बौद्ध दर्शन प्रवर्द्धन तथा गुम्बा विकास समितिग्याम स्हेङ्बा गुम्बा डिबा सम्बन्धी विशेष तालिम ज्याना लासि जिन्बा मुला । तालिमला मुख्य उद्देश्य गुम्बाजुगुला उचित डिबा, संरक्षण थेन धार्मिक गतिविधीजुगुला प्रभावकारी समन्वयला लागि बोकिन्बाजुगुदा तोबा सीप थेन ग्युइ पिन्बा मुबा ।
याम्बुला होटेल रोयल एयरपोर्टरि ङ्हिरे दोना ताबा तालिमरि ह्युलनाङ्ला छ्योआछ्यो ४४ गुम्बा स्थानीय गुम्बा डिपा, धार्मिक गुरुजुगु थेन प्रतिनिधिजुगुुसे बो किन्मुबा ।
तालिमरि गुम्बा विकास समितिला कार्यकारी निर्देशक होम दोङसे गुम्बाग्याम खाबा ग्युइदा समुदायतेन थुइबाला छ्याम ह्राङ्ह्राङ्ला गुम्बा न्हाङ्ला डिबा चुस्त थेन दुरुस्त थान्तोबा बिसि पाङ्जि ।
तालिमरि रामबाबु सापकोटा, विनिता भण्डारी, सन्जिवकुमार लामा, गंगाकुमारी गुरुङ थेन योजना अधिकृत सन्जु योङ्गयासे गुम्बा डिबारि खाबा समस्या थेन गतिविधिजुगुफिरि प्रशिक्षण पिन्मुबा ।
तालिमरि गुम्बाला दोङराप, रिमठिम थेन धार्मिक महत्वफिरि गोना लाबान गुम्बा डिबाला चुनाउतिजुगुफिरि जानकारी पिन्मुबा । तालिमसे गुम्बा संचालनला लागि तोबा स्रोतसाधनला डिबा, आर्थिक पारदर्शिता थेन धार्मिक गतिविधिजुगुला डिबारि विशेष बाङ पिन्मुबा ।
गेताङरि बोकिन्बाजुगुसे गुम्बाला रेदाङ्सेला प्रशासनिक गे, संरचनागत मर्मत, धार्मिक गतिविधिजुगुला दुइ तालिका थेन सामुदायिक बोकिन्बाफिरि विस्तृत काठुइ लामुबा । बोकिन्बाजुगुसे गुम्बा डिबारि म्राङ्बा समस्याजुगुला समाधानला लागि ल्होलो उपायजुगुला प्रस्ताव थान्मुबा ।
तालिमला प्रमुख प्रशिक्षक सन्जु योङ्गयासे गुम्बा जेक्खे धार्मिक ग्ला आताना रिमठिमला धरोहर नोन हिन्ना । चुला ज्याबा डिबासे ह्याङ्ला धार्मिक थेन रिमठिम ङोसेबादा सोना लाबारि महत्वपूर्णयोगदान पिन्ना बिसि पाङ्जि ।
तालिम जिन्मा बोकिन्बाजुगुसे तालिमग्याम याङ्बा ग्युइ थेन सीपजुगुदा गुम्बा डिबारि लागू लाबा प्रतिबद्धता थान्जि ।
तालिम जिन्मा ल्होलो जिल्लाला गुम्बाजुगुग्याम बोकिन्बा प्रमुख लामा, चोहोजुगुदा प्रमाणस्यो पिन्मुबा । प्रशिक्षकजुगुदा नोन कदरस्यो पिन्मुबा ।
