ओन्छ्यान ङाला ह्युलला शासक
ओम राज्य विवकेशुन्य ह्राङ छोर्ला
ह्युल ब्लुम्मा फिरग्याप ह्युल आख्लाबा
रोमला निरो शासकह्राङ छोर्ला ।
खानाङ खानाङ सत्ता मुला
सरकार आरे ह्राङ छोर्ला
दोसि पाङ्ला–
रोम क्रोमा बाँसुरी ह्रापचिबा
शासकह्राङ छोर्ला
ह्युल ब्लुम्मा विदेश कोर्बारि ताङ्बा
शासक म्राङ्मा खानाङ खानाङ
सेमहेन्से नाइबा रेन्सि खाला
ह्युल विपत्तिरि परतिबा दुइरि
वेवास्त लाबा शासक म्राङ्मा
तिल्दा तिल्दा सेमरि मेफुम राप्सि खाला
ह्युल्बासे सरकार म्हाइबा दुइरि
म्हाबा शासक म्राङ्मा
खानाङ खानाङ स्युर्बा सेम खाला ।
ग्यार्जाछा म्हि सिबा दुइरि
ग्यार्जाछा बेपत्ता ताबा दुइरि
अरबौं धनजनला क्षति ताबा दुइरि
ह्युल्बा रेमरेम ङ्योइबारि चुबा मुला–
खाइ ङाला ह्युल ?
तिनि सरकार खानाङ मुला ?
शासक वर्ग खानाङ म्ह्युजि ?
तासाइ फ्याफुल्ला
ह्राङ्ला ल्हुइला बाजि सेबा
थे उद्धारकर्ता नेपाली सेना थेन नेपाल प्रहरीदा ।
स्यालुट मुला,
उद्धारकर्ता ब्योन चाणिकलालादा ।
फ्यास्हिङ मुला
मुतेबा नेपालीदा
होपचिबा पोररि मलम ल्हागाब लाबादा ।
ङाला ह्युल क्राबा दुइरि
ह्युल विपत्तिरि परतिबा दुइरि
ह्युल ढिक्का गि ताबा दुइ हिन्ना चु दुइ
पार्टी बिमा फिरि रेबा दुइ हिन्ना चु दुइ
विपत्तिरि परतिबादा
मलम ल्हागाब लाबा दुइ हिन्ना चु दुइ
विपत्तिरि परतिबादा
उफ !
ङाला ह्युलरि तिनि
खाइ तिला बिसे ?
खाल्दा ङ्योइसे ?
सेमला बु खाल्दा पाङ्से ?
ह्युलला मुली नोन जोकर तामाहेन्से
च्यार्बा सुङ मुबा ह्युलला मुली तामाहेन्से ।
ह्युल्बासे दुङाल याङ्बान ताजि
चु सेममि ओस्बान सिसेला ताजि
थेतासि,
दारे ह्युलरि सुशासन बाबारि
गिक्खे आताना सुखान आतानि ।
भ्रष्ट शासक वर्गला टा स्योइबारि
क्रेप्सा खिसि ङ्हाच्छा आवाङ्ना धर नोन आयाङ्नि ।
