सेमरि ल्हाना म्हाङ थोसि खाबा ङा चु फिरग्याप ह्युल
दिम थेमेला म्हाङला पोरे थोसि खाबा ङा फिरग्याप ह्युल
दिनम्हुन दुङाल तासाइनोन सेम न्हाङरि छुम्सि ब्रामुल
जाथेबाला जिम्मेवारी थोबोनाङ पुइसि ब्रामुला ।
तोरमार तिलादाम्मान ताम लासाइ ङालान थोबोरि दोगाजि थे ताम
सेम न्हाङ्ला रहर थासि तासाइ ङाइ ङ्हाच्छा बोर्दोजि थे ताम
दिमला झ्यालग्याम्से कादेन सिम्बा सिम्बा लाबा खाबा म्राङ्जिम
लिच्छारि दिमला ग्रेन म्राप्ला जिम्मेवारी ङ्हाच्छा ताजिम ।
म्होकोन म्हाङ छ्योना लाबारि न्होरला म्हाङ ङ्हाच्छा म्राङ्जि
थेनोन म्हाङ थोसि तिगाइ आसेबा फिरग्याप ह्युलरि फ्याङजि
चु ह्युल्ला ठिमसे ह्राङ्लान ह्युलरि चिबा ग्याम स्होआखाम्जि
थेतासि ङा ह्राङ्बा ब्योन छामेकोला तोङ्जा तोङ्जा फिरग्याप ह्युलरि निजि ।
खात्दामान म्हाङ म्राङसाइ न्होरलान ताम ङ्हाच्छा थोन्जि
ह्राङ्लान म्हिकादेसे चुनोन न्होरला तामरि ल्हेबा फेबा लाजि
ङाइनोन ह्युलरि चिसि ज्याबा गे लाबा सेम थोसि कादे ब्राजि
तिलासे थेनोन न्होरला म्हाङ थोसि फिरग्याप ह्युलरि निदोजि ।
घ्याङलेख गाउँपालिका वडा नं ५ बुदुमचुली, सिन्धुली
