या टाङ्सि पिनजिन्माहेन्सेला राप हिन्ना चु
तिङ थेन आत्म नोन हार्सि जिन्सि (टकटक्याइ सकेर)
याखारगि गाङरि राप्सि
नुप्बाकेन लाबा दिनिदा च्यासिकेन
फ्रुम ङ्हि मिख्लि फ्रुल्सि दोङ दोबा राप हिन्ना चु ।
बुस्याँडिसे ङ्हापजिन्बा सुनाखरीला थुङ्गो गि म्हेन्दो
किन्सि ङा सालिक दोचिबा मुला
पद्यासनरि चिबा बुद्धला मिला निर्जिव होइस्हेर
ङाला दातेला उन्नत मु हिन्ना
पाखुरा थेन याफ्ला थिसि क्रेनाक्रेनान
देउराली दोसि काबा म्हाङ
ङाला दाते तिङदोना दोना लाबा लाबा हिन्ना ।
ङादा दारे एनिकादे केवाला ताम आलाउ
लोङ्बा खाला केवातेन
तिल्दाबिसाम युक्लिप्टसह्राङ्बा मिरि
चुला याखारगि आहिन ल्हानान परिभाषाजुगु
लिखन्डि ताजिन्बा ङाइ म्राङ्बा मुला ।
सुन सार्बा म्हारलेम (सुरम्य) ब्लेला दोङराप ह्राङ्बा
ङाला नोन मिनोत्सा दोसि छोनछोन दार्ला मिजुगु
चु भावावेशरि ह्राङ्दान सम्हालतिबारि आखाम्ना
बुद्धला मिग्याम होइस्हेर खि ह्रिबारि निमा
कन्चनजंघा नोन ङा ह्राङ्नोन तथागत ङ्हाच्छा
कु तासि क्राबासे फ्लिकदोसि किन्बा ङाला ग्रानसे
तिनिन्हाङ्गार ङा चोलचिबा मुला–
पोर दोसि मिचिला खाजिबाइ दुइ
तासाइ नोन चु
म्राप दोना दोसि दोसिखाबा राप हिन्ना चु ।
याफ्लाजुगु फुइसि मुरि
ङाइ राप्सिमाम ङ्योइबा लिच्छाला राप हिन्ना
वैयक्तिक प्रौढताजुगु धुलो दोसि
सन्दिग्धताजुगु थोबो थोबोरि स्युसि (उनेर)
म्युजिमरि च्योबा निरोला वीणा ह्राङ् नोन
ह्राङ्नोन याखारगि यु (किला) रि च्योसि
क्योङ मिख्लिजुगु क्राजिन्माहेन्से दोसि
प्लोक निसि मिबा पोरजुगुबिमा
सिनोन लाबा केवाला राप हिन्ना ।
ग्यास च्याम्बररि ब्लोबा म्हाङजुगु गुङरि
याखारगि ह्युल मुला ङाला
म्हाङ्ला याखारगि ह्युल ।
ङाइ घोषणा लासि थुङ्ला ङाला ह्युलला रापदा
गाङजुगुला कोरो (घेरो) मुला याखारगि
माउसुलीजुगुला जमात बिमा
काख्रेजुगुला प्रयास बिमा
सडकला गात्पाजुगुरि ‘बार’जुगु मुला
याखारगि ताम, बारजुगुला वाला वाला मिजुगु मुला ।
चुनोन वाला मिजुगुरि डम्म ल्हागतिबा खासु (कुहिरो) मुला
छाप्बा ङ्होरि बाम क्रेबा टुला फ्रुमजुगु
सुनसानरि क्राचिबा सेमला कफनजुगुतेन
ह्याङ खाबा निबा लाला ।
योरि चुरि बाजुगुला डोलीरि
मिख्लिला ह्वाइ क्रासि खाला
छक्कालरि घुम्तिनाङ लाबा
ब्योङ्सि ब्योङ्सि क्राला
ङ्यासे नाङ स्युक्पाजुगु कुतासि
ह्राङ्ला थोबोजुगु कुर्ला
मुतेबा म्हुना सारजुगु ह्राङ्लान लास थोसि
स्ह्यो ब्रानचिला
बुख्याँचाला दोङराप हिन्ना चु
बुख्याँचाजुगुला सहर÷बदनामीला ह्युल ।
उमेरकैद याङ्बा घोषणा
याखारगि ब्योङ्बाकेन लाबा स्योङदा काबा
बेतलहम सहरला हिप्पोपोटामस
ङाला ब्लोबाला राप, ङाला मेहरुन्निस्सा
ङाला ह्युल ।
आछ्योबा (अभाव)ला थानथान म्हाङजुगु
मुगंगा ह्राङनोन तिरमिराप ताबा
वैकल्पिक बुस्याँडिजुगु
अवरोहपूर्ण काबाजुगु
ङाइ भोग लाला, ङा पुर्खा दोसि भोग लाला
वालुवाला फुइबा सुङ्फिजुगु
समुह सम्भोगसे ब्लाप्ना लाबा कोठाला स्ह्योजुगुरि
ह्यालाला दिनिला प्रयासी याजुगु
रेसि लथालिङ्ग ताबा च्याबो ल्हुइ किन्सि
स्वर्ग ढकढक्याप लाबा जुम्बिजुगु
नरक ढकढक्याप लाबा जुम्बिजुगु
स्याल्बाकेन बामा थेन स्हिल्बारि टल्कप ताबा लाबासे
च्याबाकेन मुला गुरि राप्सि बु बुन्चिबा ङाला ह्युसे ।
या टाङ्सि (चुडालेर) पिनजिन्माहेन्सेला राप हिन्ना चु
तिङ थेन आत्म नोन हार्सि जिन्सि (टकटक्याइ सकेर)
याखारगि गाङरि राप्सि
नुप्बाकेन लाबा दिनिदा च्यासिकेन
फ्रुम ङ्हि मिख्लि फ्रुल्सि दोङ दोबा राप हिन्ना चु ।
दोःपा : यकिना अगाध
