्जन खेप्पातेन लेङ स्होबा हिन्ना । दोङ खेप्पाला अन्सार थेला कोलाला याम्बुरि गलैचा कारखाना मुबा । कोलाला कारखानारि राबा म्हि तोबा रो बिसि थेसे लेङला जामेतेन गोलेम्हेला माइदा बोर्मुबा । चु दोङतेन स्याङतान खेप्पाला तिलाइ साइनोसम्बन्ध आरेबा ।
‘ल्होगो ल्होगो । थेराङ आबिउले ह्रो ।’ थेसे ह्रोङिसे ङोबा ताम आगोनि, ‘एन्छेह्राङ नोन ङाइए योनान राबारि लोप्सेला मुला ।’
‘च्यागेले दारेम तिला तामु ? याम्बुरि दोबा दुइतेमा… ।’ थेनि ङ्हि न्हाब्याङरि खासखुस लासिलिच्छा बिजि, ‘खालाइदा तिलाइ आबिउ, एदा खबर लाला ।’ साहुदा याम्बुरि गे लाबा छारछामे तोबा ताम डान्सि थे ङ्हिला लि ह्याल ताजि । म्हुइसाङ म्हुइह्राङबा जागजागबा मुबा ।
नाम्सारि म्हेनिङ, तिहार जिन्जि । दोगाबा डोन्बो, ङेवाङेङगोर ह्राङह्राङला दिमरि ब्राजि । तिनि ह्यालाला तामा थेनिसोमए याम्बुला लागि ग्याम दाङजि । माबारगाङग्याम जुकेपानि, भदौरे ताबान रोसिला मङगलटार फाप्जि । तिनपिप्लेग्याम झोलुङ्गेपुल क्रेसि डाप्चोङगाङतासि नमोबुद्ध वाइजि ओम बोदिला बसपार्करि दोगाजि ।
‘ओइ गोलेमाइ च्यागोले होइ दिमखेप्पा होरोरो छ्योङबा ।’ दिमह्राङबास्हे कुल्बा म्राङसि म्हुइसाङला ब्ला म्हाजि ।
‘तिगाला दिम हिन्से बस सुताइ ङोआसेबा… ।’ तिल्मा ह्राङए नोन चुराङ लासि हाथोम्बा ताम म्लेसि गोलेमाइसे बिजि, ‘म्हिसे पाखे बिला । कुटिसि चिउ । आसेबा तामदा एदा तिल्दा ङ्यान्बा खाचितोबा ।’
‘दारे थेदा गोलेमाइ आबिउ माया बिउ । ङादाजा तिउरि आहिन जिया बिउ ।’ सभ्यताला मिनरि सहरि वातावरनला कुरुपतारि ह्राङला नाम्साला सोझो लि ब्याङजिन्बा तिउरिसे बिजि, ‘नाम्साला ह्याङला मिन तेसाम चुरि नाकिसे सुताइ ब्रेला । दारे एला नोन मिन– प्रिति ।’ थेग्याम बस बिबा दिमह्राङबा स्हेरि क्रेसि थेनि याम्बु खाजि । म्हुइसाङदा बसरि चिमा नाम्साला पिङ क्रेबा ह्राङ ङ्हाम्जि । बसग्याम आफाप्तेदोना ह्राङ चिबा सिट पिङला छोदाह्राङ यासे आस्योर्ना लासि कोङना चुङचिजि । कुल्बान लामा ग्लाग्लाला खाल्टाखुल्टिरि बस ह्योइ तामा ब्लाङगुर्मुवा बिसि ह्राङपट्टि ओसो खे्रन्बारि म्हाइजि । रत्नपार्करि दोगातेमा थे टुस्याल ताजि । यातिङरि छ्युल्दु रेसि होपहोप क्रोजि ।
‘आच्या चु बस बिबास्हेला नोन म्हि, रा–म्हेला ह्राङनोन जाजाकोलाजुगु नोन ताबाचिम ।’ रत्नपार्कहेन्से पुतलिसडक ताबान माइतिदेवि दोना ब्रासि निमा खाइमाइ आम्राङबा ट्रक, बस, ट्याक्सि, मटरसाइकिल, साइकिल म्राङसि म्हुइसाङ छक्क ताजि ।
‘ओन्छ्यान चुजा खाइमा ग्रेन तालोम ?’ गिक्खे म्हि थोसि डिल्लिबजार ग्युरु छ्योङबा साइकिल म्राङसि गोलेमाइदा ङ्योइगे बिसि थेला या ह्राक छेङजिन्मुबा थेसे तिउरिसे दोलो बिबा ताम थुम डान्जि, ‘म्हिसे पाखे बिला आसेबा ताम आङ्योइगो ।’
