नेपाल तामाङ घेदुङ, कास्कीला बहुउद्देश्यीय दिम शिलान्यास गेताङ असोज १७ गते पोखरा १४ चाउथेरि मुबा गेन्दुनला सारि ताजि ।
दिमला शिलान्यास ग्रेनडोन्बो प्रतिनिधि सभा सदस्य माननीय मन बहादुर गुरुङ, घेदुङ संघीय ह्रोचोहो दीपक वाईबा तामाङ थेन घेदुङ जिल्ला चोहो भक्त तामाङ लामुबा ।
गेताङरि ग्रेनडोन्बा गुरुङसे बिजि, ‘बहुउद्देश्यीय भवनला जगमि युजि तासाइ सरकारग्याम विनियोजित बजेट दिम स्होसि जिन्ना लाबारि छ्योसेला न्होर आहिन, चुला लागि तह सोमरि मुबा सरकारला म्राप ढकढक्या लाबारि ह्राङ्निसे खाजिबाइ कसुर थान्ना आदे ।’
ह्रोसे ङ्हाच्छा बिजि, ‘आदिवासी समुदायसे ओइमाहेन्सेन तिनिदोना ह्युल फिरिग्याप मुबा ङेङ्गोरजुगुतेन न्होर ह्रो ह्रिसिन दिम स्होबा ग्रेन ग्रेन गेताङ जिन्ना लाबा लामुला तासाइ प्रशासनिक प्रक्रिया छ्योना लासि सरकारी बजेट याङ्बा तामरि बिसाम दाते नोन ह्याङ लिच्छा मुला ।’
ह्रोसे झान बाङ लासि पाङ्जि, ‘राज्यसे अनुत्पादित थुमरि लगानी आला बिसि पाङ्मुला तासाइ चु ह्युला ह्युल्बा थेन खाजिबाइ समुदायला विकासरि ह्रो ताना लाबा बिबा चौतर्फी हिसाबसे क्योङ ह्युल समृद्ध ताबा हिन्ना ।’
गेताङरि घेदुङ संघीय ह्रोचोहो दीपक वाईबा, तमु धिँ नेपालला चोहो हुम गुरुङ, तामाङ घेदुङ प्रदेश ह्रोचोहो शिबु ब्लोन, घेदुङ महानगर गौराइ अन्जना तामाङ, पोखरा महानगरपालिका वडा नं.१३ ला जनप्रतिनिधि सुचिता तामाङ, बैदाम तामाङ इकाईला चोहो ज्याक तामाङसे ज्याबाम्हान्बा सेमताम थान्मुबा ।
शिलान्यास गेताङरि धर्मगुरु धिरज लामासे साङ्सेग्र्याम लामुबा ।
भक्त डुम्जनला चोहोदानरि ताबा गेताङरि रितु तामाङसे डेनताम थान्मुबा बिसाम संचालन मिनमाया तामाङसे लामुबा ।
घेदुङ, कास्कीला चोहो भक्त तामाङला आन्सार दिमला लागि सरकारग्याम ९० लाख वजेट विनियोजन ताबा मुला ।
फोटो : भक्त तामाङला फेसबुकवालग्याम्से
