खाराङ लासि ह्रेमकोलादा आक्योइ तिलाइतेन
जामेकोला तिल्दा जामेकोला दोसि सोबारि आयाङ
जामेकोला तिल्दा म्हि दोसि सोबारि आम्याङ ?
खाराङ लासि ह्रेमकोलादा स्होला बहादुर
जामेकोलादा तिल्दा म्हेन्दो स्होला
तिल्दा सिङगारला सौन्दर्य ख्यापपुङला
तिल्दा कोकाकोला फिगर म्हाइला
तिल्दा क्याटवाक ब्राबा ब्रापुङला ?
जाम्बुलिङरि तिला जामेकोला म्हि आहिन
कि म्हि दोबारिन आखाम ?
खाराङ लासि म्हेन्दोदा फुल्ला
खालाइला वाङ वाङबाला लागि लाथानरि
खाराङ लासि म्हेन्दोदा छाला
खालाइला ज्याबा गेला ताङबाला तिबारि
खाराङ लासि म्हेन्दो टाङला
प्रिबा, डाबा–ब्रेबारि
तामुला सातान म्हेन्दोला प्रान हरन ।
म्हेन्दोतेन क्योइसि ह्रेमकोलाजुगुसे
जामेकोलादा तिल्दा चुह्राङ लासि ह्राङला स्वार्थरि ब्यान्चिला ?
जामेकोला जामेकोला गुङरि आतो खाइमाइ सौन्दर्य
जामेकोला जामेकोला गुङरि आम्हाइ खाइमाइ कोकाकोला फिगर
जामेकोला जामेकोला गुङरि आता खाइमाइ क्याटवाक लचकता
जामेकोलादा आतोबा
चु मुतेबा स्हेतेन क्योइसि ह्रोमकोलाजुगु
जामेकोलादा तिल्दा चुह्राङ लासि भोग्यबस्तु स्होला ?
जामेकोला !
थे सस्टिला महान स्रोत हिन्ना
थे आरेना संभब आरे जिबबिग्यानला परिचालन ।
तिल्दा चुनोन सृस्टिदाता
म्हेन्दो दोबारि इच्छुक मुला
तिल्दा चुनोन जिबबिग्यानला परिचालक
कोकाकोला फिगर उन्बारि
ओम क्याटवाक ब्राबारि स्विकार लाला ?
चु जाम्बुलिङरि
ह्रेमकोलाला मुतेबा अमानबिय बन्धन बोसि
ह्राङ जामेकोला हिन्ना
ओम बिबेकसिल म्हि हिन्ना बिसि थाहा याङबारि
दारे कादे ग्यार्जा दिङ ब्रन्तोला ?