ङ्यासेछुप तामा थेनिसोम डेरारि दोजि । माइतिदेविरि मुबा थेन्ना डेरा ज्याबा बन्दोबस्त मुबाला । धारारि निसि थेन्से या लि ख्रुजि । गोलेमाइ कान दाइबा मेसो लाजि ।
‘एन्छे कान दाइबा आलाबा वा ?’ कुदाप आम्राङबासे म्हुइसाङसे तिउरिदा ङ्योइजि ।
‘लाउ चुजा तिला ओम ? ग्यासला कुदाप बिबा चुनोन म्हाले ।’ तिउरिसे बिजि, ‘तिरे ङ्हिरेमा एदा क्योङनोन थाहा ताला ।’ खु किन्बारि तिउरि पसलरि निजि । कुकररि कान कारसि गोलेमाइ दाल ग्लुबारि माङग्यार थोन्जि । म्हुइसाङ म्हाङरि सुताइ आम्राङबा स्हेजुगु याम्बुरि म्राङमा म्हाङराङ छोर्सि सेमताम लाबान तिसारि प्रोङ ताचिजि ।
‘सुइया…स्या….।’ कुकररि सिठ्ठि ङ्ह्याजि ।
‘आबिले….।’ म्हुइसाङ लोङसि माङग्यार प्योल थोन्जि, ‘ल्होगो चु कोठारि तिला स्हे फोगे लाजि ।’ छामेगि लोङसि छोनछोन दार्सि क्रिङबा म्राङसि म्हिजुगु पोप ताजि ।
‘खाइ तिला ताजि ? खाइ तिला ताजि ?’ म्हिजुगु थेला कोठारि वाङसि च्याजि ।
‘धत् । कस्ति गवार रहेछे । कुकरको सिठि लाग्दा तर्सिने ?’ च्यागाबा म्हिजुगुसे ब्रेजि, ‘भखर गाँउबाट आएकी हो कि क्या हो ? कुकर पनि नदेखिकि…।’ थे म्हिजुगुला ताम थेसि म्हुइसाङ स्योलपेजि ।
‘फिरग्याप निदोबा ।’ म्हेर्बा दुइरि म्हुइसाङसे तिउरिदा ङ्योइजि, ‘थारेङनोन दोतोला कि ?’
‘लु उथेरि निउ ।’ क्यार्सेला कोठारि बिजुलि म्रासि म्राप ठ्वाङपिन्जि गोलेमाइसे । थे कोठा न्हाङरि वाङजि । फिरग्याप निबा ग्ला म्हाइजि । टायल तिबा चु कोठारि गिक्खे बिर्गो गापथान्बा तारबक्सा मुबा । धारा गोरङ्हि सोम मुबा । साबुन चिम बास्ना खाचिमुबा । कोठग्याम माङग्यार थोन्बा ग्याम आस्याप्नि । गिक्खे जाबा झ््याल मुबा । चुग्याम थोन्खाम्बा स्थिति आरेबा ।
‘फिरग्याप नि बिबाम खाइओम ग्यामजा ?’ चुग्याम थोन्सि कोठारि निसि थेसे तिउरिदा ङ्योइजि ।
‘हि हि हिहिहि…।’ तिउरि ङेजि । थे तिदा ङेजि म्हुइसाङसे ताम आगोनि ।
‘फो स्हुहासि सिलाजि । योनाले ।’ म्हुइसाङसे बिजि, ‘फिरग्याप निबा ग्याम ङ्योइमा तिल्दा हिहिहि बिसि ङेचिबा ।’
‘चुरि खाउ ।’ तिउरिसे दोलोलान कोठारि बोर्सि बिजि, ‘याम्बुरि ट्वाइलेट बिबा चुनोन हिन्ना । चु कमटला बिर्को चुराङलासि ओर्गो आसेम चुराङ लासि चिउ ।’ थेसे लोपपिन्जि । ट्वाइलेटरि सुताइ चिआसेबासे म्हुइसाङ दोसि स्योलपेजि ।
योरि रेसि चिया थुङजिन्माहेन्से पिसिओरि निसि तिउरिसे साहुदा फोन लाजि । नाम्साग्याम गे लाबा म्हि बाबा ताम थेसि साहु ताङजि । तिउरि थेन गोलेमाइदा जेक्खे ङ्योइसि साहुसे म्हुइसाङदा छारक्वान ग्लुपिन्बातेन पार्लररि बोर्सि मेकअप लाबारि न्होर पिन्जि ।
