तारलाम्या ग्लिङला स्वा लहर बैंससे दिप लुङ्सि मकालु ज्योमोगाङ ङेचिबा म्राङ्मुबा । ओस्बान थे क्याम्साङ क्षितिजरिक्यार म्राङ्बा भोजपुरला ट्याम्के गाङ नोन योरि फेबा दिनिला स्हेररि वाला च्युर्बासे लामा आउदिन जेबा म्राङ्बा मुबा । सभास्योङ थेन हिउँस्योङ चा तुम्लिङटारला टा त्रिवेणीरि शान्त ब्योङचिबा स्योङ अरुणतेन ह्रुप ताबारि सुसेली ह्राप्सिकेन छ्योङचिबा म्राङ्मुबा । चु मुतेबा डाक्टर सन्जु हाङ्ग ! थेन प्रहरी ईन्चार्ज निरीक्षक मनजितसे गे ग्याम्से फुर्सदला दुइ तेसि ह्राङ्लान नाम्सा थेन ह्राङ्ला गेथुमहेन्से ङामरि मुबा शिखरपुर भ्यु टावरला फिला तलारि दोसि ङ्हिसेन च्यासि आनन्द किनचिमुबा ।
ङ्ही नोन खाजिबाइ दुइरि वाना उच्च माविला ह्रो लोप्ता मुबा ।
चुनोन दुइरि मनजितला फोनरि घन्टि ङ्ह्याजि : ‘ए ! मनजितेउ तिनि एला फुर्सद नोन मुसिम । खाउ होइ दिम छ्योकुरि’ आमाला फोन चिम ।
‘ल्हा, ल्हा आमा ! सन्जु हाङ्गए मुला ङानि हाला दिमरि फुर्सद मुला ।’
‘ल्हा, ल्हा कोलाजुगु हाउ होइ नि ! ङानि ब्रानसिन चिसेला मुला ।’
चुलिच्छा आमासे फोन थान्सि जिन्माहेन्से ङ्हिनोन ताम लाबारि चुजि ।
तामलान ताङरि मनजितसे बिजि, ‘ह्युल ख्लाबा थेन थेरिक्यार नोन ताङ्बा भिडसेम ह्राङ्दान खाराङ खाराङ छोर्बा चुजि, एदा थेह्राङ आछोर्मुला ?’
सन्जु हाङ्गसे ङेसिकेन बिजि, ‘थेह्राङ म्हान्बा हिन्साम नाम्सारिन सेवा लाबारि डाक्टर दोसि तिल्दा चिसे ? ङादाम थेह्राङ खाइमाइ आछोर्नि ।’
अचम्म म्हान्सि मनजीतसे दोसि ङ्योइजि, ‘तिल्दा थेह्राङ आछोर्बा हिन्ना ले ?’
सन्जु हाङ्गसे न्हाङ्ला ताम पाङ्जि, ‘हिन्ना चुरिन ताङ्बा थेन आनन्दसे सातान प्लिङ्बा मुला ।’
सन्जुला तामसे ह्रेच्छाक थोम ताबान मनजीतसे ङ्योइजि, ‘तिल्ला हिन्ना ओम थे ? तिनि प्रष्ट लासि पाङ्गोले, ह्रोला विचार सेसि थान्गे ।’
आलोङ्ना ओम गम्भीर तासि सन्जु हाङ्गसे बिजि, ‘काङफ्ला दिला साप्रा ! थेरि ङ्हेमा पुर्खाला टुसे बाप्बा ह्राङ्ला बिबा सा मुगाइ ।’
‘वाहा ! ह्युलभक्त डाक्टर सा’ब ! जय नेपाल, राष्ट्र सेवकको ।’
सन्जु हाङ्गसे बिजि, ‘ए थेन ङालाते चु काङफ्ला दिला साप्रादा कादे खाँचो मुला, ओस्बान मुतेबा नागरिकला नोन मुला बिसि फ्यास्हिङ लाचिबा मुला ।’ ह्युलदा ल्हानान चेगाइ लाबा ह्रोजुगुडान्सि ङ्हिनोन ल्हानान भावुक दोजि ।
चु दुइरिन दोसि आमाला फोन खाबासे डान्बारि चुजि, ड्वाला स्यारि नामनामला डापला खुथेन म्हाररि ख्वाल्बा म्लाङ मासेला दालला छ्याम किनिमाला आचार ओम गाङबुला मार्सि म्हाला कान । सुङ छ्युल्ना लाबान ङ्हि नोन भ्युटावरग्याम मार फाप्जि ।
दोःबा : यकिना अगाध
