चार्टिस्ट आन्दोलनला ह्वाइ

थे दुइ खाइमा खासेला मुला !
आज्याबा रेला पुडिनुप्सेला मुला
कुर्सेला आरे सामन्तला ओन्छाङ
खाल्छे लाला परिश्रम खेती किसानीला गे
मुठीनाङ दोप्ताला चलप तासेला आरे खाजिबाइ हुकुम
ङ्यान्सेला आरे थेला कुल्बादा
ल्याक्पासे छेप्सेला मुला ल्हाना ह्युल्बासे थेदा
कुर्बा आहिन, थेनतासेला आरे ह्रो गे जिन्ना लासिन ख्लासेला मुला
संघर्ष लासिन चिसेला मुला खाइमादोना चार्टिस्टदा डाना आला !

खाइमा दुइगि खासेला मुला
तासेला मुला मजदुरला मान
थेदुइरि श्रमिकसे लासेला आरे
अभिजात वर्गला डेन,
खटप ताबा मुला खानी न्हाङरि थे खानी मजदुर
फ्युक्पोजुगुला कुल्बादा लासेला आरे दारमे मन्जुर
कुर्बा आहिन, थेनतासेला आरे ह्रो गे जिन्ना लासिन ख्लासेला मुला
संघर्ष जारी लासिन चिसेला मुला खाइमादोना चार्टिस्टदा डाना आला !

चुह्राङ्बा याखारगि दुइ खासेला मुला
थेदुइरि ख्रेन्बा फुइबा म्हेर्सेला आरे
खाइमाइ बुनकरला दिमथेमे
थेदुइरि मुतेबा मजदुर बिजा म्हेर्सेला मुला
चु ह्युलरि ज्याबा ङुबारि म्हुक्गि
थेनोन दुइरि ज्युम ङेसेला मुला बिजा
म्हाङरि सेमताङ्बा क्लाङछ्योङ च्यासि
कुर्बा आहिन, थेनतासेला आरे ह्रो गे जिन्ना लासिन ख्लासेला मुला
संघर्ष जारी लासिन चिसेला मुला खाइमादोना चार्टिस्टदा डाना आला !

दुइ चुह्राङ्बा नोन खासेला मुला थेदुइरि म्हारम्हुइ बिमा
ग्रेन तासेला मुला म्हिम्हि गुङ्ला भाइचारा

खाइमा हब्सीला ह्राङ्बाङ विचारफिरि तासेला आरे खाजिबाइ बन्धन

म्हि जातिला बिमा फेबा तासेला आरे सम्बन्ध
कोल्ला आदे, थेनताला आदे, खाइमादोना ह्राङ्बाङ आयाङ
थेदुइ दोना न्यायला आङ्ह्या ह्वाइ
खाइमादोना चेगाइला संगीत कोबारि आयाङ
दुइ खासेला मुला थे
खाइमा पादरीला कुलाकि थेन ग्लेला श्रीपेज
क्लाङ्बाला दृष्यरि सजप तासेला मुला संग्राहलयरि
थे दुइरि दोसेला मुला थे ङ्हाउला दोङराप ।

खाइमा खानाङए तासेला आरे लेङ्बा बर्बरता थेन
आदेन्बाला मिनक्रिप (नामोनिशान)
ओम थे दुइरि करुण थेन देन्बा जेक्खे चिसेला मुला ङोसेबा
कालकोलरि ताला आदे थेनचिला आदे
खाइमादोना ह्राङ्बाङ आयाङ

खाइमादोना करुणसे डासेला आरे
खाइमादोना देन्बाला डेन तासेला आरे
दुइ थे तिर्याम खासेला मुला खाइमा जाम्बुलिङरि
तासेला मुला आनन्द ओम उल्लास खान्दामान
खाइमा हत्यारो तरबारला म्यान न्हाङरिन खट (खिया) ल्हागतिसेला मुला
खाइमा सुख शान्तिला ह्वाइ होङ्सेला मुला, कारखानारि, बु ह्वारारि
कालकोल ताला आदे, थेनताला आदे
खाइमादोना ह्राङ्बाङ आयाङ
हिन्ना ह्रो खाइमादोना जाम्बुलिङरि
सुख समृद्धिला शासन आखा ।

चार्टिस्ट ह्वाइखाब्रिखेन थोमस कुपरला तुन्बा ङोसेबा :
बेलायती मजदुर आन्दोलनला अगुवा थोमस कुपरला केबा २० मार्चा १८०५ रि लेसेस्टरला मजदुर दिमम्हेरि ताबा मुबा बिसाम डोङ्बा १५ जुलाइ १८९२ रि हिन्ना । ह्रो प्रशिद्ध चार्टिस्ट आन्दोलनकारी जेक्खे आहिन याखारगि महत्वपूर्ण ह्वाइब्रिखेन नोन ब्रिबा मुबा ।

थेसे मजदुर वर्ग थेन श्रमजीवि वर्गला हक ओम याङतामला कानुन स्होसि लागू लाबाला लागि ह्युल्बाला तर्फग्याम हस्ताक्षर पोप्सि थे दस्तावेज जुलुसला छ्याम संसद्रि पिन्बा मुबा । थे चार्टिस्ट आन्दोलनला प्रमुख नेता मुबा ।
थेनोन दस्तावेजरि ब्रिबा याङ्ताम ह्रिबा आन्दोलनदा चार्टिस्ट (वडापत्रवाद) आन्दोलन बिमुला । आन्दोलनसे क्योङ बेलायतदा चोननिना लाजि । युरोपनाङ मजदुर छोरुवा ठाम्जि । थे चार्टिस्ट आन्दोलनसे जाम्बुलिङ नाङ नोन आन्दोलनला छार तरिका, छार हतियार, उत्साह थेन लि स्होबारि सफल ताजि । तिनिदोनानोन चु आन्दोलनला ग्रेन महत्व मुला ओम दोङराप छोन्बो मुला । कार्ल माक्र्स, फ्रेड्रिख एंगेल्स, लेनिन, स्टालिन छ्याम तिनिला पुस्ताला मुतेबा कम्युनिष्टजुगुसे चार्टिस्ट आन्दोलनदा गर्वला छ्याम बयान लाबा लामुला । जाम्बुलिङ नाङला कम्युनिष्ट आन्दोलनला मुतेबा नेता प्रशिक्षकसे चर्चा लाबा लामुला । चुनोन शान्तिपूर्ण आन्दोलनला असफलताला जगरि जुसि क्रान्तिकारी ओम विद्रोहात्मक आन्दोलनलन विकास ताबा मुबा ।
१८४० रि चार्टिज्म आन्दोलन तिबा (सन् १८३८–१८४८) बिमा ङ्हाच्छा कुपरसे स्होन्बो स्होबा, लोपखाङरि मास्टर थेन स्योमिला लिरि गे लामुबा । स्योमिला गेनाम (पेशा)से थेदा चार्टिस्ट आन्दोलनकारीला नेता, ब्रिखेन, स्योमि थेन प्रचारक स्होजि ।

नेपाली दोःबा : जय कार्की, तामाङ दोःबा : यकिना अगाध