‘क्वान ग्लुबारि बजाररि ब्राइ ।’ तयार ताबान गोलेमाइ थेन तिउरिसे म्हुइसाङदा बिजि । याम्बु खाबातेन छारक्वान क्वानम्याङबा तामसे म्हुइसाङला सेम फुरताङजि । सेमसेमरिन ह्रो ङ्हिदा थुजेछे पिन्जि ।
‘एनि ङ्हिमि ङाला आमातेबानगा ताजि । बरु आमासे तिनिदोना चुराङ लासि क्वान ग्लुपिन्आखामन्नि ।’ माइतिदेविला फेन्सि पसलरि क्वान दाम्बान म्हुइसाङसे बिजि, ‘चुजा स्ह्यामातेन आङग्रे ङादा जेसेलाह्राङ मुला ।’ म्हुइसाङसे स्ह्यामा साम्सि तोरओर मारओर लासि च्याजि ।
‘ताइस्या चु नाम्सा हिन्गाइवा ?’ तिउरिसे बिजि, ‘स्ह्यामा क्वान्बारि ?’ सोमनोन ल्होसि पाइन्टतेन टिसर्ट दाम्जि । माइतिदेवि चोकला पुलिस बिटतेन थुइबा ‘सुन्दरि पार्लर’रि वाङजि । तिउरितेन गोलेमाइला ग्रोइअन्सार क्रा थाजि, लिरि साङाला ब्रा ह्राङबास्हे फोर्जि । नाम्साला स्ह्यामा ब्याङजि । पाइटतेन टिसर्ट थोइजि । आइनारि राप्मा ह्राङला लि म्राङसि म्हुइसाङला ब्ला म्हाजि । दोलोला ल्हेजाङला स्यामा थोइबा क्रानोइ कोइलिला जाङह्राङ च्यागारच्युगुरबा मुबा म्हुइसाङ दाते मामसे सुङबा रापला परिह्राङ जागजागबा परिह्राङ म्राङजि । थेला ङामरि तउिरि, गोलेमाइजे आहिन थे पार्लररि मुबा दोलोला जेबा म्राङबाजुगुम दातेम बकुल्लोला ङ्हाच्छा कोइलिह्राङगा म्राङजि ।
रेला न्हिते बजतिमा थेनि सोम गे लाबा ग्लारि दोजि । नाम्सादिमरि तिहाररि म्राबाह्राङ म्रापरिक्यार बिजुलिला झिलिमिलि नाङसाल म्रामुबा । न्हाब्याङनोन बैरे ताला बिबा तोसोला डुकचुक डुकचुक काइरि ह्वाइ ह्राप्चिमुबा । म्हुइसाङसे ह्वाइ गोआखाम्नि । अफिसन्हाङरि वाङसि ओसो क्यारमार च्याजि । टेबुल कुर्सिजुगु डिक्ना लासि थान्मुबा । डेङरि स्होथान्बा र्याकरिक्यार खाइमाइ आम्राङबा रङबिरङला बोतलगादे मुबा । टेबुलरि चिसि आइरक थुङचिबा म्हिजुगु म्राङसि थेसे अनुमान लाजि, ‘चुजुगुजा गलैचाला साहु मुनाम ।’
‘लासो लाउ ।’ तिउरिसे कुल्जि, ‘चु ह्याङला साहु ।’ वाला फोर्सि वापफ्युरबा क्राबोन खिबा थोबो, न्हाब्याङ कुन्डल क्वान्बा च्यामान चोनलोङबा तोसोला म्हि थेला ङ्हाच्छा मुसुककुसुक ङेबान दारापकाजि । चोन निबासे थेसे लासो लाबारिन स्योङम्लेजि ।
‘थाङक्यु जिया ? माल त राम्रै पो ल्याइछौ ?’ तिउरिला ग्राम्बा यासे खोइच्यार्बान साहुसे बिजि ।
‘मेरि डार्लिङ माया… ।’ टेबुलरि आइरक थुङचिबा गिक्खेसे गोलेमाइदा म्राङबाछ्याम ह्वापख्वाइसि कुरि थान्जि ।
‘पेबा म्हाबा नकचरि… ।’ गोलेमाइला ब्योहोरा म्राङसि म्हुइसाङसे सेमसेमरि केजि ।
‘छि चु एला आपलेङ दोङला जा बिबा आहिन ।’ म्हुइसाङसे तिउरिदा ङ्योइजि, ‘आपालेङला जासेनोन आपलेङला जामेदा ग्राम्बा च्यार्लोम ? गलैचाला साहु रो तिगाबिना छ्याकाप ताबा ?’
