युङ्बा हिन्सामि !
लाथानजुगुरि डुङ्सेला मुबा
म्हिजुगुला विश्वासदा ङ्हाप्सेला मुबा ।
खाइमाइ नोन क्रुर युङ्बा दोबा
सेम आथान्नि
सेम लाबासे जेक्खे
आङ्याम्बा चिम
न्हा ताबाचिम
ठाइकोङ्बा
ङामि म्हि दोबा
कोसिसरि मुबा
खाइमा ब्याप फुइजि
खाइमा फ्याङ्बारि लोप्जि
खाइमा चरा दोजि
दुइला खाजिबाइ साङग्युर आरे
ङातेन
चरा दोबा बिबा
ह्राङ्बाङ दोबा बिबा गोबा मुबा
ह्वाइखाब्रिखेनजुगुसे काव्यरि बिबा लाबा चरा
फिरग्याप ह्युल्पाःला बिम्ब चिम
ङा फिरग्याप ह्युल्पाः दोजिम
प्रवासी श्रमिक दोजिम
श्रमिक दोमाहेन्से
साहुु से नियन्त्रणरि थान्बा मुला
गेला रफ्तार
मेसिनसे न्हाइबा मुला
याङ्ताम
ब्लाप्बा न्हाबा श्रमिकला धर्म आहिन
निरन्तर मेसिनला गति चालरि
ह्राम्तोबा हिन्ना
मेसिनतेन पैठाजोरी क्लाङ्बा हिन्ना
आगोबा ग्योइरि साहुला
अस्लिल केबा चातोबा हिन्ना
ग्याप्पा दोतोबा हिन्ना
मेसिन स्वामाइह्राङ्बान ताला
खाजिबाइ दुइरि ग्लोङ्पिन्ना
थाहा आता
खाजिबाइ श्रमिक ह्रोजुगुदा
मेसिनसे ग्लोङ्बा म्राङ्बा मुला
ओम म्राङ्बा मुला
याखारगि म्हाङ, लिउ थेन सुख थुम्बा
मेसिनतेन ह्रो, दुस्मनी थेन ङाम मुला
तिनिनोन श्रम लाचिबा मुला
मेसिनतेन
श्रम लाना लाना खाइमा
मेसिन दोजि थाहा नोन आतानि
बुँस्याडि फ्याङ्गुलिङ्रि कायाकल्प
ताबा ह्राङनोन
ङा फाइरि पोजि
जेक्खे मेसिन दोजि
मेसिन दोमाहेन्से
ङा न्हाङरि मुबा मुतेबा सेमजुगु
गोल्छे गोल्छे ताइसि
सुन्यरि दोबा मुला
भाव सुन्य ताबा मुला
भावुक दोबारि आखाम
डोबाला तामसोरसे आथुर
समवेदना आरे ङातेन
बिजाला केबासे ताङना आला
ज्याबाम्हान्बा आरे ङातेन
दिम डान्बा
आपा आमा डान्बा
प्रियसीदा डान्बा
मेसिनसे लाबारि आखाम्बा
गेजुगु हिन्ना
ह्रो, ङेङ्गोरजुगुतेन संवाद लाबारि आखाम्बा
मिसे जेबास्हेजुगु म्राङ्बारि आखाम्बा
ल्हेसे ज्याबा ब्रोइ किन्बारि आखाम्बा
ह्वाइ संगीतरि ताङ्बारि आखाम्बा
अवसाद दोबा आहिन
मेसिन दोबाला प्रमाण हिन्ना
सायद खाजिबाइ रे
ङा स्वामाइ दोसेला मुला
ग्लोङ्सेला क्योङ मेसिनदा
ग्लोङ्सेला मुला फेलोङ्बा दुङालदा
ओम
तेसेला (ओकल्ने) मुला
जेबा केवादा ।
दोःबा : यकिना अगाध, स्रोत : फोनिज कोरिया
