१. नाम्युङजुगु
नाम्युङजुगु
ह्यार्सि टिमुला दोपरि
गाल ठ्वाइसि टिमुला
दिम, डेङ थेन साजुगुरि
थासि टिमुला
छार क्वान, छार दिम, छार ल्हुइ
छार दस्तावेज, छार आस्था
छार नेपालला छार म्हाङ
नाम्युङजुगु
ह्यार्सि टिमुला दोपरि ।
ङानिला कुथापला कान चासि
ङानिलान थो, छिडी थेन कोठाजुगुरि
फोहोर लासि टिमुला
गाल स्होसि टिमुला छार खासेला
थासि टिमुला छार उत्साह
ओम ह्युल्साला गरिमा थेन प्रतिष्ठा
नाम्युङजुगु
वाङसि टिमुला सरकार थेन संसदरि ।
२. फाप्पा
ए खाबा
साङङ्युर याङसि लिच्छा
कुक्योङ चेकाइ थेन डेनला
वाला गलैचाजुगु
तिसि
ब्रान्सि टिबा मुबा
ङ्यान्बान, सेबान ह्राङसे सेबा तामजुगु
दिनि–क्युइतेन प्रे छेला बिबान
म्राप ठ्वाङसि
ग्याम
च्यासि टिबा मुबा
ओहो
ए खाजि
लाबाह्राङलासि
छाङमान दुलुदा
तिखुरिन
फ्याङना लालाह्राङ
ओहो, खाराङबा ताङबा ताम !
ए खाजि
ए ङामरि, झन ङामरि खाजि
ए ङानिला राङगा ङामरि खाजि
हाराबारा
ङानि
एदा डेन लाबारि
म्रापग्रेनरि खाजि
तासाइ उदेक !
ए थाआयाङना सुप म्हाजि
ए थाआयाङना सुप म्हाजि
या ग्याम स्योङ म्लेजि
या तिनि मि
छेबारि पेजि ।
३. रोडम्याप
प्राङबोसे ब्लोबा
थानथान गोङमाजुगु
ख्रेन्सि खार्बा
जाजाबा बामजुगु
घन थेन छिनासे म्हाङ स्हेङबान
तारेभीरजुगुरि
पिक थेन साबेलसे
ठ्वाइबान साम्मा लाबान बेथितिजुगु
कालीकोटला म्हिजुगु
रोड स्होसि टिमुला
कालीकोटदा खाराङलासि स्होबा
कालीकोटदा तिला स्होबा
दुङालरि मुला डीसी थेन दिल्ली
टिसि ज्याबा दिम्नाङरि
इराक नीतिला बाङरि
विदेशी विश्वविद्यालयसे छाबा स्हेजुगु
विदेशी ह्रोरि
विदेशी ग्योइरि
विदेशी इसारारि
स्होसि टिमुला ‘म्याप’
याम्बुरि
रोड स्होसि टिबाजुगु स्होसि टिबान मुला
म्याप स्होसि टिबाजुगुइ नोन स्होसिन टिबा मुला
रोडह्राङबा म्याप दोला वा
म्यापह्राङबा रोड दोला
था आरे, खाप्पाचा बाङ थेन स्वार्थरि
ह्युल्साला रोडम्याप दोसेला मुला !
(ह्वाइखा ब्रिखेन स्नेह सायमीला ‘चाम थेन डेङ्जुगु’ ह्वाइखापोप ग्याम दुइबा गोर सोम ह्वाइखा । चु ह्वाइखापोप योनासेन छिसेला मुला ।)
दोःबा : ईश्वर थोकर