‘चु गलैचा कारखाना आहिन ङाला छार डार्लिङ । चुमि क्याबिन हिन्ना । क्याबिन… ।’ साहुसे म्हुइसाङला बामरि या थान्बान पाङजि । म्हुइसाङसे बामग्याम साहुला या छ्याल्हिजि ।
‘तिल्दा फेलोङबा डार्लिङ ?’ साहुसे ङ्योइजि ।
‘ङादा बिथारि बामरि या थान्बा ज्याना आङ्हाममुला ।’ जाबा काइरि तासाइ थेसे बोमो ल्हुजि ।
‘गोलेसे बानि ताला ।’ साहुसे ङेसि चोदेजे बिजि ।
गलैचा बिबा तिला ? क्याबिन बिबा तिला ? म्हुइसाङसे तिलाइ आगोनि । थेदा ओदेजे थाहा मुला, तिउरितेन गोलेमाइसेह्राङ न्होर छातोला ।
‘गलैचारि सिबादोना गे लासाइ न्होर आताबासे ङान्छे चुरि गे लाबा हिन्ना ।’ तिउरिसे म्हुइसाङदा पाङजि ।
‘चुरिजा तिलतिला गे लातोबोम ?’ म्हुइसाङसे ङ्योइजि ।
‘तिलाइ लाआतोबागे । थुङबारि खाबा ग्राहकजुगुतेन चितोबा, ताम लातोबा, थेन्से पिन्बा चातोबा, चाबुचिबु ताङजुगु स्याल्तोबा, साहुसे कुल्बा ङ्यान्तोबा बस् ओते जेक्खेगा ।’ तिउरिसे गेलाबारे बेलिबिस्तार लाजि ।
‘चुराङबा सजिलो गेदा नोन गे बिसे ?’ थेला नाम्साला सोझोसेम सुङग्याम प्योलथोन्जि । नाम्सा दिमरि गे लाबारि खालाइसे आस्याप्बा थेदा चुराङबा याङबा (हलुङगो)गे थेसि तिलाइ सुर्ता आतानि ।
‘चु होटल हिन्ना ?’ क्याबिन बिबा आगोना ह्राङसे गोबा तामरि म्हुइसाङसे ङ्योइजि ।
‘हिन्ना बिसाइ ताला । तासाइ थेह्राङबानजा आहिन ।’ तिउरिसे बिजि ।
‘तलबजा कादे याङलोम होइ ?’ म्हुइसाङसे ङ्योइजि ।
‘गे लाखाम्साम, साहुसे कुल्बा ङ्यान्साम लाला चालिस पचास हजारते…।’
‘हो आमा चोदेला….?’ तलब थेसि थे फेलोङजि ।
ङ्यासे ताबान निजि । तिउरितेन गोलेमाइ थेरि चाबा थुङबारि खाबा म्हितेन नाराब ताबान चाबा थुङबा लाचिजि । थेदा साहुसे काउन्टररि चिउ बिबासे क्यारमार आह्योङना थेरिन चिजिजि । खे्रन्जिकि बिसि दुइदुइरि चाबास्हे नोन बापिन्जि ।
‘कादे याङबा गे…।’ तिगिरि फुरफुर ताङसि थेला सेम ग्लारि आरे ।
‘चाबुचिबु ताङ स्याल्तोला बिमुबा ? खाइ तिल्दा थे गे आकुल्बोम ?’ तिगिरि थेला सेम तिल्दा मुग्याम लोङना लोङना ङ्हाम्चिमुला, ‘चुकादेला चरित्र ज्याबा आम्राङनि ।’
म्हुन ताजि । क्याबिन डुङजि । साहुसे ट्याक्सि ङ्योइजि । थेरि चाबा थुङबा ग्राहक ङिह्, साहुतेन थेनि सोम वाङआवाङ गिला कुरि गि लासि क्रेजि । ट्याक्सि गौसालाला गेस्टहाउसरि निसि रोकतिजि ।
‘चुमि ह्याङला कोठा आहिन लोम होइ ?’ थेसे गोलेमाइदा आसंका ब्यक्त लाजि ।
‘साहुला दिम म्हाले ।’ गोलेमाइसे ताम लुजि ।
‘तिल्दा खाबोम ?’ थेसे ङ्योइजि ।
‘तिनि गाइबासे कोठा आठ्वाङ ओसे लासि ?’
