याम्बुला महाबौद्धरि दोइ पुइसि दिमम्हे न्हासिकेन खाबा आइते मगर वीर अस्पतालला गेटङामरि ल्हानान रेहेन्से ओत ल्हागतिसि चिबा मुला । ङ्यासे झमक्क तामासुताइ नाम थेनचिबा आरेमुबा । थेदा थापाथली चोकरि फाप्सि सुकुम्बासी बस्ती दोतोमुबा । थेसे जाजामेला लागि छार क्वान ग्लुबा मुबा ।
थेतासि थेदा जाजामे स्याप्बारि ओम थेन्ना लिरि ताङ्बा च्याबारि हतार मुबा ।
नाम जाकि च्याङ्माहेन्से थेतेन ओत ल्हागतिबाजुगु ह्राङ्ह्राङ्ला गन्तव्यरिक्यार वाङ्जि । आइते नोन मंगलबजार निबा टेम्पो क्रेसि चिबा ग्लारिक्यार निजि ।
रेगिला झरिला कारण बागमतीसे आज्याबा लि स्होबा मुबा । थापाथली चोकरि फाप्सि सुकुम्बासी बस्तीरिक्यार निलाबा थेदा प्रहरीसे ग्यालाम कासि बिजि, ‘ङ्हाच्छा ग्यालाम आरे खानाङ दोसेला हिन्ना ?’
‘ङा सुकुम्बासी बस्तीरि ह्रेम्बोरछे !’
‘निबारि आम्याङ, जोखिम मुला फ्लिकदोगो ।’
हिन्बाइ नोन सुकुम्बासी बस्तीला ब्राङजुगु बागमतीसे गिलिच्छा लि लाबासि ग्लोङ्चिबा मुबा । आइतेसे ङ्योइजि, ‘ओम ङाला दिमम्हे जाजामे खानाङ मुला ताला ओम ?’
चुर्से गुरुद्धारला ख्राङ्गारि थान्बा अस्थायी शिविरग्याम माइकिङ ताचिमुबा, ‘क्योलो जेक्खे उद्दार लाबा आइते मगरला जाजामे थेन म्रिङ ङान्तेन शिविररि सुरक्षित मुला ।’
२०८१÷६÷१७ हेटौंडा ,मकवानपुर ।
दोःबा : यकिना अगाध
