म्हेन्दोमाया समाज, कतारला ब्लिछा अधिवेशनसे गुर्ब लामा तामाङला चोहोदानरि छार कार्यसमिति स्होबा मुला ।
निर्वाचन संयोजक प्रकाश मम्ब तामाङला ग्रा आन्सार कार्यसमितिला गिक्छा ह्रोचोहोरि मोइराम तामाङ मुला बिसाम ङ्हीछा ह्रोचोहोरि गणेश लामा तामाङ मुला ।
कार्यसमितिला गौराइरि चित्र तामाङ, ह्रोगौराइरि मुनाल तामाङ, न्होरचोहोरि भिम मम्ब तामाङ, ह्रोन्होरचोहोरि फूलबहादुर तामाङ मुला ।
ओस्बान लासि मुल्मिजुगुरि माया घिसिङ तामाङ, अनिता तामाङ, शंकराम तामाङ, राजनकुमार तामाङ, दावादोर्जे लामा मुला ।
अधिवेशनला ग्रेनडोन्बो नेपाल आदिवासी जनजाति महासंघ, कतारला चोहो डिएन मगर मुबा बिसाम विशिष्ट डोन्बो नेपाल प्रवासी तामाङ समाज कतारला चोहो सुवास तामाङ थेन स्यान्दो ल्होलो गेन्दुनजुगुला प्रतिनिधिजुगु मुबा ।
१८ अक्टोबर २०२४ शुक्रबारकुनु वेलफेयर रेष्टुरेन्ट, प्लाजामलला सभाहलरि ताबा अधिवेशनसे चु छार कार्यसमिति स्होबा हिन्ना । म्हेन्दोमाया समाज नेपाल प्रवासी तामाङ समाजला संरक्षकरि सन् २०१६ रि स्हेङ्बा गेन्दुन हिन्ना ।
चु गेन्दुनसे तामाङ ग्योइ, धर्म, लिपी, गोइलो थेन रिमठिम सोना, छार्ना थेन ल्हेना लाबारि फिरग्याप ह्युलग्यामसे गे लासिकेन खाबा मुला ।
