ग्योइकाइरि वाङ्बा ह्रेङ्बा दुइलिच्छा रापब्रिखेन सानुभाइ जिसीसे याखारगि गेताङरि ‘प्रसंशा स्यो’ याङ्जि । ल्होलो विधाला खेन्पो थेन ग्रेन ग्योइकाइब्रिखेनजुगु दोगाबा थे गेताङरि ह्राङसे डेन याङ्मा थे आउदिन ताङ्जि । गार्वान्वित ताजि ।
ङ्यासे कोठारि वाङ्बा थेसे प्रशंसा स्यो मोक्कोनसे म्राङ्बा ग्लारि च्योबा सेम लाजि । ङ्हाच्छारि चाबाथुङ्बाला ताङ डिक्ना लासि चु थेला रेगे मुबा । थे ङ्हाउ दिङ ङ्हिहेन्से गेला ताङरि याम्बुरि डेरा किन्सि चिबाकेन मुबा ।
चाबाथुङ्बा लामाहेन्से थेसे म्रापग्याम मोक्कोनसे म्राङ्बा ग्लारि प्रशंसा स्यो च्योबारि डेङरि फ्युक्पा ठोक्बारि चुजि ।
फ्युक्पा ठोक्बा ताङरि थोन्बा डङ डङ काइ दिमफ्युक्पोला न्हाब्याङरि दोजि ।
चुर्से सानुभाइ दारे कोठारि खाबा निबा थेला ह्रोजुगु थेन ङेवाङेङ्गोरसे प्रशंसा स्यो म्राङ्सेला मुला ओम ङालाइ नोन ग्योइकाइ ङोसेबा स्होसेला मुला बिबा म्हान्सि चिबा दुइरिन खालाइसे माङग्यारग्याम म्राप ढकढक लाजि ।
थेसे म्राप ठ्वाङ्जि । म्रापरि दिमफ्युक्पो दाराप्सि चिबातेन थे चोन निजि । दिमफ्युक्पोला लि च्याबारि लायक मुबा ।
‘तिलाइ गे मुबा कि दिमफ्युक्पो अपा ?’ थेसे ङ्योइजि ।
कोठा न्हाङरि वाङ्सि क्योङ ग्लारि च्याबान दिमफ्युक्पोसे खरो काइरि ङ्योइजि, ‘चु डङ डङ काइ तिगाला ? ह्राङ्से फ्युक्पा ठोक्के लाबा कि लिगा ओम ? चु कोठारि खान्दामान फ्युक्पा काँटी ठोक्बारि आयाङ है ।’
जिसीसे याला फ्युक्पा मार्तोल योना योना ग्याप्से छुप्बाकेन जाजाबा काइरि पाङ्जि, ‘आरे आरे दिमफ्युक्पो आपा, ठोक्बा आरे ।
दोःबा : यकिना अगाध
