ओखलढुंगा ह्याङ्ला तामाङ समाज, याम्बुसे असोज ५ गते कामरेकुनु नयाँबस्ती याम्बुला भैरव स्मृति दिमला सभाहलरि ‘तामाङ ग्योइ, धर्म, रिमठिम थेन ठिम’ नुररि काठुइ लाजि ।
लुम्विनी विकास कोषला ङ्हाच्छाला मुल्मि गौराइ अजितमान तामाङसे नुर फिरि ह्राङ्ला साल्मो थान्बा मुबा । गेताङरि गेन्दुनला स्हेङ्खेन चोहो, ङ्हाच्छाला चोहो, ग्रोइपा, जेष्ठ नागरिकजुगुसे बो किन्मुबा ।
गेन्दुनला चोहो अशोक सिङ्दनला आन्सार ओखलढुंगाग्याम याम्बुरि खासि ल्होलो पेशा छोङ लाचिबा तामाङजुगुला ग्योइ, धर्म, रिमठिम, परम्परा, चालचलनदा सोना लासि थान्बारि चुह्राङ्बा गेताङ स्हेङ्बा हिन्ना ।
गेताङ गेन्दुनला स्हेङ्खेन चोहो प्रेम सुन्दर तामाङसे टासि मोलम लासि चुबा मुबा बिसाम ह्याङ्ला ताम्बा समुहसे साङसेरकेम लाबा मुबा ।
चोहो अशोक सिङ्दनला चोहोदानरि ताबा गेताङरि डेनताम न्होरचोहो दीपक तामाङसे थान्मुबा बिसाम ग्रेनगौराइ एम. पाख्रिनसे संचालन लाबा मुबा ।
