१
ओइ ! फिरग्याप ह्युलरि निबा नेपाली सेम थेन तिङजुगु
पहाडरि दातेनोन टुकी लुङ्ला, बेंसीरि लाबा लुङ्सुर बा लासि लासि चलप ताला
काङ्से ब्रानोन तोला दातेनोन, गाङ ग्युरुजुगु, ह्रिला ग्यालामजुगु
ब्रानोन तोला दातेनोन, ब्लाक्पा चे, बगर थेन डुइ ब्लेजुगु
ल्हुइ ब्लाप्सि ब्लाप्बा न्हाबारि दातेनोन, सारिन स्योन्दोलोङ तातोला
क्याम्साङ जासाम स्योङ्ला गुरि दातेनोन, तुइनरिन च्योतोला
थेतासि
ब्रान्गो होइ फिरग्याप ह्युलरि निबा सेम थेन तिङजुगु
बित्थारि तिल्दा दोसि खाला ? ताजि ए दोसि आखाउ ।
२
ओइ ! फिरग्याप ह्युलरि निबा सेम थेन तिङजुगु
बाँझो बु, थानथान ताबा नाम्सा, ह्रिला जनावरला आतंक
चुरि आरे खाजिबाइ अमनचयन, सुख, शान्ति, उत्साह थेन उमङ्ग
थानथान तासिकेन निबा लोपखाङ, कलेज, डुङ्बा सटर ओम उद्योगजुगु
हप्तारि थुइबा डिक्पा थेन लारि फेबा वियोगजुगु
छेला लि, नुप्के लाबा दिनि थेन लानि च्यातोला
फिरग्याप ह्युलला हस्तक्षेप, रणभूमि थेन बलिला का च्यातोला
थेतासि
ब्रान्गो होइ फिरग्याप ह्युलरि निबा सेम थेन तिङजुगु ब्रान्गो
बित्थारि तिल्दा दोसि खाला ? ताजि ए दोसि आखाउ ।
३
ओइ ! फिरग्याप ह्युलरि निबा नेपाली सेम थेन तिङजुगु
चलआतिबा होटल, छोङखान, गिक्खे चौतारी थेन पार्कजुगु च्याबारि बिसि
जन्ती, मलामी, भारोपर्म, रोदी थेन छार दिङला मेला प्लिङ्ना लाबारि बिसि
ग्रेनजुगुला काङ फ्यालातोला, थेन्नान उन्बारि ब्रातोला
दुइदुइ मैनला नाङ्सालह्राङ म्ह्युतोला, गिक्खेन बेसहारा तासि गुर्तोला
थेतासि
ब्रान्गो होइ फिरग्याप ह्युलरि निबा सेम थेन तिङजुगु
बित्थारि तिल्दा दोसि खाला ? ताजि ए दोसि आखाउ ।
४
चुरि चेतना आरेबादा छ्योकु लाला, ग्रेन युगपुरुषदा थो स्वाला
थोबा ओम काङदोना च्यामा, फिरग्याप ह्युलला क्वान जेक्खे स्याप्ला
लोपखाङ, कलेजरि दार्से, फिरग्याप ह्युलला ग्योइ थेन ङोसेबाला क्लाङ्बा
गिसे स्यान्दोला काङ छेङ्बा, खाम्देदोना नियम थेन कानुन आतेन्बा
चुह्राङ्बा ठिम थेन रिमठिम च्यातोला
थेतासि
ब्रान्गो होइ फिरग्याप ह्युलरि निबा सेम थेन तिङजुगु ब्रान्गो
बित्थारि तिल्दा दोसि खाला ? ताजि ए दोसि आखाउ ।
५
चुरि तिला आरे ? अन्याय थेन अत्याचार, घृणा थेन तिरस्कार
ख्रेन्बो फो, लिखन्डि गो, ब्रेबा छाना ओम बेरोजगार
अहंकार, बेतिथि, अराजकता थेन अरबौंला भष्टाचार
देन्बा, धर्म, आदर्श थेन शान्तिला ग्यालामरि ल्होलो छेप्बा
आम्राङ्बा स्हो तासि टुलुटुलु च्याचितोला
थेतासि
ब्रान्गो होइ फिरग्याप ह्युलरि निबा सेम थेन तिङजुगु ब्रान्गो
बित्थारि तिल्दा दोसि खाला ? ताजि ए दोसि आखाउ ।
६
ओइ ! फिरग्याप ह्युलरि निबा नेपाली सेम थेन तिङजुगु
ह्युल्बा थेन शासक थारेङ ताबा दुइरि
ह्युल नोन प्लेनप्लेनरि बो ठाबा दुइरि
देन्बादा ब्रेना लाबा प्रयास लाला ओम आदेन्बादा डाना लाबा
सत्ता थेन बाङला डेन्बारि, प्रतिस्पर्धी थेन निमुखाजुगु बेना लाबा
विकृति थेन विसंगतिसे लामा, चुर्ला चलन पोबा मुला
साङ्बा थेन पिङ मु तिनि, म्लाङ खासुसे काबा मुला
मुसि नोन अबरुद्ध मुला, इन्टरनेट, एप थेन विद्युतला लाइनजुगु
मुहान हार्सि ओम कासि डुङ्बाकेन मुला, शक्तिकेन्द्रला टरबाइनजुगु
दारेम चुरि मुरिक्यार आहिन, सारिक्यार च्यातोला
ज्यासि गोङ्मा ल्हेतोला, फुइसि बु बुन्तोला
थेतासि
ब्रान्गो होइ फिरग्याप ह्युल निबा सेम थेन तिङजुगु
बित्थारि तिल्दा दोसि खाला ? ताजि ए दोसि आखाउ ।
७
ओइ ! फिरग्याप ह्युल बिा नेपाली सेम थेन तिङजुगु
छे नोन छेला दोइसे नाङ्बा दुइरि
छिमेकिग्याम्से नामनाम ह्वारि न्हाइबा दुइरि
डुडुइ नोन डुडुइला ह्युल्सा मुला खान्दामान, ब्याङ्नोन आतो
पापला दार्बुन प्लिङजिन्जि, गुरनोन आतो
जड ल्हुइरि बु नोन आरे, युनोन आतो
ग्युइ थेन चेतनाला नाङ्साल सिजिन्जि, म्रानोन आतो
मुतेबा सेम थेन तिङजुगु डेजिन्ज, ख्यानोन आतो
सोबा चु आत्माजुगु सिजिन्जि, न्हानोन आतो
पिन्दोबा साइ मि आपिन्बा मुला चुरि, साइ आपिन्साइ चिदोला
मु थुर्जि महंगीसे, दोसि फिरग्याप ह्युल नितोला
थेतासि,
ब्रान्गो होइ फिरग्याप ह्युल निबा सेम थेन तिङजुगु
बित्थारि तिल्दा दोसि खाला ? ताजि ए दोसि आखाउ ।
२०८०÷०८÷१४
दोःबा : यकिना अगाध