थेनि डु नोन न्हाङरि वाङजि ।
‘ओहो चु साहुम कादे धनि चिम । दिमरि नोन गे लाबा म्हिजुगु सोक्खे ?’ डेङरि आइरक म्राङसि थेला सेमसे बिजि, ‘दिमरि सुताइ दोलोला होटलरिह्राङ आइरक सोक्खे ।’
गोलेमाइतेन ब्योनगि गिक्खे कोठारि वाङजि । तिउरिसे नोन थेराङनोन लाजि । थेदाजा साहुसे खाउ बिसि स्यान कोठारि बोर्जि । खाट गिक्खे मुबा । तार तन्नासे रिल्बा तिसा म्राङसि तिल्दा मुग्याम म्हुइसाङदा चु खाट ह्रेम्बो सिसि उराठ ताबा ज्यार्तिस्याला लि ख्वारख्वार स्याजि ।
‘चुरि चिउ ।’ साहुसे यारि चुङसि खाटरि थेदा देगछ्याना लाजि । साहुनोइ टेपफोइला तोसोसे थेला ङामरि चिजि । चोदे ङामरि तिनिदोना थे ह्रेम्कोलातेन आचिबासे मुजिवा तिल्दा मुग्याम साबुनोन फेट्टाङला तोसो ताजि । वाप वाप तासि खाङबा लारि सुताइ लिरिक्यार स्हारस्हुर टु खाजि । तिला लासे तिला आलासे थामथोमरिन म्हुइसाङ जाकि क्याथाङ ल्हेजि ।
‘खायोम थेनि ?’ दार्बा काइरि म्हुइसाङसे ङ्योइजि ।
‘म्हेर्निजि ?’
‘आबि थे ह्रेम्कोला थेन्ना फा वा ?’
‘आहिन न्होर पिन्बा ग्राहक । तिनि म्हुगिला पाँच हजार ।’
‘ह्रेम्कोलातेन म्हेर्मानोन न्होर याङला ? ङा खानाङ म्हेर्सेओम ?’
‘ङातेन ।’
‘धत्…।’
‘लोङआतो एनोइ या थानथान निआदो । थेन्छे बिमा ल्हाना….’
‘साहुदा ताङना लाउ । लाला चालिस पचास हजार…।’ थेला न्हाब्याङरि दोसि दोलो तिउरिसे बिबा काइ होङजि ।
म्हेमेला डुनडुन्बा कुलाकि, आपासे खाइमाइ पोखाम्बा क्वान, आमासे ख्वाइआम्याङबा स्यामा, आलेसे चाआम्याङबा पोसन….. । थेला सेम रामपुरस्योङला घट्टाह्राङ स्याबाचुजि । साहुसे गोल्से हापख्वाइसि तिसारि लाइनुदाह्राङ स्योन्तोलोङ नाइजि । थेला सुङफिरि साहुला सुङफिदोना लाजि । थेला ल्हुइ बिथालान चाउचाउ ताजि । लोङबाह्राङबा दार्बाह्राङबा । खाइ ल्हुइ तिलताजि तिलताजि ?
‘ह्रेच्छाक ब्रान्गो ।’ म्हाङग्याम फेदछोर्बाह्राङ तिक्खुरि म्हुइसाङ डोङरेजि ।
‘थुक्क नाकि…।’ साहुला लिनाङ थो स्वासि प्रोङ निना ल्याक्पासे छेप्जि ।
‘अस्तित्व ब्याङसि छाबा सहरला न्होर बिमा फोइदान, लिखन्डि चिबा नाम्साला ठिमज्याबा । म्हुइसाङ फ्लिकदोसि नाम्सा ह्यार्जि । थे नाम्सारि दोगाबा रो बिबा थेमाहेन्से रा छोङ लाबा दोङ सुपम्हाजि ।
