नेपाल तामाङ कलाकार संघला १७छा वार्षिक साधारणसभा थेन डेन गेताङ याम्बुला नेपाल प्रज्ञा प्रतिष्ठानला हलरि असोज ९ गते कुनु ताजि । बागमती प्रदेशला ग्रेनलोन्पो माननीय बहादुर सिं तामाङला ग्रेन डोन्बोरि गेताङ थुम्बा हिन्ना ।
गेताङरि माननीय बहादुर सिं तामाङ थेन रेडियो नेपालला महाप्रबन्धक, निर्देशक अमरध्वज लामादा प्रमाण स्यो पिन्सि थुजेछे फुल्मुबा । थेराङनोन लासि नेपाल टेलिभिजनला महाप्रबन्धक, निर्देशक फुलमान बल थेन भाषा आयोगला कामु गौराइ डा. लोक बहादुर लोप्चनदा डेन लामुबा ।
गेताङदा ठोङस्हेङ लाबान ग्रेनडोन्बो ग्रेनलोन्पो बहादुर सिं तामाङसे तामाङ कला थेन रिमठिमदा सोना लाबारि नेपाल तामाङ कलाकार संघले क्लाङबा भुमिकाला प्रशंसा लामुबा । थेसे तामाङ ह्युल्बाला कला थेन रिमठिमदा सोना लासि दामोला पुस्तादोना दोना लाबारि राज्य थेन ह्युल्बाला गुङरि ह्रोगे लातोबा आवश्यकता मुबा ताम थान्मुबा ।
गेताङरि विसिष्ट डोन्बोकादे वाग्मती प्रदेशला ङ्हाच्छाला लोन्पो तिर्थ लामा थेन चन्द्र लामा, डोन्बोकादे रोसि गाउँपालिकाला चोहो दिनेश तामाङ, चन्द्र लामा, फुलमान बल, तामाङ पत्रकार संघला वरिष्ट चोहो बुद्ध योन्जन लामा, राष्ट्रिय तामाङ घेदुङला ग्रेनगाउराइ प्रविन बल, तामाङ चलचित्र संघला गाउराइ बुद्ध लामाला छ्यामसे ज्याबाम्हान्बा थान्मुबा ।
गेताङरि संघला ग्रेन गाउराइ खेम मोक्तानसे वार्षिक प्रगति प्रतिवेदन थेन न्होरचोहो योगेश तामाङसे आर्थिक प्रतिवेन थान्मुबा ।
थेराङनोन लासि तामाङ जागरण अभियानअन्तर्गत “ह्याङला दोङह्राप” मिनला व्हाइला पोस्टर नोन सार्वजनिक लामुबा ।
गेताङ तामाङ कलाकार संघला चोहो विशाल काल्तनला चोहोदानरि तामुबा ।
